¹ Orait taim ol dispela i pinis, olgeta manmeri bilong Israel i go long biktaun bilong Juda na brukim ol ston tawa na ol i katim ol pos bilong Asera na ol i brukim daun ol ples antap na ol alta long Juda na Benjamin na long Efraim na Manase, inap ol i bagarapim tru olgeta. Orait olgeta manmeri bilong Israel i go bek long graun bilong ol wanwan na biktaun bilong ol. ² Hesskia i makim wanwan lain bilong ol pris na ol Livai long mekim ol wok bilong ol. Em i makim ol long mekim ofa bilong paia i kukim olgeta, ofa bilong kamapim wanbel long mekim wok na long tok tenkyu na amamas long givim biknem long God Yawe insait long bikpela dua long haus lotu. ³ Na em i makim ol abus long banis bilong king long mekim ofa bilong paia i kukim olgeta long moning na long abinun na ofa bilong paia i kukim olgeta bilong ol dei Sabat, ol nupela mun na ol narapela bikpela dei olsem ol i raitim long lo bilong God Yawe. ⁴ Na moa yet, em i tok strong long ol manmeri i stap long Jerusalem long givim ol hap kaikai long ol pris na ol Livai, bai ol i ken mekim wok bilong ol gut na bihainim lo bilong God Yawe. ⁵ Taim tok save i go long ol manmeri bilong Israel, kwiktaim ol i givim nambawan hap kaikai bilong wit, nupela wain, wel, hani, na ol kaikai bilong gaden. Ol i kisim namba10-hap bilong olgeta samting i kam na em i kamap planti tru. ⁶ Ol manmeri bilong Israel na Juda i stap long biktaun bilong Juda tu i kisim namba 10-hap bilong ol bulmakau na sipsip na namba 10-hap bilong ol holi samting ol i bin makim bilong God Yawe, God bilong ol na i kam bungim. ⁷ Long namba tri mun ol i stat long bungim ol samting bilong ol i go inap long namba 7 mun. ⁸ Taim Hesekia na ol lida i kam lukim dispela ol samting ol i bungim, ol i litimapim nem bilong God Yawe na ol manmeri bilong em, ol Israel. ⁹ Orait Hesekia i askim ol pris na ol Livai long ol dispela ol samting ol i bungim. ¹⁰ Hetpris Asaria bilong lain bilong Sadok, i bekim tok bilong em olsem.''Taim ol manmeri i kisim ol ofa bilong ol i kam long haus bilong God Yawe, mipela i kaikai na i pulap na i gat planti moa i stap yet, long wanem God Yawe i blesim ol manmeri bilong em. Olsem na wanem hap samting i stap yet, em i planti tru'' ¹¹ Orait Hesekia i tokim ol long redim bakstua insait long haus bilong God Yawe, olsem na ol i redim. ¹² Orait ol i bungim olgeta samting bilong ofa, ol namba ten hap na ol samting ol i makim bilong God Yawe. Konania bilong ol lain Livai i bosim dispela wok na brata bilong em Simei, em i stap namba-tu long en. ¹³ Jehiel, Asasia, Nahat, Asael, Jerimot, Josabat, Eliel, Ismakia, Mahat na Benaia em ol i wok aninit long Konania na Simei brata bilong em. King Hesekia i bin makim na Asaria, ofisa long haus bilong God. ¹⁴ Kore pikinini man bilong Imna bilong Livai, em i was long dua bilong hap san kamap na i bosim ofa bilong ol manmeri i givim long laik bilong ol yet long God. Wok mak bilong em long skelim ol ofa bilong God Yawe na ol ofa bilong rum tambu. ¹⁵ Ol lain i wok aninit long Kore em Eden, Miniamin, Jesua, Semaia, Amaria na Sekania insait long biktaun bilong ol pris. Ol i kisim wok bilong skelim ofa inapim olgeta lain pris, givim long ol man i gat nem na long ol man nating. ¹⁶ Na ol i givim tu ol pikinini man yia bilong ol inap tripela yia na i go antap, ol lain husait nem bilong ol i stap long buk bilong lain tumbuna bilong ol husait i bin go insait long haus bilong God Yawe. Olsem na ol i save bihainim na mekim wanwan wok bilong ol. ¹⁷ Na ol i skelim i go long ol pris bihainim nem i stap long buk bilong ol tumbuna bilong ol, wankain olsem long ol Livai, yia bilong ol i 20 yia na antap, inapim wanwan wok bilong ol. ¹⁸ Na ol i raitim nem bilong olgeta liklik pikinini, ol meri bilong ol wantaim ol pikinini man na ol pikinini meri bilong ol. Olgeta lain nem i stap long buk, long wanem ol i save bilip na i stap stretpela. ¹⁹ Sampela pris long lain bilong Aron ol i stap long ol liklik ples klostu long ol biktaun na i gat sampela Livai i stap ol i save skelim kaikai i go long olgeta pris na long ol lain nem bilong ol i stap long buk bilong ol tumbuna lain bilong ol husait i stap namel long ol Livai. ²⁰ Hesekia i save mekim dispela long olgeta hap long Juda. Em i save mekim gutpela na stretpela pasin na em i save bihainim tru God Yawe, God bilong em. ²¹ Long olgeta wok em i mekim long haus bilong God long bihainim lo na ol tok bilong God na luksave tru long God bilong em. Em i save mekim wantaim olgeta bel bilong em olsem na olgeta samting em i mekim i save kamap na inapim tru.