¹ Josaia i bin holim pasova i go long God Yawe insait long Jerusalem na ol i bin kilim pikinini sipsip bilong pasova long dei 14 long namba wan mun. ² Em i bin putim ol pris long wanwan wokmak bilong ol na strongim ol wantaim gutpela toktok long wok insait long haus bilong God Yawe. ³ Em i bin tokim ol Livai, em ol lain husait i lainim ol Israel na tu em ol lain ol i bin makim ol olsem wokman bilong God Yawe. ''Putim dispela holi kontrak bokis insait long haus Solomon pikinini man bilong Devit king bilong Israel i bin wokim na noken moa karim raun. Nau lotu long God Yawe, God bilong yu na lukautim gut ol lain manmeri bilong Israel. ⁴ Bihainim ol toktok Devit, king bilong ol Israel wantaim pikinini man bilong em Solomon i bin raitim na stretim yupela long en, bihainim nem bilong tumbuna na wanwan hauslain. ⁵ Sanap long mak bilong yupela long ples em i holi, aninit long nem bilong wanwan tumbuna lain bilong ol brata bilong yupale na aninit long ol wanwan Livai. ⁶ Kilim ol pikinini sipsip bilong pasova na stretim yupela yet na redim ol pikinini sipsip long ol brata bilong yu, i bihainm tok God Yawe i bin givim long han bilong Moses.'' ⁷ Josaia i bin givim 30,000 pikinini sipsip na ol pikinini memek i go long ol manmeri long mekim ofa bilong pasova long ol lain husait i bin stap long dispela taim na em i bin givim bulmakau mak long 3000 na olgeta dispela ol samting i kam long ol samting king i bin i gat. ⁸ Ol lida bilong em i bin givim amamas ofa i go long ol manmeri, ol pris na ol Livai. Hilkia, Sekaraia na Jeiel, em ol ofisa i go pas long haus bilong God na ol i bin givim mak long 2,600 ol liklik bulmakau na 300 bulmakau i go long ol pris long mekim ofa bilong pasova. ⁹ Wankain olsem Konaia, Sameia na Netanel, ol brata lain na Hasabaia, Jeiel na Josabad, em ol hetman bilong ol Livai i bin givim 5,000 pasova ofa na 500 ol bulmakau i go long ol Livai. ¹⁰ Nau ol i redim lotu na ol pris i sanap long wanwan ples ol i bin makim long ol wantaim ol Livai na i bihainim tok king i bin givim. ¹¹ Ol Livai i bin kilim ol pikinini sipsip bilong pasova na rausim skin na ol i bin kisim blut i kam na givim long ol pris na ol pris i putim pinga bilong ol insait long blut na tromoi nabaut long rum i holi tru. ¹² Ol i rausim ol ofa ol i bin kukim pinis na givim i go long wanwan tumbuna hauslain long olgeta manmeri i ken givim ofa i go long God Yawe, bihainim wanem Moses i bin raitim na ol i bin mekim wankain long ol bulmakau. ¹³ Ol i bin bihainim toktok na kukim ol pikinini sipsip bilong pasova long paia na long ol ofa em i dia tumas, ol i bin kukim long ol liklik na bikpela sospen na hariap tru ol i karim i go long ol manmeri. ¹⁴ Na bihain ol i redim ol ofa bilong ol yet na bilong ol pris wantaim, long wanem ol pris em ol lain tumbuna bilong Aaron i givim ofa i go inap long tudak. Olsem na ol Livai i redim ofa bilong ol yet na bilong ol pris em ol lain bilong Aaron. ¹⁵ Ol lain bilong singsing, em ol tumbuna lain bilong Asap i kisim ples, bihainim toktok bilong Devit, Asap, Heman na Jedutun em ol lain bilong king husait i ken lukim ol samting bai i kamap bihain taim na ol wasman i bin stap sambai long olgeta bikpela dua na ol i no lusim hap ol i stap long en, long wanem ol brata bilong ol, ol Livai i bin redim ol ofa bilong ol wantaim. ¹⁶ Olsem na long dispela taim ol i holim lotu bilong God Yawe long tingim pasova na i givim ofa bilong kukim olgeta, i go long alta bilong God Yawe wankain olsem King Josaia i bin tok. ¹⁷ Na ol manmeri bilong Israel husait i bin stap long en, i bin holim pasova long dispela taim na ol i bin go het na holim dei bilong tingim Bret Inogat Yis na amamas inap long 7-pela dei. ¹⁸ Na kain pasova amamas i no bin kamap bipo long taim bilong profet Samuel na long ol narapela king bilong Israel wankain olsem King Josaia i bin holim wantaim ol pris, ol Livai, ol manmeri bilong Juda na Israel na ol lain bilong Jerusalem, husait i bin stap long dispela taim. ¹⁹ Ol i bin holim dispela pasova long namba 18 yia taim Josaia i bin i stap king. ²⁰ Na bihain long dispela, bihain long King Josaia i stretim haus bilong God, Neko, king bilong Isip, i bin go antap long pait wantaim ol lain Kakemis long Wara Ufreits na Josaia i bin go antap long pait wantaim em. ²¹ Tasol Neko i salim wokman i makim maus bilong em i go tokim em na tok, mi gat wanem samting long mekim wantaim yu, king bilong Juda? Mi no kam olsem birua bilong yu long dispela dei, nogat, mi kam long pait wantaim birua bilong mi. God i tokim mi long hariap, olsem na yu noken pasim God, husait i stap wantaim mi, nogut em bai bagarapim yu.'' ²² Tasol Josaia i bin les long harim tok bilong em na i haitim pes long go pait wantaim em. Em i no bin harim ol tok bilong Neko, tok i bin kam long maus bilong God, olsem na em i bin go long pait insait long ples daun long Megido ²³ Ol lain wantaim bunara i bin sutim em na em i tokim wokboi bilong em olsem,'' kisim mi go bek long wanem mi kisim bikpela bagarap.'' ²⁴ Na ol wokboi bilong em i bin rausim em long karis na putim em long namba tu karis bilong em. Ol i kisim em i go long Jerusalem na em i dai na ol i planim em long matmat bilong ol tumbuna bilong em. Olgeta lain Juda na Jerusalem i wari na krai long Josaia. ²⁵ Jeremaia i raitim wanpela song long Josaia. Olgeta lain i singsing, dispela song i kamap olsem pasin tumbuna bilong ol Israel na tu ol i raitim i go long ol song bilong tingim em bihain. ²⁶ Na ol narapela samting na ol gutpela pasin king Josaia i bin mekim i stap yet long wanem ol i bin raitim long lo bilong God Yawe ²⁷ na olgeta gutpela pasin bilong em long stat i go inap long pinis bilong en, ol i bin raitim long buk bilong ol king bilong Israel na Juda.