¹ Long dispela taim Bokis Kontrak bilong God Yawe i bin stap long bikples bilong ol Filistia long 7pela mun. ² Nau ol manmeri bilong Filistia i singautim ol pris na ol man bilong tok profet i kam na tokim ol, Yumi bai mekim wanem wantaim Bokis Kontrak bilong God Yawe? Tokim mipela, olsem wanem na bai mipela salim i go bek long bikples bilong em. ³ Ol pris na ol man bilong tok profet i tok, Sapos yupela i laik salim Bokis Kontrak bilong God Yawe bilong Israel i go bek, noken salim nating i go taim nogat presen i stap, mekim olgeta samting na salim wantaim ol ofa bilong tok sori. Long dispela rot bai yu orait na bai yu save olsem em i no bin apim han na putim antap long yu ikam inap nau. ⁴ Na ol i tok, Wanem ofa bilong tok sori bai mipela givim i go long em? Ol i bekim na tok, 5-pela piksa bilong sua nogut ol i wokim long gol na 5pela piksa bilong rat ol i wokim wantaim gol, 5-pela namba em wankain olsem namba bilong ol 5-pela hetman bilong ol Filistia. Dispela wanpela samting nogut tasol bai i bagarapim yu na ol bikpela hetman bilong yupela wantaim. ⁵ Olsem na yupela mas mekim wankain piksa bilong sua nogut, na wankain piksa bilong ol rat i save bagarapim ol graun na givim glori long God Yawe bilong ol Israel. Na ating em bai rausim han bilong em i stap antap long yupela long ol god bilong yupela na long graun bilong yupela. ⁶ Bilong wanem na yupela bai holim bel bilong yupela strong tumas, olsem ol manmeri bilong Isip wantaim Fero i holim bel bilong em strong tumas? Long kain pasin tasol God Yawe bilong Israel i bin mekim sampela samting wantaim ol, yu ting ol Isip i no salim ol manmeri i go na ol i lusim i go? ⁷ Olsem na, yupela mas redim karis na tupela mama kau i givim susu long ol pikinini i no bin pasim hap plang long nek bipo. Pasim ol rop long tupela kau long karis, tasol kisim ol pikinini kau i go long haus, longwe long tupela. ⁸ Kisim Bokis Kontrak bilong God Yawe na putim i go antap long karis. Putim ol dispela samting yupela i bin wokim long ol gol olsem ofa bilong tok sori i go long wanpela sait bilong en. Na salim em na larim em i go long laik bilong em yet. ⁹ Na lukluk i istap, sapos em i go bek stret long rot antap long graun bilong em Bet Semes, em i olsem God Yawe i bin kamapim na kilim ol long dispela bakarap. Sapos nogat, em yumi bai save olsem em i no han bilong em i bakarapim yumi, long dispela bai yumi save olsem em i kamap nating tasol long yumi. ¹⁰ Ol man i mekim olsem ol i bin tokim ol, ol i kisim tupela mama kau na pasim long karis na putim ol pikinini bilong ol i go insait long haus. ¹¹ Ol i putim Bokis Kontrak i go antap long karis, wataim bokis ol i putim piksa bilong rat ol i wokim long gol wantaim piksa bilong buk sua i stap. ¹² Ol kau i go stret long hap long Bet Sebes. Ol yet i go long wanpela bikpela rot, nois wantaim ol i no tanim i go long hansut o long hankais. Ol hetman bilong Filistia i bihainim ol i go long mak bilong Bet Semes. ¹³ Long dispela taim ol manmeri bilong Bet Sebes i katim wit bilong ol long gaden i stap long ples daun. Taim ol i apim ai i go antap na i lukim Bokis Kontrak, ol i amamas. ¹⁴ Dispela karis i kam yet long bikples bilong Bet Sebes na kam stop long graun bilong Josua. Traipela ston i stap long en, na ol i brukim diwai bilong karis na kukim kau olsem ofa bilong ol igo long God Yawe. ¹⁵ Ol Livai i kisim Bokis Kontrak i go daun wantaim bokis i stap insait wantaim, ol samting ol i wokim wantaim gol na putim antap long traipela ston. Ol man bilong Bet Semes ol i kukim ofa bilong kukim olgeta long paia na mekim ol narapela ofa tu i go long God Yawe long dispela dei tasol. ¹⁶ Taim ol 5-pela hetman bilong Filistia i lukim ol dispela samting pinis, long dispela dei tasol ol i go bek long Ekron ¹⁷ Displa em i buk nogut bilong ol Filistia, ol i wokim long gol na salim i go olsem ofa bilong mekim tok sori long God Yawe, wanpela bilong Asdot, wanpela bilong Gasa, wanpela bilong Askelon, wanpela bilong Gat na wanpela bilong Ekron. ¹⁸ Ol dispela gol rat i wankain olsem namba bilong ol dispela biktaun bilong ol Filistia na bilong ol dispela 5-pela hetman bilong ol strongpela biktaun na wantaim ol bikples haus lain beksait bilong traipela ston ol i bin putim Bokis Kontrak bilong God Yawe i sanap yet olsem witnes long graun bilong Josua bilong Betsemit. ¹⁹ God Yawe i bin bagarapim sampela man long Bet Semes long wanem ol i bin lukluk i go insait long Bokis Kontrak bilong God Yawe. Em i kilim 50,070 man. Ol manmeri i krai, long wanem God Yawe i givim ol manmeri bikpela pen moa. ²⁰ Ol man bilong Bet Sebes i tok, Husait bai sanap strong wantaim dispela holi God Yawe? Long husait lain bai dispela Bokis Kontrak i lusim mipela na i go antap? ²¹ Ol i salim ol man bilong karim tok i go long ol manmeri i stap long Kiriat Jiram na i tok, Ol filistia i salim Bokis Kontrak i kam bek na Bokis Kontrak bilong God Yawe i kam bek pinis, yupela kam daun na kisim i go bek wantaim yupela.