¹ Manase em i stap 12- pela yia na em kamap king bilong Jerusalem, em mekim dispela wok inap long 55 yia insait long Jerusalem. ² Em i mekim pasin nogut long ai bilong God Yawe, olsem ol nogut na bagarap samting bilong ol ples graun, God Yawe bin rausim i go aut long ai bilong ol manmeri bilong Israel. ³ Em i mekim ken ples lotu bilong ol giaman god, wanem papa bilong em Ezekia bin brukim na rausim long em na em mekim ples bilong givim ofa bilong god Bal, em i mekim piksa bilong god meri Asera na em i save brukim skru long ol sta bilong heven na lotu long ol. ⁴ Manase i mekim alta insait long haus bilong God Yawe, olsem God Yawe bin tokim ol, yupela i mas mekim olsem na biknem bilong mi i mas stap insait long Jerusalem. ⁵ Em i mekim ol alta bilong ol sta long heven long tupela hap insait long haus bilong God Yawe ⁶ Long stretpela hap ples bilong Ben Hinnom em i mekim ol pikinini bilong em long wokabaut antap long paia. Em i save mekim pasin bilong posin na sanguma na em i save toktok wantaim ol daiman na spirit nogut. Manase i mekim planti pasin nogut stret long ai bilong God Yawe na mekim em long belhat. ⁷ Piksa bilong giaman god em i mekim long ol diwai na em i putim insait long haus bilong God. Insait long dispela haus tasol God i bin toktok long Devit na pikinini bilong em Solomon olsem insait long dispela haus na long Jerusalem, mi bin makim bilong olgeta manmeri bilong ples Israel long kam lotu long mi. ⁸ Mi i no inap long rausim ol manmeri bilong Israel i go autsait long dispela graun mi bin givim pinis long tumbuna bilong ol, sapos ol i bihainim gut olgeta strongpela tok bilong mi i stap long lo buk mi bin givim long Moses. ⁹ Manase i go pas long ol Juda na ol lain bilong Jerusalem long mekim pasin nogut stret antap tru long olgeta narapela ples long graun God Yawe bin bagarapim ol long ai bilong manmeri bilong Israel. ¹⁰ God Yawe i bin toktok long Manase na ol manmeri bilong Israel tasol ol i no harim toktok bilong em. ¹¹ Olsem na God Yawe i kisim ol bosman bilong ol ami bilong Asria na ol i kam pasim han bilong Manase long strongpela rop na kisim em i go long Babilon. ¹² Taim Manase i stap long dispela hevi na wari, em i senisim tingting na bel bilong em na i singaut i go long God Yawe. Em i daunim em yet i go daun tru long ai bilong God bilong ol tumbuna bilong em. ¹³ Em i prea long God wantim olgeta bel bilong em na God i harim prea bilong em na i kisim em i go bek long Jerusalem na putim em ken long sia bilong em. Olsem na Manase i save olsem God Yawe em i God. ¹⁴ Bihain long dispela Manase i mekim wanpela banis bilong taun bilong Devit long hap san i go daun long Gion, long stretpela ples long dua, ol i save tok dua bilong Pis na tu em raunim maunten bilong Opel wantaim dispela na mekim banis i go antap tru. Em putim strongpela ol hetman bilong armi long olgeta hap kona long ol taun bilong Juda. ¹⁵ Em rausim ol giaman god long haus bilong God Yawe na altar em bin mekim long en antap long haus bilong God Yawe na insait long Jerusalem na em i tromoi olgeta giaman god i go autsait long biktaun. ¹⁶ Em mekim wanpela alta bilong God Yawe na em i mekim ofa bilong kamapim wanbel wantaim God na ofa bilong tenkyu i go long God Yawe. Em i tokim olgeta manmeri long Juda long lotu long God Yawe, God bilong Israel. ¹⁷ Ol manmeri i save mekim ofa yet long dispela haus, tasol nau ol i save mekim long God Yawe, God bilong ol. ¹⁸ Long ol narapela samting Manase i bin mekim long en na prea bilong em i go long God na tok bilong ol profet husait i bin toktok long em long nem bilong God Yawe, God bilong ol Israel i harim olgeta samting ol i raitim long wok king bilong Israel i bin mekim long en. ¹⁹ Long dispela buk i gat stori bilong prea bilong em na sampela rot God i bin soim em. I gat stori tu long sin bilong em na sin bilong ol tumbuna bilong em na tu ples em i mekim i go antap tru na putim piksa bilong giaman god meri Asera long bipo. Olgeta samting ol i raitim na em i stap insait long Stori bilong ol Profet. ²⁰ Manase i dai na ol planim em long hap ol bin planim ol tumbuna bilong em long en. Amon pikinini man bilong em kamap king na kisim ples bilong em. ²¹ Yia bilong Amon em 22 yia na em kamap king bilong Israel na em i lukautim Jerusalem long tupela yia. ²² Em i mekim pasin nogut tru long ai bilong God Yawe, wankain olsem wanem samting papa bilong em Manase i bin mekim. Em i givim ofa i go long piksa bilong giaman god papa bilong em Manase i bin mekim long em na em lotuim ol. ²³ Em i no daunim em yet na stap aninit long God Yawe, olsem papa bilong em Manase i bin mekim. Amon em i go insait tru long mekim pasin nogut. ²⁴ Ol wokman bilong em i pasim tok long kilim em na bihain ol i killim em i dai insait long haus bilong em. ²⁵ Tasol ol manmeri bilong dispela hap i kilim olgeta man husait i bin pasim tok na kilim king Amon na ol i makim Josaia pikinini man bilong em long kamap king.