¹ Hesekia i salim tok long olgeta manmeri long Israel na Juda na tu em i raitim ol pas i go long ol manmeri long Efraim na Manase, olsem ol i mas kam long haus bilong God Yawe long Jerusalem, long mekim kaikai na amamas long bikpela dei bilong tingim dei God Yawe i larim ol stap gut , God bilong ol Israel. ² Long wanem king wantaim ol ofisa na olgeta manmeri long Jerusalem i kam bung na pasim tok long mekim kaikai na amamas long bikpela dei bilong tingim dei God i larim ol Israel i stap gut long namba tu mun. ³ Ol i no inap long mekim kaikai na amamas long dei na mun ol i bin makim pinis long mekim long wanwan yia, long wanem planti ol pris ol i no givim ol yet i go olgeta long God Yawe na ol i no stap orait long mekim wok pris na tu ol manmeri i no kam bung wantaim long Jerusalem. ⁴ Ol dispela samting i orait long tingting na lukluk bilong king na long olgeta manmeri. ⁵ Olsem na ol i wanbel long tokaut long olgeta manmeri long olgeta hap bilong Israel, long Berseba i go long Den, olsem ol manmeri i ken kam long Jerusalem na mekim kaikai na amamas long tingim dei God i larim ol Israel i stap gut i go long God Yawe, God bilong ol Israel. Long wanem planti manmeri tru ol i no bin bihainim ol lo Moses, wokman bilong God Yawe i bin raitim i stap long en. ⁶ Olsem na king na ol ofisa bilong emol i salim pas i go long olgeta hap bilong Israel na Juda. Long pas ol i tok, 'Yupela ol manmeri bilong Israel, yupela kam bek long God Yawe, God bilong Abraham, Asisak na Israel, olsem na em bai tannim kam bek long yupela ol liklik lain husait i bin ranawe long han bilong ol birua bilong yupela, ol king bilong Asiria. ⁶ Olsem na king na ol ofisa bilong em ol i salim ol pas i go long olgeta hap bilong Israel na Juda. Long pas ol i tok, "Yupela ol manmeri bilong Israel, yupela kam bek long God Yawe, God bilong Abraham, Aisak na Israel, olsem na em bai tanim kam bek long yupela ol liklik lain husat i bin ranawe long han bilong ol birua bilong yupela, ol king bilong Asiria. ⁷ Yupela i noken kamap olsem ol tumbuna bilong yupela o ol brata bilong yupela, ol i bin brukim ol lo bilong God Yawe, God bilong tumbuna bilong ol, olsem na em i mekim ol narapela lain manmeri i kamap birua bilong ol na mekim nogut long ol, nau yupela i ken lukim long ai bilong yupela. ⁸ Nau yupela i noken strongim bel bilong yupela olsem bipo ol tumbuna bilong yupela ol i bin mekim, tasol givim yupela yet i go long God Yawe na kam insait long haus holi em i makim bilong em yet na lotuim God Yawe na em bai i no inap kros na belhat long yupela. ⁹ Sapos yupela i tanim na kam bek long God Yawe, ol lain husait i bin kisim ol brata na ol pikinini bilong yupela i go olsem ol kalabus manmeri ol bai i sori long ol na larim ol i kam bek long hia long graun bilong ol. Long wanem, God Yawe, em i God bilong marimari na sori, em bai i no i nap givim baksait long yupela, sapos yupela i kam bek long em.'' ¹⁰ Orait ol lain bilong karim tok ol i kisim ol pas i go givim long ol wanwan biktaun bilong olgeta hap graun bilong ol Efraim na Manase, ol i go olgeta long graun bilong ol Sebulun, tasol ol manmeri long ol dispela hap ol i lap na tok pilai long ol. ¹¹ Tasol, sampela ol man long Asa, Manase na bilong Sebulun ol i daunim ol yet na ol i kam long Jerusalem. ¹² God Yawe i givim strong long ol lain Juda na ol i wanbel na ol i harim na bihanim ol tok bilong king na ol bosman, olsem God Yawe i tok. ¹³ Bikpela lain manmeri tru i kam bung long Jerusalem long mekim kaikai na amamas long