¹ Te iri tiha ne ti a'ira kai'e te bokina wera okara mintiare ti. Mintira ne ti a'ira kai'e airu'ake mintiare! ² Bira nanare, te Kotira ko'e auha batakema ni ora auha nimuro, te ai poromisi ami tiha boha bainti baratera bariane turo. Te ai Karaitira amire nahenti bano kia bainti batake baitai nahentira bo'ara poromisi amuro. ³ Mintima te etauro, auriro bi memaruba nai una'ara batakero Evara una'ara tibakaiba, biba ni irirahika barakero niarai iantorabe ne ko'eke taku'i monora Karaitra'i tabaira'a hiro. ⁴ Bira nanare, hinikia baintika ani bo Ihurara tibera kia bira ma Ihura tenabu tibaunarara tibera. O ne bo aiho baraibera kia Nora aiho bira baraibera. O ne bo ko'e uba iribera kia bira ko'e uba baka iri tara irera. Ne bihaikara kaibo ninta'a obarai'iaire. ⁵ Bira nanare, kiama te muatarini bauro norai'ia kai'a baintika abutanahi. ⁶ Iboma, a'irakare kia te uba tia hikurura barauro, te irirahika batauro. Eka ara'a hiro eka hika ahiro tenabu bi haikara a'ira'ama obarai'a kauro. ⁷ Te tenta bara muntubite baiha ni bara'i uribuna bira kumie minturo? Te nini Kotira ko'e uba uminama tibauro. ⁸ Te bo mono'ihai muara auti bauro bika ti kaha'i bariamantama te ni kai'a bainti bauro. ⁹ Te ni hampata baiha nana hikara abo'iha, kia te ni borara bohika timiane turo. Ata bakauka Mesidoniai haima nanahikare abo'una biri timibariabo. Te eka hika'ahi tenta raba'uro bira nanare, kia te ni mara nimirerabe, te nantiara bata minti'aima irabe. ¹⁰ Boha arakero Karaitira u'a uba banoma ti'ira baibo, kiama te Kotira nora autu amiaina'a ana bararabe Akaia batuka baiha. ¹¹ Bira nanahare? nanahare te niara kia antu'aruro nanae? Kotiba naima bira tabataibo. ¹² Nana hikae te minti bauna a'ima te minti bairabe, mintihama tiriara kaurira uba tira a'ini barakarabe, bika nora autu bare ubara tibariakara, bika tinabu anrake kai'a bare bariakara bo'ara. ¹³ Mintia baintika bika una'ara kai'a baintibe una'ara okara mintiaka kai'a baintibe. Bika kia u'a kai'a baintibe, mintima bika nai Karaitira u'a kai'a bainti bo'ariha. ¹⁴ Ma bi haikara kia araka hikauebe, bira nanare, Sataba bata nai kuari'a hina ankero bo'ara karebabe. ¹⁵ Kia bi haikara totara himpua hikaraube, mintira bira kai'a bainti bata nai barake abu abu okara kai'a bainti bo'ara kareka ibera. Bika kai'a bira'ata ko'ama barianarobe. ¹⁶ Te e'a bata mantiake turo, kia bo bainti bano mintiake iriro tiharo tiriara kia ko'e irirahika baibabe tiaire. Mintira ne mintiake iribera, ne ti barareka kia ko'e bainti bo'ara barate ko'e irirahika te tentara airu ubama tirabe. Nana uba te tuna te tenta autu kaha'ihabe, ¹⁷ Kia te Nora bano nai mintiteke minturo, kiabe, te bira mintuna bo bainti bano kia ko'e irirahika baiba mintiteke minturo. ¹⁸ Bira nanare orautahama baata bira'ira nai bini'i bariabo, te bata tena bini'ama iainabe. ¹⁹ Uahara batake ne ti a'ira kai'e te bainti kia ko'e irirahika bataka bo'ara bariare, ne nenta u'a irirahika bataka bariate. ²⁰ Bira nanare ne bo bainti a'irakebabe biba ni nai kai'a bainti'a kaira, biba ne ira ekahika baraira, biba ni'ahiro nai nora autu barareba, biba iriro te ko'ehabe niara kiabe, o biba ni biritaha ru'e kaira. ²¹ Te kaurira hika batakema uba tirabe tenabu bi haikara mintire kia aikaro baika bo'arama mintirabe. Mintiro tabae birara tirera, te wera bainti uba bo'arama tirabe. te bata tentara tirabe. ²² Bika Hiburu batanae? Te bata Hiburube. Bika Isreri batanae? Te bata Isreribe. BIka Ebarahamura naintitie? Te bata Ebarahamura naintibe. ²³ Bika Karaitira kai'a baintie? (Te kia ko'e irirahika bataka anarakema te uba turo.) Te bika uri atarakema bauro. Te airu to'abuma uturo, te airu ruparara'i baiha'ura, bika ti oraha ru'utuke bate, te airu mara bare inantaka te utubunabe. ²⁴ Juda batanaka 5-enta 39-kanta ti aruarabe. ²⁵ Tara ente boha enta bika katariha nohai ti aruarabe. Bo enta bika ori nohai ti aruarabe. Tara enta boha enta sipi bano ti rauru kairabe. Bo enta'i bata kuari'a bata solwara namai benta'a'a baunabe. ²⁶ Te bukai ara'a airu enta nunarabe, nora namai'ata airu mara baraunabe, muara bainti bata airu mara timiarabe, tinta bainti nahenti bata ti mara'i timiarabe, kia Juda batana hinikiaka bata ti mara'i timiarabe nora tauni ihai bata te mara baraunabe, kia bainti baria batukanahi bata mara baraunabe, una'ara ata bakauka bata ti mara'i timiarabe. ²⁷ Te ora enta bira'i baiha aikaroke kai'a baraunabe, airu enta'i kia te ko'eke baitaunabe, te karara bata narara baiha kia namai bata baimanta baunabe, airu enta te kara a'ira keha nunabu tiha baunabe, antaira'i baiha kia utaba'a tenta'a a'uaina baimanta. ²⁸ Kia bi haikara iaube, bo hikaha bata , te eka enta mono'i bariakara bo'ake iri baunabe. ²⁹ Tarae aikaro kia baibo, ti'ai aikaro baibo? tarae bika ora uba tibamitabo hi'iribo, iha bano kiama ti itaibo? ³⁰ Te tenta bini'ireiha, te kia aikaro baimanta bauna birarama tirabe. ³¹ Bi Kotira, tarae tinabu Nora Ihura bira oora, bi baintiba tabae eka enta bariaina autura barairababe, tabate kiama te una'ara turo. ³² Damaskasini haina, kabanaba tabae Kini Arestasira bebarai kai'a baraiba ra'i kirauka bita bataimanta nora tauni Damasikasini ra'ikiaka ti uata barorabe. ³³ Mintimanta ti ana'o hinikiaka ti barake uta bo'ira rubake windo'ahi nora tauni Damasikasini tubika aratara'ahi ti mabini babi a'ukora, te bi kabanara kau'u'ihai aitare bunara.