¹ Em i kamap klostu long pinis bilong 20-pela yia, Solomon i wokim pinis haus bilong God Yawe na haus bilong em yet, ² orait Solomon i kamapim gen ol taun Hiram i bin givim long em na em i putim ol manmeri bilong Israel insait long ol. ³ Solomon i pait wantaim ol Amatsoba na i daunim ol. ⁴ Em i wokim Tadmor long ples nating na ol biktaun bilong putim ol samting ,em ol haus em i wokim long Hamat. ⁵ Em i wokim tu Bet Horon long antap na Bet Horon long ples daun na ol dispela biktaun i gat strongpela banis na ol bikpela dua na ol ain banis wantaim. ⁶ Em i wokim taun Balat na ol biktaun bilong putim ol samting bilong em na ol biktaun bilong putim ol karis, ol taun bilong ol man i save sindaun long ol hos na ol wanem kainkain samting em i wokim long amamas bilong em yet long Jerusalem long Lebanon na long ol ples em i lukautim long en. ⁷ Long olgeta manmeri husait i bin i stap bek long lain bilong ol Hit, ol Amor na ol Peris, ol lain Hivi na ol lain Jebus, husait i no bilong ol lain Israel, ⁸ ol tumbuna pikinini lain husait i stap bek long ples em ol husait ol lain Israel i no bin bagarapim ol. Solomon i mekim ol i kamap wokman nating olsem na ol i save mekim wok i kam inap nau. ⁹ Tasol Solomon i no mekim ol manmeri bilong ol Israel i kamap wokman nating. Tasol ol i kamap ol soldia bilong ol lida bilong ol ofisa na ol man i go pas long ol karis na ol man i save raun long ol hos. ¹⁰ Dispela em ol hetman bilong ol man i go pas na i save bosim ol na skelim wok bilong King Solomon, namba bilong ol dispela man i kamap olsem 250-pela olgeta. ¹¹ Solomon i kisim pikinini meri bilong king Fero i go autsait long biktaun bilong Devit na putim em long haus em yet i bin wokim long en. Em i tok, "Meri bilong mi i no inap i stap long haus bilong Devit, king bilong ol Israel, long wanem bokis kontrak bilong God Yawe i stap long en, dispela ples em i holi." ¹² Orait bihain, Solomon i mekim ofa bilong kukim long paia i go long God Yawe long alta em yet i wokim klostu long dua bilong haus lotu . ¹³ Em i mekim ofa bilong kukim long paia olgeta olsem wok long wanwan dei. Em i bihainim wanem lo bilong Moses i tok long ol Sabat dei, long taim bilong ol nupela mun na ol bikpela bung long tripela taim ol i makim long wanwan yia. Em ol bung bilong bret i no gat yis na bung bilong amamas long kaikai na bung bilong i stap long haus sel. ¹⁴ Long bihainim lo bilong papa bilong em Devit, Solomon i makim ol hap ol pris i mas wok long en na putim ol Livai long ol wok mak bilong ol olsem ol i mekim olsem long litimapim nem bilong God na mekim wok bilong ol pris olsem wok mak bilong wanwan dei. Em tu makim ol man bai i was long wanwan dua long wanwan dei olsem Devit wokman bilong God i bin tok. ¹⁵ Dispela manmeri i no givim baksait long tok bilong king o ol pris na ol Livai i mekim o long wanem kain samting i kamap long ol haus bilong putim ol samting. ¹⁶ Olgeta wok Solomon i tok long ol i mas mekim em i pinis long taim ol i kamapim wok bilong haus bilong God Yawe i go inap long taim ol i pinisim wok. Olgeta wok long haus bilong God Yawe i pinis olgeta. ¹⁷ Orait Solomon i go long Esion Geba na bihain em i go long Elat, em nambis long graun bilong Idom. ¹⁸ Hiram i salim long em, ol ofisa bilong em yet i likautim sip i go long Solomon, ol man i save long solwara na wantaim wokman bilong Solomon ol i go long kantri Ofir na long hap ol kisim 16-ton gol na kisim i kam long King Solomon.