¹ Nau taim Solomon i beten pinis, paia i kam daun long heven na i kukim olgeta ofa bilong paia na glori bilong God Yawe i pulap insait long haus lotu. ² Glori i pulap long haus lotu bilong God Yawe na ol pris i no inap i go insait long en. ³ Taim ol manmeri bilong Israel i lukim paia i kam daun na glori bilong God Yawe i karamapim haus lotu, ol i brukim skru na putim het bilong ol i go daun long graun antap long ples ston bilong wokabaut na lotu na tok tenkyu long God Yawe. Ol i tok, "Long wanem em i gutpela na laikim bilong em bai i stap oltaim oltaim." ⁴ Olsem na king wantaim olgeta manmeri i mekim ofa i go long God Yawe. ⁵ King Solomon i kisim 22 000 bulmakau na 120, 000 sipsip na memek na mekim ofa. Olsem na king wantaim olgeta manmeri i makim dispela haus em i bilong God stret. ⁶ Ol pris i sanap long hap na ol Livai tu i sanap wantaim ol samting bilong mekim musik i go long God Yawe, em ol dispela musik samting Devit i bin mekim long givim tenkyu long God Yawe insait long dispela song, "Long wanem laikim bilong em i save i stap oltaim oltaim. "Olgeta manmeri i sanap i stap na ol pris i winim biugel. ⁷ Solomon i makim wanpela hap graun i stap namel long ples bilong bung long pes bilong haus bilong God Yawe. Long dispela hap em i mekim ofa bilong ofa ol i kukim olgeta long paia na gris bilong mekim wanbel ofa, long wanem alta bras i liklik tumas long holim ol ofa bilong kukim olgeta long paia, wanbel ofa na ol gris. ⁸ Olsem na Solomon i mekim bikpela kaikai long dispela taim inap long 7-pela dei na olgeta Israel i stap wantaim em, ol bikpela lain manmeri i stat long Lebo Hamat i go inap long liklik wara bilong Isip. ⁹ Long namba 8 dei ol i bung wantaim, long wanem ol i stap 7-pela dei moa long makim alta i kamap bilong God na kaikai bilong 7-pela dei. ¹⁰ Long namba 23 dei bilong namba 7 mun, Solomon i salim ol manmeri i go bek long ples bilong ol wantaim bel amamas bilong wanem God Yawe i bin mekim gut long Devit, Solomon wantaim ol manmeri bilong em, Israel. ¹¹ Olsem na Solomon i pinisim haus bilong God Yawe na haus bilong em yet. Olgeta samting insait long bel na tingting bilong Solomon em bilong mekim haus bilong God Yawe na haus bilong em yet, em i bin inapim tru. ¹² God Yawe i kamap ples klia long Solomon long nait na i tokim em, "Mi bin harim beten bilong yu na mi bin makim pinis dispela ples bilong mi yet olsem haus bilong mekim ofa. ¹³ Sapos mi pasim heven na i nogat ren o sapos mi tokim ol bikpela grashopa long bagarapim graun o sapos mi salim sik long ol manmeri bilong mi, ¹⁴ na sapos ol manmeri bilong mi, husait i save kolim nem bilong mi bai i daunim ol yet, beten na painim pes bilong mi na givim baksait long ol sin bilong ol, mi bai harim long heven na lusim sin bilong ol na mekim graun bilong ol i gutpela gen. ¹⁵ Nau ai bilong mi bai i op na yau bilong mi bai harim beten i kamap long dispela ples.. ¹⁶ Long wanem mi makim pinis na putim em olsem haus bilong mi stret bai nem bilong mi bai i stap long en oltaim oltaim. Ai bilong mi na bel bilong mi bai i stap long en olgeta dei ¹⁷ Olsem long yu ,sapos yu wokabaut stret insait long ol pasin em i stret olsem papa bilong yu Devit na bihainim olgeta toktok mi bin tokim yu na lukautim ol lo bilong mi. ¹⁸ orait mi bai mekim strong sia bilong kingdom bilong yu, olsem mi bin tok insait long kontrak wantaim Devit papa bilong yu, taim mi tok, ' Wanpela tumbuna bilong yu bai i no inap pundaun long stap king oltaim long Israel. ¹⁹ Na sapos yu givim baksait na i no bihainim ol tok na ol lo mi i givim yu na sapos yu go lotuim ol giaman god na brukim skru long ol, ²⁰ orait mi bai kamautim ol long graun bilong mi na mi bai givim ol. Dispela haus mi bin makim bilong nem bilong mi bai mi rausim long pes bilong mi na mi bai i mekim em olsem wanpela stori bilong tingim tasol o stori bilong lap namel long ol manmeri. ²¹ Olsem tasol dispela haus lotu i gat biknem nau, olgeta manmeri husait i wokabaut i kam olsem bai kirap nogut na mekim ol toktok i soim ol i no amamas. Ol bai askim, "Bilong wanem God Yawe i mekim olsem long dispela graun na haus lotu?" ²² Ol arapela bai i bekim, "Long wanem em bai kamap, bilong wanem ol i sakim tok bilong God Yawe, God bilong ol husait i kisim ol tumbuna bilong ol i kam aut long Isip tasol ol i holim ol arapela giaman god na brukim skru na lotuim ol. Olsem na God Yawe i kisim ol dispela bagarap i kamap antap long ol."'