Dei Bilong Bret Nogat Yis long namba tu mun. ¹⁴ Ol i kirap na rausim olgeta alta na ol alta bilong kukim ol paura bilong kamapim smuk i gat gutpela smel long Jerusalem na ol i tromoi olgeta i go insait long liklik wara Kidron. ¹⁵ Orait ol i kilim ol yangpela sipsip bilong tingim dei God i larim ol Israel i stap gut long dei 14 long namba tu mun. Ol pris na ol Livai ol i pilim sem, olsem na ol i daunim ol yet na tok sori na tok promis long mekim wok pris na ol i kisim ol ofa paia i kukim pinis i go insait long haus bilong God Yawe. ¹⁶ Ol i sanap long ol ples ol i bin makim bilong ol wanwan lain famili, bihainim ol lo Moses wokman billong God Yawe i bin givim ol. Ol Livai kisim ol blut bilong ol abus na givim ol i go long ol pris na ol pris i kisim na tromoi ol blut antap long alta. ¹⁷ Long wanem i bin i gat planti ol pris na ol Livai ol i no bin mekim ol yet i kamap klin long ai bilong God Yawe ol i kam i stap long dispela bung. Olsem na ol Livai i kilim planti pikinini sisip bilong bikpela dei bilong tingim dei God i larim ol Israel i stap gut long mekim ofa bilong ol manmeri ol i no stap klin na ol i no inap long mekim ofa long God Yawe. ¹⁸ Planti manmeri tru, planti bilong ol i bilong lain Efraim na Manase, Isaka na Sebulun ol i no mekim ol yet stap klin long ai bilong God Yawe tasol ol i kaikai ofa sipsip olsem na ol i sakim lo Moses i bin givim long ol. Hesekia i prea long God olsem, '' Gutpela God Yawe yu i ken lusim ol rong bilong olgeta manmeri ¹⁹ husait ol i givim bel bilong ol long painim God, em God Yawe, God bilong ol tumbuna bilong ol, maski ol i no stap klin na i no bihainim ol lo bilong haus holi billong yu.'' ²⁰ Na God Yawe i harim prea bilong Hesekia na em i lusim ol ron bilong ol manmeri. ²¹ Ol manmeri bilong Israel husait i bin kam long Jerusalem long mekim kaikai na amamas long tingim Dei Bilong Bret Nogat Yis, ol i amamas tru long mekim olsem i go inap long 7-pela dei. Olgeta dei ol Livai na ol pris i singsing amamas wantaim ol musik samting na apim nem bilong God Yawe i go antap tru. ²² Hesekia i toktok na strongim olgeta Livai husait i save na klia long mekim wok bilong God Yawe. Olsem na ol i kaikai long dispela bung i go inap long 7-pela dei, long dispela taim ol givim ol ofa bilong bung na stap wantaim, ol tok sori na autim ol sin bilong ol long God Yawe, God bilong ol tumbuna bilong ol. ²³ Olgeta manmeri i bung na pasim tok long mekim kaikai na amamas i go moa long narapela 7-pela dei na ol i mekim olsem wantaim bikpela amamas. ²⁴ Long wanem Hesekia king bilong ol Juda i givim ol manmeri 1,000 bulmakau na 7,000 sipsip olsem ofa na ol ofisa i givim ol manmeri 1,000 bulmakau na 10,000 sisip na ol memek. Bikpela namba tru bilong ol pris i mekim ol yet i kamap klin long ol i ken mekim wok pris bilong God Yawe. ²⁵ Olgeta manmeri bilong Juda wantaim ol pris na ol Livai na olgeta manmeri husait i bin kam long Israel na tu ol narapela manmeri husait i kam long graun bilong ol Israel na ol husait i save stap long graun bilong ol Juda, olgeta ol dispela manmeri ol i amamas tru. ²⁶ Olsem na ol i bin i gat bikpela amamas tru long Jerusalem, long wanem i no bin i gat dispela kain samting i bin kamap long Jerusalem bipo long taim bilong Solomon pikinini man bilong Devit, king bilong ol Israel. ²⁷ Orait ol pris na ol Livai i kirap na ol putim han bilong ol antap long ol manmeri na prea long ol. God Yawe i harim krai bilong ol na prea bilong ol i go antap long heven, ples holi God Yawe i save stap long en.