¹ Moses i singaut long olgeta Israel na tokim ol, "Harim yupela Israel, long ol bikman na liklik manmeri olsem bai mi toktok long ia bilong yupela nau, olsem bai yupela i lainim na bihainim. ² God Yawe bilong yumi bin mekim kontrak wantaim yumi long Horeb. ³ God Yawe ino mekim kontrak wantaim ol tumbuna bilong yumi, tasol wantaim ol lain yumi stap laip nau. ⁴ Antap long maunten, God Yawe i bin lukuk long pes bilong yu na i toktok wantaim yu long namel bilong paia. ⁵ Mi sanap namel long God Yawe na yupela long dispela taim long tokaut long ol toktok, long wanem yupela bin pret long paia na i no go antap long maunten, God Yawe i tok.. ⁶ ''Mi, Yawe God bilong yupela husait bringim yupela long graun bilong Isip long banis bilong kalabus. ⁷ Yupela bai i no nap holim arapela god olsem mi. ⁸ Yupela bai i no inap sapim ol samting o mekim ol samting long heven antap o long graun na aninit long wara. ⁹ Yupela bai no inap brukim skru na lotu long ol long wanem, Mi, God Yawe bilong yupela mi God bilong belhat, Mi bai bringim bagarap long ol tumbuna bilong yupela na putim hevi antap long ol na long namba tripela na 4-pela lain tumbuna bihain, ¹⁰ na soim strongpela strongpela laikim long tausen manmeri, dispela em ol husat i laikim mi na holim ol lo bilong mi. ¹¹ Yupela noken kolim nating nem bilong Yawe, God bilong yupela, long wanem God Yawe i no nap kisim nem nogut long giaman pasin. ¹² Mekim dei Sabat i holi, olsem God Yawe bilong yupela i tok long en. ¹³ Insait long 6-pela dei yupela mas mekim olgeta wok, ¹⁴ tasol namba 7 dei em Sabat bilong Yawe God bilong yupela, long dispela dei bai yupela i no nap mekim arapela wok, ol pikinini man, pikinini meri, wokman, wokmeri,bulmakau, ol donki o arapela abus na arapela lain bilong longwe i stap wantaim yupela, bai ol i malolo wankain olsem yupela. ¹⁵ Yupela bai save olsem yupela bin stap kalabus long graun bilong Isip na God Yawe bilong yupela bin kisim bek yupela wantaim strong bilong em olsem na Yawe God bilong yupela i tokaut long yupela i mas tingim dei Sabat. ¹⁶ Daunim yupela yet aninit long tok bilong papa na mama bilong yupela olsem God Yawe bilong yupela i tok long en, bai yupela i stap longpela taim long dispela graun we God Yawe God bilong yupela i tok long en na bai olgeta samting i kamap gutpela. ¹⁷ Yupela bai no inap kilim man i dai. ¹⁸ Yupela bai no inap mekim pasin pamuk. ¹⁹ Yupela bai no inap stil. ²⁰ Yupela bai no inap mekim giaman tok na sutim tok long wantok bilong yupela. ²¹ Yupela bai no inap aigris long ol meri bilong wantok bilong yupela, haus bilong en, gaden bilong en, wokman na wokmeri bilong en, bulmakau na donki bilong en, o ol arapela samting bilong en. ²² Dispela ol toktok God Yawe bin bikmaus long ol manmeri antap long maunten long namel bilong paia, klaut na bikpela tudak. Em i no bin mekim arapela moa toktok tasol em i raitim long tupela ston na givim long mi. ²³ Em bin kamap taim yupela bin harim nek bilong em namel long tudak, taim maunten bin paia na yupela bin kam klostu long mi wantaim olgeta bikman na hetman bilong olgeta lain bilong yupela. ²⁴ Yupela tok, 'Lukim, God Yawe bilong yumi i soim glori na strong bilong en na mipela bin harim nek bilong en namel long paia, mipela i lukim tudei God i toktok wantaim ol manmeri bilong en, ol i ken stap laip. ²⁵ Olsem na bilong wanem bai yumi i dai? nogut dispela bikpela paia i kukim yumi, sapos yumi i harim nek bilong Yawe God bilong yumi gen bai yumi i dai. ²⁶ Husait moa i stap klostu long yumi namel long ol manmeri na i bin harim nek bilong God i gat laip namel long paia na stap olsem mipela mekim. ²⁷ Olsem long yu, yu mas go na harim olgeta tok Yawe, God bilong yumi i tok, yu tokim mipela gen olgeta samting God Yawe bilong mipela i tok long en bai mipela i harim na bihainim. ²⁸ God Yawe i harim nek bilong yupela taim yupela i toktok long mi, Em tok olsem em i harim tok bilong ol manmeri pinis na em i amamas long gutpela tok ol manmeri i mekim. ²⁹ Olsem ol i givim bel na lotu long mi, bihainim olgeta lo bilong mi, bai olgeta samting i kamap gut long ol na pikinini bilong ol oltaim, oltaim. ³⁰ Go na tokim ol olsem, "Go bek long haus sel bilong yupela." ³¹ Tasol long yu, sanap hia klostu long mi na bai mi tokim yu long olgeta lo, tok bilong strongim na tok bilong banisim bai yu skulim ol bai ol i holim na stap long graun mi bai givim long ol . ³² Yupela bai bihainim olsem God Yawe bilong yupela i tokim yupela long en, yupela noken tanim long han sut o long han kais. ³³ Yupela bai wokabaut insait long olgeta pasin God Yawe bilong yupela i tokim yupela long en. Olsem na bai yupela i stap oltaim na olgeta samting bai kamap stret wantaim yupela na bai yupela i stap longpela taim long graun yupela i kisim long en.