¹ Yupela no ken lukim na larim bulmakau o sipsip bilong ol Israel ol wantok bilong yupela i go lus, sapos yupela lukim olsem em i lus, orait yupela i mas kisim i go bek long ol. ² Sapos wantok bilong yupela long Israel em i no stap klostu long yupela, o sapos yupela no save long em, orait, yupela i mas kisim dispela animol i go long haus bilong yupela na i stap wantaim na sapos em i painim i kam, orait yupela mas givim i go bek long em. ³ Yupela i mas mekim wankain tu wantaim donki bilong em na yupela i mas mekim wankain wantaim ol klos bilong em, yupela mas mekim wankain wantaim olgeta samting i lus long ol lain wantok bilong yupela Israel, wanem samting i lus na yupela i painim, no ken kisim na haitim. ⁴ Yupela i no ken lukim donki o bulmakau bilong ol wanlain Israel i pundaun long rot na yupela i noken lukim na larim, nogat yupela i mas helpim long apim em gen. ⁵ Wanpela meri i no ken putim klos bilong ol man na ol man i no ken putim ol klos bilong ol meri, ol dispela manmeri i mekim pasin i no stret long ai bilong God Yawe God bilong yupela ⁶ Sapos wanpela mama pisin i slip long haus bilong en long rot, long han bilong diwai o long graun, wantaim pikinini o kiau i stap long en na mama pisin i sindaun antap long pikinini o long kiau, yupela i noken rausim mama wantaim ol pikinini. ⁷ Yupela mas larim mama i go na kisim ol pikinini tasol. Bihainim dispela lo na bai em i gutpela long yupela na bai dei bilong yupela bai i stap longpela taim long graun. ⁸ Taim yupela i wokim nupela haus, yupela mas banisim het bilong haus bilong yupela gut, nogut man i stap antap i pundaun na i kisim bagarap na blut i pas long haus. ⁹ Yupela no ken planim tupela kain pikinini kaikai long gaden wain bilong yupela, bai olgeta kaikai i redi no inap bagarap insait long haus holi, em ol pikinini kaikai yupela i planim na kaikai gaden wain i kamapim. ¹⁰ Yupela i no ken bungim bulmakau wantaim donki long brukim graun. ¹¹ Yupela i no ken putim ol klos ol i wokim long gras bilong sipsip na ol narapela samting wantaim. ¹² Yupela i mas bilasim olgeta 4pela hap bilong ol laplap yupela i save karamapim olsem klos bilong yupela. ¹³ Sapos man i maritim wanpela meri na i slip wantaim em, tasol bihain em i mekim nogut long em ¹⁴ na i sutim tok giaman long pasin bilong em long semim em na i tok, "Mi maritim dispela meri, tasol mi stap wantaim em na mi painim aut olsem em i no yangpela meri." ¹⁵ Orait papamama bilong meri i ken kisim em i go long ol hetman long banis bilong taun na tokim ol olsem tru em i yangpela meri. ¹⁶ Papa bilong pikinini meri i mas tokim ol hetman olsem, mi givim pikinini bilong mi olsem meri bilong em, tasol em i no laikim em. ¹⁷ Lukim, em i bin sutim tok long em long semim em tasol na i tok, "pikinini bilong yu i no yangpela meri."Tasol mi tokaut olsem em i yangpela meri. Na bihain bai ol i kisim laplap na karamapim em long ai bilong ol hetman bilong taun. ¹⁸ Ol hetman bilong dispela taun i mas kisim dispela man na putim em long kalabus, ¹⁹ na ol i mas tokim em long baim 100 kina silva mani long papa bilong meri, long em i bin sutim tok giaman long em, na bagarapim gutpela nem bilong yangpela meri Israel. Em i mas kisim em olsem meri bilong em na em i noken salim em i go nambaut long ol dispela dei. ²⁰ Tasol sapos dispela i tru olsem dispela yangpela meri i bin slip wantaim wanpela man, ²¹ nau ol mas bringim meri i kam ausait long dua bilong haus bilong papa bilong em na ol man bilong taun i mas tromoi ston long meri long kilim em, long wanem em i no mekim gutpela pasin insait long haus bilong papa na long ol lain Israel, olsem na bai yupela i rausim dispela pasin nogut i stap namel long yupela. ²² Sapos ol i painim aut olsem wanpela man i slip wantaim wanpela marit meri, orait dispela tupela manmeri wantaim i mas i dai na bai yupela i rausim dispela pasin nogut i stap namel long yupela. ²³ Sapos wanpela yangpela meri i no bin slip wantaim man ol i bin makim pinis bilong wanpela man na narapela man i painim em long taun na slip wantaim em, ²⁴ kisim tupela i go long dua bilong banis bilong taun na kilim tupela i dai long ston.Yupela mas tromoi ston long meri, long wanem em i stap long taun na i no bikmaus. Yupela i mas tromoi ston long man tu long wanem, em i mekim pasin nogut long meri bilong wantok bilong em na bai yupela rausim dispela pasin nogut i stap namel long yupela. ²⁵ Tasol sapos wanpela man i painim wanpela meri ol i bin makim pinis long maritim narapela man i stap ausait long taun i nogat man i stap long en, orait yupela i mas tromoi ston long dispela man husait i slip wantaim em i mas i dai. ²⁶ Tasol i no ken mekim wanpela samting long meri, i nogat asua bilong sin inap long mekim em i dai. Dispela pasin em i wankain olsem man i kirap long kilim wantok bilong em i dai. ²⁷ Man i painim wanpela yangpela meri long ples klia, ol i makim bilong maritim wanpela man na meri i bikmaus, tasol i no gat wanpela i stap klostu long helpim em. ²⁸ Tasol sapos wanpela man i lukim wanpela yangpela meri i no bin slip wantaim man we ol i no makim yet long wanpela man na em i holim dispela meri na i slip wantaim em na ol i painim aut, ²⁹ orait man i slip wantaim em i mas givim 50 kina silva mani long papa bilong meri na kisim em olsem meri bilong em, long wanem em i bin bagarapim nem bilong em, olsem na em i mas i stap wantaim dispela meri i go inap long em i dai. ³⁰ Wanpela man i no ken kisim meri bilong papa bilong em olsem meri bilong em yet, em i no ken rausim meri bilong papa bilong em.