¹ Dispela em ol lo na tok bilong God Yawe i tokim mi long skulim yupela; olsem yupela mas bihainim dispela tok na bai yupela kisim promis graun bilong yupela long hap bilong wara Jodan. ² Olsem yupela mas aninit long God Yawe, na bihainim olgeta tok na lo mi givim yupela, ol pikinini bilong yupela, ol pikinini bilong ol pikinini bilong yupela long taim yupela i stap laip. Olsem na bai yupela i stap longpela taim. ³ Olsem na yupela mas harim olgeta toktok bilong mi, Israel na lukautim na em bai i lukautim yupela na bai yupela kamap i bikpela na planti, long graun i pulap long milk na hani, olsem God Yawe bilong ol papa bilong yupela, em i bin mekim promis long yupela long em. ⁴ Harim, Israel, God Yawe em tasol i God. ⁵ Yupela mas laikim God Yawe bilong yupela long bel bilong yupela, na long tingting bilong yupela, na long strong bilong yupela. ⁶ Ol toktok bilong mi nau mi tokim yupela bai stap long bel bilong yupela, ⁷ na yupela i mas skulim ol pikinini bilong yupela gut long olgeta tok, yupela mas tokim ol taim yupela i stap long haus, taim yupela wokabaut long rot, taim yuapela sindaun na taim yupela sanap. ⁸ Yupela mas pasim olsem mak long han na em bai i stap olsem mak namel long tupela ai bilong yupela. ⁹ Yupela mas raitim olgeta tok long dua bilong haus na long dua bilong banis. ¹⁰ Taim God Yawe i bringim yupela i go insait long graun em i bin promis long ol papa bilong yupela, em Abraham, Aisak na Jekop olsem em bai i givim yupela bikpela na gutpela biktaun long yupela i no bin wokim, ¹¹ na haus bai pulap long kainkain gutpela samting, ol hul wara yupela no bin digim na tu ol gaden wain na diwai oliv yupela no bin planim, olsem tasol bai yupela i kaikai na pulap ¹² nau yupela mas lukaut gut, yupela no ken lusim tingting long God Yawe, husat i kisim yupela i kam aut long Isip, ples yupela i bin kalabus long em. ¹³ Yupela mas i stap aninit long God Yawe, God bilong yupela na lotu long em, tokaut long nem bilong em. ¹⁴ Yupela no ken i go bihainim ol arapela god, dispela em i god bilong ol manmeri i stap klostu long yupela, ¹⁵ God Yawe em God bilong yupela i stap namel long yupela em belhat God, sapos yupela mekim olsem, em bai i belhat long yupela na bagarapim yupela wantaim olgeta samting i stap long graun. ¹⁶ Yupela no ken traim God Yawe bilong yupela, olsem yupela i bin traim em long ples Masa. ¹⁷ Yupela mas lukautim gut olgeta lo bilong God Yawe bilong yupela, wantaim ol lo em i bin givim, ol tok lukaut em i bin givim wantaim yupela. ¹⁸ Yupela i mas mekim gutpela pasin na stap stret long ai bilong God Yawe, olsem ol samting yupela i mekim bai i go gut na God bai i givim dispela graun em i bin promis long givim long ol papa bilong yupela, ¹⁹ long i go pas long yupela na daunim ol birua bilong yupela, olsem God Yawe i tok. ²⁰ Taim ol pikinini bilong yupela i askim yupela na i tok, ''Wanem kontrak, ol lo na arapela tok God i bin pasim wantaim yupela? ²¹ Nau yupela bai tokim ol pikinini bilong yupela olsem, 'mipela i bin stap wokboi bilong Fero long Isip, God Yawe i bringim mipela kam aut long Isip long strongpela han bilong em, ²² na em i kamapim bikpela samting na soim strong bilong em long ol Isip, long Fero na long haus bilong em, long ai bilong mipela, ²³ em i rausim mipela long hap na em i bringim mipela i kam insait. Em i laik givim dispela graun em i bin promis long givim ol tumbuna bilong mipela. ²⁴ God Yawe i tokim mipela long oltaim mipela i mas bihainim ol lo bilong em na pret long God Yawe wantaim gutpela bilong yumi, olsem na em bai mekim yumi stap laip wankain olsem yumi stap nau. ²⁵ Sapos yumi bihainim olgeta dispela lo bilong God Yawe, na aninit long ol tok em i bin mekim wantaim yumi, dispela bai i kamap stretpela pasin bilong yumi.