¹ Man husait i katim em yet o kisim bagarap long bodi bilong em bai no inap kam long bung bilong God Yawe. ² Ol narapela pikinini bilong Israel bai no inap stap long bung bilong God Yawe, i go inap long namba 10 tumbuna lain bilong ol. Nogat wanpela bilong ol bai inap stap long bung bilong God Yawe. ³ Wanpela bilong lain Amon o Moap bai no inap stap long bung bilong God Yawe. Dispela bai i go kamap long namba 10 tumbuna lain bilong en. Nogat wanpela bilong ol bai i stap long bung bilong God Yawe. ⁴ Em long wanem na ol i no bin givim wara na kaikai samting taim yupela i kamaut long Isip na tu ol i bin baim Balam, pikinini bilong Beo long Peto insait long Aram Naharaim long bagarapim yupela. ⁵ Tasol God Yawe bai i no inap harim tok bilong Balam, long wanem God Yawe i tanim nogut i kamap blesing long yupela long wanem God Yawe i laikim yupela tumas. ⁶ Yupela i noken askim ol long bel isi o gutpela sindaun, taim yupela i stap. ⁷ Yupela i noken traim long tok pait wantaim ol Idom, em ol brata bilong yupela na yupela i noken givim haus long ol Isip, long wanem yupela i bin stap narapela lain manmeri long kantri na graun bilong ol. ⁸ Namba tri lain tumbuna bilong ol i ken stap lain bilong God Yawe. ⁹ Taim yupela wokabaut i go aut olsem ol ami bilong pait long ol birua, orait yupela i mas stap longwe long olgeta kain pasin nogut. ¹⁰ Sapos namel long yupela wanpela man em i no stap klin long wanem samting i kamap long em long nait, orait em i mas go aut long kem bilong ol ami na em i noken kam bek long kem ¹¹ Taim apinun i kam, em i ken go insait long wara na waswas olgeta, taim san i go daun, em i ken kam bek gen insait long kem. ¹² Yupela i mas i gat wanpela ples autsait long kem, long dispela hap bai yupela i go ¹³ na bai yupela i gat samting olsem tul bilong digim wantaim, taim yupela i go daun long pispis o pekpek, yupela i mas digim na karamapim wanem samting yupela i rausim long bodi wantaim graun. ¹⁴ Long wanem God Yawe bai wokabaut namel long kem bilong yupela na givim yupela strong long winim ol birua na givim ol long han bilong yupela, olsem na kem bilong yupela i mas i stap klin, bai em i no ken lukim samting i no klin i stap namel long yupela na bai givim baksait long yupela. ¹⁵ Yupela i noken givim i go bek long bosman wanpela wokboi nating husait i bin ranawe long bosman bilong em. ¹⁶ Larim em i stap wantaim yupela long wanem taun em i laik i stap long en.Yupela i noken tok pait na kros wantaim em. ¹⁷ Em bai i nogat pamuk meri i stap namel long ol pikinini meri bilong ol Israel na tu i noken larim pamuk man i stap namel long ol pikinini man bilong Israel. ¹⁸ Yupela i noken bringim pasin pamuk o pasin bilong wanpela dok i kam insait long haus bilong God Yawe na mekim ol promis, dispela em ol samting nogut tru long ai bilong God Yawe. ¹⁹ Yupela i noken givim samting namel long yupela Israel na askim long profit moni o sampela kaikai moa o askim long sampela samting moa antap long samting yupela i givim. ²⁰ Long ol man long arapela kantri i stap wantaim yupela, yupela i ken givim moni long kisim win moni, tasol ol lain bilong yupela Israel yupela i noken givim moni long kisim win moni, olsem na bai God Yawe i mekim gut long yupela long olgeta samting yupela i mekim long han bilong yupela long dispela graun yupela bai i kisim long en. ²¹ Taim yupela i wokim promis wantaim God Yawe bilong yupela, yupela i mas hariap long inapim promis yupela i mekim wantaim em, long wanem em bai i wet long kisim. Yupela bai i stap wantaim sin, sapos yupela i no mekim olsem. ²² Tasol sapos yupela i lusim pasin bilong wokim promis, bai yupela i no inap mekim sin. ²³ Wanem tok i kam aut long maus bilong yupela, yupela i mas lukim na mekim long inapim promis bilong yupela long God Yawe long ol wanem samting yupela i bin promis long maus bilong yupela. ²⁴ Taim yupela i go insait long gaden wain bilong wantok i stap klostu long yupela, yupela i ken kaikai planti frut greip yupela i laik, tasol yupela i no ken pulimapim sampela long bilum. ²⁵ Taim yupela i go insait long gaden bilong wantok bilong yupela i redi pinis, yupela i ken rausim het bilong sid na grein long han bilong yupela, tasol yupela i noken putim naip long gaden bilong wantok bilong yupela i redi pinis.