¹ Taim mi laik oraitim Israel long ol bagarap bilong em, ol sin bilong Efraim i save kamap ples klia wantaim ol pasin nogut bilong Samaria, ol i save giamanim ol man na brukim haus na stilim ol samting na pulim ol samting bilong ol man long rot. ² Long bel bilong ol, ol i no save olsem mi save long olgeta pasin nogut bilong ol. Pasin nogut bilong ol i kamap bikpela long ai bilong mi. ³ Ol i save mekim ol pasin nogut na giamanim king na ol ofisa bilong em bai ol i amamas. ⁴ Ol i lain bilong mekim pasin pamuk, olsem man bilong kukim bret i save mekim paia long hatim aven bilong em i stap na wetim bret i solap na em bai kukim long aven. ⁵ Long wanpela bikpela dei bilong king, ol ofisa i spak nogut tru long wain. King i spak nogut tru wantaim ol. ⁶ Tingting bilong ol long kamapim ol pasin nogut i hat moa olsem aven. Long nait belhat bilong ol i olsem bikpela smuk bilong paia na long moning taim em i lait i go antap olsem lait bilong paia. ⁷ Ol i hat tumas olsem aven na ol i save kilim dai ol hetman bilong ol. Olgeta king bilong ol i dai pinis na i nogat man i save singaut long mi. ⁸ Efraim i go i kam na poromanim ol planti kantri. Efraim i olsem wanpela bret ol i no kukim gut. ⁹ Ol man bilong narapela hap i daunim strong bilong em pinis na em yet i no save long dispela. Em i lapun pinis na em yet i no save long dispela. ¹⁰ Pasin bilong ol Israel long apim nem bilong ol i kotim ol yet, ol i lukim dispela tasol ol i no tanim bel na kam bek long God Yawe, God bilong ol. ¹¹ Efraim i olsem balus pisin, tingting bilong em i no klia gut, olsem na em i singaut long Isip bai ol i helpim em na bihain ol i flai i go long Asiria bai ol i helpim ol. ¹² Taim ol i go, bai mi tromoi umben bilong mi long ol na kisim ol olsem ol pisin long skai na bai mi mekim save long olgeta wantaim. ¹³ Bai ol i bagarap, long wanem ol i go longwe long mi pinis. Bikpela bagarap bai kamap long ol. Mi laik helpim ol, tasol ol i bikhet na sakim tok bilong mi na giamanim mi. ¹⁴ Ol i no beten long mi wantaim olgeta bel bilong ol, ol i slip long bet tasol na krai sori. Ol i givim baksait long mi long pasin bilong bung wantaim long mekim ol ofa long wit na wain na mekim giaman lotu long god giaman. ¹⁵ Mi yet i bin skulim ol long pait na givim strong long ol, tasol ol i pasim tok long mekim nogut long mi. ¹⁶ Ol i gat hevi ol i save kam long mi, tasol ol i no kam long mi, God Antap Tru. Ol i olsem bunara i slek pinis. Ol ofisa bilong ol i save mekim ol tok nogut tru, olsem na ol bai dai long bainat. Long Isip bai ol i mekim dispela tok long ol na tok pilai na lap.