¹ Ata bakauka Masidoniai bariakabe tenabu niara Kotiba a'urihaka bataina ko'eke tabate turo. ² Nora aba'ara'i bata mara'i bata aihabira hika'i bata, nora uahara hika bano bata antu'ano bata kaha'ira nimia bantaraini ko'e okara obarai'a kairabe. ³ Te tentama bika witinisi bauro bira nanare bika mone maki'ahi ori atarakema nimiabo. Nai antu a'abe. ⁴ Airu irara hika bika tinabu irarabe bika bata bo kai'a Jerusaremini mara'ura utua bainti nahentika kaha'ireka. ⁵ Kia tenabu iri bi haikaba obarao'i ianarobe turobe, boha ariro baibo, baka bika nai Nora amiakabe. Nantira bika Kotira antu a'ata nai tinabu timiarabe. ⁶ Mintima tenabu taitusirara kempu kai'ake turo, tabae bi kai'ara baka antatero ni kaha'ake ko'e okara mintiharo mone nimiro Jerusaremini mara'ura utua bainti nahentika kaha'iate tibo. ⁷ Iboma ne hini kiaka bata atarama kabo mara'ura utuara'a. uba'a bata, irira hika'a bata, eka hika'a bata, ne tinabuara antu aruara'a bata. Mintira ne bira ko'eke nimia okarara mintiha kia ana barate. ⁸ Kia te ma bi ubara lo bo'arauma turo. Iboma te bi ubara tuna te ne antu arua bantaraini aba'ehabe u'ai'ake ne bokara bata antu arihae o kiae. ⁹ Bira nanare ne tabebe Ihu Karaitira tinabu Nora a'urihaka. Biba eka hikama bataibabe, niarao tiroma biba umpo'a nimita baintika bo'ara baibo, biba kia onana batai baintira bo'ara baira tinabuara airu haika batate tirobe. ¹⁰ Birarama, te ni ko'e irirahika nimi ni kaha'irerabe. Bo ihi aitarora'a, kia ne nanahika mintiabo. Kiabe. Ne auha ihai bo'ake antu ariha bi haikara mintiabo. ¹¹ Bate bi kai'ara tai'ama kate. Boha arake ne nora antu'a bate auha bano uri himpi manta haru mintiateke, ne bate bi kai'ara barabare beta tai'aranai burukate. ¹² Ne bi kai'ara antu'a bate barareka ibera, bira bo haika ko'e haikabe. Ne nimireka ibera, ne nana hikae bataira nimiate, nana hikae kia batai haika. ¹³ Ma bi kai'ara kia boka kia mara barai manta ne'ai mara bareraube. Boha'aribo, eka bainti nahentini boha ariaire. ¹⁴ Ko'e hika airutaha ne bate bataira bate taukae nana hika kia bataikama nimibabe. Bira nanare, bika airu hika ko'e hika bate, bika nana hikae ne kia batai haikarama nimibabe, boha ariroma eka ni abutana barianarobe. ¹⁵ Poropeti araruata ubara bo'arama barianarobe: "Bi baintiba airu hika bataiba nantiara kiama eka hika batairo barianobe, ta baintibae airu hika kia bate batairaba, nanatiara kiama biba bo hikara abo'ianarobe." ¹⁶ Mintima Kotira ko'erabema tirabe, tabae bi antu'ara Taitusira auha'i bataira, te niara antu'a batauna tekero. ¹⁷ Bira nanare kia biba tinabu uba'iauma iribo, bira nora antu'a bano uri himpibo nai antu'a'a ni inaini anirebabe. ¹⁸ Tenabu bo ata bakara barakairo tarae eka mono'ihai bira autu bini ibariaba ko'e uba tiba o'ai ibaiba Taitusira batakero anianarobe. ¹⁹ Kia bira'iaube, eka mono'i bariaka bira makimi'ate tinabu batake nuaire ti bi kai'ara a'ubarero nimibariara ko'e okara'a. Bira Nora nai autu'abe tinabu antu'a batabe kaha'iaina bantaraini. ²⁰ Kia tinabuara bainti nahenti tauba'a uba tiaterabe bi kai'ara tenabu baraina'a. ²¹ Tenabu ko'eke ra'ikiha abu abu okarama mintirabe, kia Nora abu'a iaube kiabe, bainti nahenti abu'a batabe. ²² Tenabu Taitusira batake bo ata bakarama atitarabe. Tenabu airu enta bira aba'ake tabauro biba antu'a batakero kai'a baraina'a baibo. Bate biba nora antu'a bataibo bira nanare biba nora mara'ura ni'a utibo. ²³ Taitisiba, ti boha kai'a bainti banobe biba ni kai'a bainti bano batabe. Tinabu tara ata bakauka bata, mono'ihai bikahanta batama Taitusira batake atitabo. Bikahanta minti manta bainti nahenti Karaitira nora autu amibarabe. ²⁴ Mintima nenta antu'a umi'ata, mono'irauka bikahanta ko'eke tabate bira nanare, tenabu ni ko'e okarara ni autu bini'i bauro.