¹ Jisasi mini wayayu sima kiparemi, inarufa amonagem demi mani semi, ''Setifoeo, a'ino mi nuram fabarem, En Aga anon-avi amina'na, En Aga, emi anon-avi amino-- ² Emi made eranti amemi, bemose amidukana wata-anasiyuga bemi madem nuram bantana aumi yiminani. ³ Manami wantana aumi; yemi, emi amone-intauge, manasamana fuga Goti, emo sakanam yigayi, Jisasi Kraisi. ⁴ Emi anon-avi amuno mana magaga. Emo yoganto simenami, ai kipene. ⁵ Magemi, Setifoeo, Ano sivi simeno mana magamose bu uwakayamo dukana anon avi. ⁶ Enavi ai siyimeuno mana magaga emo simidukanam wata anasi. Yemi enintamono, yemi simiduka, en ami ai mantuka. ⁷ Yemi amone intami, maside aneneyu emo simewana, epakemana yiga, ⁸ en ami ai mademi siyimeu. Mantemi semi fuga ugane epake yigane semo, epim yimakuku eraremo. ⁹ Yenanti Sugam muke'u. Mana maga yara sugam mukegauye emo simi dukano yare, yemi enintamono. ¹⁰ Eni aneneyui setintamino, seti aneneyui eninta mino, mini fike ano sivi mareu. ¹¹ Semi mana magafim buwateu, yemi mana magafim banayo, Semi ewanafa yenuno. Soke setifoeo, en avipim rafiyikano semo simiduka nayu manafim bago, eremo wauntayi ure. ¹² Yenampao vei, En Avipimi yikagage-eu, semo simi dukanoyi. Semi rafiyi kagau, mana wayi umanti bumantuka, amo buinta naniyi, mono yaumano sigani itemi. ¹³ Magemi semi ewanafa boteu, mana magafim wayimi e'anaya yimo'yintim bago. ¹⁴ En a a'i siyimidukau, mana magamanom avesara uyikaga, sewai mana magafike buweu. ¹⁵ Mana magafike yiviganoyara seve guye, savi waita mano a'go rafiyi kano. ¹⁶ Yemi mana magafikeno waye, Sewa'i mana magafikeno waune. ¹⁷ Fuga-wayanako uyayika. En ami fuga-waya. ¹⁸ Emo mana magafimo sisikana yiure, mana magafim siyikeuno. ¹⁹ Yenti soke ganti nekagi euno, minure yewa'i atede nekagagi ure fuga wayafim bago. ²⁰ Sigaum moke mini yanta nawaye, sekaose yimakuku inayoyi ²¹ yemi manayi ogo, emo Setifoe, sepim wanao, semo epim waunayiu. E'ana yemi sekantim baya mana magagakeno yimoneya fuga emi sisikaganave sego. ²² Ano sivio simi dukana, yemba yimeu, manafina bago, seganto bauntayiure: ²³ Semi yepim wauna, emi sepim wana. Miniyi yivigem manafim wante be, mana magamano amone na fuga emi sisikaganave sego, ayiyikano semo ayisikewanayiure. ²⁴ Setifoeo, semo simi dukana wata-anasi senampa wago yare, seti saganti amonago, semo siyigaraure simidukana saganti anantao mana maga fabarukanagai. ²⁵ Atekana Setifoeo, mana maga mano emi bu amonagafo, semi emi amonagau; yemi intemi emi sisikaganave. ²⁶ Yepimi en avi manta faka yike, minurami semo ayisikewana ayinti, yeka wa wagana semi yepim wanu.