¹ Taim God Yawe i kisim yupela i go long graun bai yupela i kisim, em bai rausim olgeta manmeri bilong planti kantri em ol Hit, ol Girgas, ol Amor, ol Kenan, ol Peres, ol Hivi na ol Jebus ol 7-pela kantri i bikpela tru na winim strong bilong yupela. ² Em God Yawe bilong yupela i givim ol dispela graun long yupela taim yupela i winim pait, na yupela i mas bagarapim olgeta manmeri bilong ol dispela kantri. Yupela i noken mekim kontrak wantaim ol, na yupela i noken soim marimari long ol. ³ Na yupela i no ken marit wantaim ol. Yupela i noken givim pikinini meri bilong yupela na givim i go long pikinini man bilong ol, na yupela i noken kisim ol pikinini meri bilong ol na givim i go long pikinini man bilong yupela.. ⁴ Taim yupela i mekim olsem, ol bai i pulim ol pikinini man bilong yupela i go longwe long mi na bai ol i lotu long ol arapela god giaman. Olsem na ol bai kirapim bel hevi long God Yawe i go long yupela na bai em i bagarapim yupela hariap tru. ⁵ Yupela bai mekim olsem long ol. Bai yupela brukim daun ol alta bilong ol, ol ston pos bai yupela i brukim i go liklik liklik, katim na daunim ol Aseria pos bilong ol, na kukim ol giaman god ol i wokim long silva na gol. ⁶ Yupela i manmeri God Yawe i makim bilong em yet. Em i makim yupela long kisim ol dispela graun, em i no makim ol arapela manmeri i stap nambaut long dispela graun. ⁷ God Yawe i laikim yupela moa, i no long bikpela namba bilong yupela ol manmeri stap long en na winim namba bilong ol arapela manmeri nogat, yupela i liklik lain tru- ⁸ tasol em i lakim yupela, na em i laik yupela i bihainim ol tok promis em i bin pasim wantaim ol tumbuna papa bilong yupela. Olsem na God Yawe i kisim bek yupela long strongpela han bilong em long kalabus bilong Fero, king bilong Isip ⁹ Olsem na yupela i ken save God Yawe em i God bilong yupela em God i no save lusim tingting long ol kontrak maski planti yia i kam i go em bai tingim yet long ol manmeri i laikim em na bihainim ol lo bilong em ¹⁰ tasol em i save bekim pei nogut long ol manmeri husait ol i no laikim em, em i save bagarapim ol, em i no inap marimari long ol ¹¹ Yu bai bihainim ol lo bilong em , nau mi tokim yu long en, bai yu i ken mekim olsem. ¹² Sapos yu harim ol dispela lo, na bihainim na mekim, orait God Yawe bilong yu bai holim strong kontrak em i bin mekim wantaim ol tumbuna papa bilong yu. ¹³ Em bai i laikim yu, em bai i blesim yu, em bai i mekim yu i karim planti pikinini, ol bulmakau, meme, sipsip bai kamap planti long dispela graun bipo God Yawe i promis long givim long ol tumbuna papa bilong yu. ¹⁴ Bai yu kisim moa blesing i winim ol arapela manmeri; olgeta man o meri namel long yu bai i karim ol pikinini, ol bulmakau sipsip na meme bilong yu tu bai i karim planti. ¹⁵ God Yawe bai rausim na pinisim olgeta sik; satan i no inap putim ol sik nogut antap long yupela olsem em i save mekim long yu long Isip, tasol em bai putim ol dispela sik antap long ol manmeri husat i bel nogut long yu. ¹⁶ Yu bai pinisim tru ol manmeri God Yawe bilong yu bai i givim i go long yu, na bai yu i no inap pilim sori long ol. Bai yu i no inap lotu long ol giaman god bilong ol, nogut ol wokim trap long pulim yu i go long sait bilong ol. ¹⁷ Sapos yu tokim insait long bel bilong yu olsem, Namba bilong ol manmeri bilong ol dispela kantri i planti tru na i winim namba bilong mi, olsem wanem na bai mi pinisim ol? ¹⁸ yu noken pret long ol, yu i ken tingim i go bek long taim God Yawe bilong yu i bin mekim wanem long Fero na ol Isip; ¹⁹ yu lukim pinis long ai bilong yu yet, bikpela bagarap tru ol Isip i bin kisim, yu i lukim pinis ol strong bilong God Yawe na em bai i mekim wankain pasin long ol dispela lain. Yu no ken pret. ²⁰ God Yawe bilong yupela bai i salim ol binatang honet i go i kam namel long ol moa yet, i go inap ol i painim husait i stap laip yet na husait ol i hait long yupela na stap, bai ol i pinisim ol olgeta. Bai yupela i no inap lukim pes bilong ol moa. ²¹ Yu noken pret long ol, long wanem God Yawe bilong yu i stap namel long yu, em God i gat bikpela strong na ol man i save pret nogut tru long em. ²² God Yawe bilong yupela bai rausim ol kantri isi isi i go aut. Yupela i no inap kilim ol na pinisim ol long wanpela dei tasol o nogut ol wel animol bai kamap planti na raunim yupela. ²³ Tasol God Yawe bilong yupela bai i pait long ol na mekim yupela i winim pait taim yupela i stap long ples bilong pait, em bai i paulim tingting bilong ol nogut tru inap yupela i kilim ol na pinisim ol olgeta. ²⁴ Em bai i putim ol king bilong ol i kam aninit long strong bilong yu, na bai yu kilim ol i dai na pinisim tru nem bilong ol long dispela graun. Nogat wanpela man inap long sanap long pes bilong yu, inap yupela i kilim ol olgeta. ²⁵ Yu bai i kukim ol giaman god na yu noken mangal long ol silva o ol gol ol i karamapim bodi bilong ol god giaman na kisim ol olsem bilong yu yet, long wanem sapos yu i kisim, bai yu kam insait long kalabus bilong ol em i samting nogut tru long ai bilong God Yawe bilong yupela. ²⁶ Yupela i no inap kisim god giaman i go insait long haus bilong yupela na lotu long em. Bai yu i bagarapim ol nogut tru long wanem ol dispela god giaman ol i makim pinis na stap long bagarap tasol.