¹ Long 36 yia bilong Asa i stap olsem king, Basa, king bilong Israel em i mekim pasin i no stret long ol Juda na em i wokim biktaun Rama long pasim ol manmeri long ol i no ken i go aut o kam insait long graun bilong king Asa, king bilong Juda. ² Olsem na Asa i kisim ol silva na gol i kam aut long haus moni insait long haus bilong God Yawe na long haus bilong king na salim i go long Ben Adad, king bilong Aram, husait i save stap long Damaskus. Em i tok, ³ "Larim dispela kontrak bai kamap namel long mi na yu olsem em i bin stap namel long papa bilong mi na papa bilong yu. Lukim, mi salim pinis long yu ol silva na gol. Brukim kontrak bilong yu wantaim Basa, king bilong Israel na em bai i no inap mekim nambaut long mi. ⁴ Ben Adad em i harim tok bilong King Asa na em i salim ol nambawan ofisa bilong ol lain ami bilong em i go mekim nogut long ol biktaun bilong Israel. Ol i pait long Ijon, Dan, Abel Maim na long olgeta biktaun bilong holim ol kago samting bilong Naptali, ⁵ Em i kamap olsem na taim king Basa i harim dispela, em i no moa wokim Rama na larim wok bilong em i pinis olgeta. ⁶ Na king Asa i kisim olgeta lain Juda i go wantaim em. Ol karim olgeta ston na plang bilong Rama i go, Basa i bin wokim biktaun long en. Na King Asa i mekim wok wantaim ol dispela ston na plang long wokim gen Geba na Mizpa. ⁷ Long dispela taim Hanani, husait i wanpela glasman i go long Asa, king bilong Juda na tokim em olsem, "Bilong wanem yu putim bilip bilong yu long king bilong Aram na yu no putim bilip long God Yawe bilong yu, ol ami bilong king bilong Aram, ol i ranawe i go aut pinis long han bilong yu. ⁸ Ol Kus na ol Libia, ol i gat bikpela lain ami wantaim planti ol karis na ol man bilong kalap long hos? Tasol yu bilip long God Yawe, em i mekim yu i winim ol. ⁹ God Yawe i save lukluk raun long olgeta hap bilong graun, olsem na bai em i soim strong bilong em long ol lain husait bel bilong ol i stap stret wantaim em. Tasol yu mekim pasin i no stret long dispela. Long nau na i go olsem, bai pait i bungim yu. ¹⁰ Na Asa i belhat long glasman na em i putim em long kalabus, long wanem em i belhat long em long dispela samting. Long wankain taim, Asa i bagarapim sampela ol manmeri. ¹¹ Tasol lukim, ol wok bilong Asa, long stat na i go long pinis ol i raitim long buk bilong ol king bilong Israel na Juda. ¹² Long 39 yia bilong wok king bilong em, Asa i painim sik long lek bilong em. Dispela sik em i bikpela, tasol em i no painim helpim long God Yawe, em i go painim helpim long ol dokta tasol. ¹³ Na Asa i dai na ol i planim em wantaim ol lain tumbuna bilong em, em i dai insait long 41 yia bilong em olsem king. ¹⁴ Ol i planim em insait long matmat bilong em yet, em i bin redim long en, insait long biktaun bilong Devit. Ol i putim em insait long bokis i pulap long switpela ol smel marasin, ol save man bilong wokim ol smel maraisn i wokim long en. Na ol i mekim bikpela paia long onarim em.