¹ Ol man long Kiriat Jearim i kam na kisim bokis kontrak bilong God Yawe na putim long haus bilong Abinadab antap long liklik maunten na ol i makim Eliesa long lukautim bokis kontrak bilong God Yawe. ² Taim Bokis Kontrak bilong God Yawe i stap long Kiriat Jearim, em i stap longpela taim pinis, olsem 20 yia. Ol Israel i wari na krai na laik i go bek long God Yawe. ³ Samuel i tokim olgeta Israel olsem, "Sapos yupela kam bek long God Yawe wantaim trupela bel na rausim ol god giaman bilong narapela hap na god meri Astores i stap namel long yupela na givim bel bilong yupela long God Yawe na lotu long em wanpela tasol, em bai kisim bek yupela long han bilong ol Filistia." ⁴ Nau ol manmeri bilong Israel i rausim ol god giaman Bal na ol god meri Astores na ol lotuim God Yawe wanpela tasol. ⁵ Olsem na Samuel i tok, "Bungim olgeta man meri bilong Israel long Mispa na bai mi beten long God Yawe long yupela." ⁶ Ol i bung long Mispa na pulmapim wara na kapsaitm long ai bilong God Yawe. Na ol i tambuim kaikai na ol i tok, "Mipela i bin mekim sin long ai bilong God Yawe," Long dispela taim Samuel i stat long stretim hevi bilong ol Israel na i kisim ol i go. ⁷ Taim ol Filistia i harim olsem ol Israel i bung long Mispa, ol lida bilong Filistia i laik pait wantaim ol Israel. Taim ol man meri bilong Israel i harim dispela, ol i pret long ol Filistia. ⁸ Nau ol man meri bilong Israel i tokim Samuel , yu noken lusim pasin bilong singaut long God Yawe, God bilong mipela na em bai i helpim mipela long han bilong ol Filistia." ⁹ Samuel i kisim pikinini sipsip i dring susu yet na i mekim ofa bilong paia i kukim olgeta i go long God Yawe. Nau Samuel i krai long God Yawe bilong Israel long helpim ol, na God Yawe i harim krai bilong em. ¹⁰ Taim Samuel i wok long mekim paia bilong kukim ofa yet, ol Filistia i kam na banisim ol Israel tasol God Yawe i mekim bikpela nois long dispela dei na paulim tingting bilong ol Filistia na ol i ranawe long ol Israel. ¹¹ Ol man bilong Israel i ronim na kilim ol Filistia long Mispa, na i go inap long ples daun bilong Bet Kar. ¹² Nau Samuel i sanapim wanpela ston namel long ples Mispa na Sen na i kolim nem bilong dispela ples Ebenesa, em i tok olsem, "God Yawe i bin helpim mipela i kam inap long hia." ¹³ Olsem na ol Filistia i stap longwe na ol i no brukim mak bilong ol Israel na i go insait. Han bilong God Yawe i banisim ol Israel long ol Filistia long taim Samuel i stap. ¹⁴ Ol Israel i kisim bek taun bilong ol, stat long taun Ekron i go inap long taun Gat', ol i kisim graun mak bilong ol bek long ol Filistia. Bihain ol Israel na ol Amon i stap gut gen. ¹⁵ Samuel i bosim na skelim ol Israel gut long olgeta dei long laip bilong em. ¹⁶ Olgeta yia em i save go raun sotpela taim long ples Betel na Gilgal na Mispa long stretim ol hevi bilong ol Israel long ol dispela ples. ¹⁷ Na em bai i go bek long Rama, long wanem haus bilong em istap long hap, na em save stretim hevi bilong ol Israel. Na tu em i wokim alta bilong God Yawe long dispela hap.