¹ Naemi Jisasi mini wayayu siremi, bemi beyi yogam waitayunapa ena ayapa aguyiugam ayapa Kidromi bemi. Mini ayapa mana anayo wami bemi beyi yogam waita nampa yivimantare mini anayofim bemi. ² Judasi bemo manta namugoyu yiyapim dananiyi, bewai mini anayomi amonaga, nayeyara Jisasi bemi amuna nuram beyi yogam waitayu nampa me,e minifa bewam. ³ Afo magemi Judasi yivimantare bemi minifa Soldiayu nampa ano waitayuyi ofisayu nampa Farisiyu, om nampa ana om nampa aruvim aneneyu nampa buga. ⁴ Mini nurami, Jisasi wafa amone inte'uga beka fawarinanim aneneyu, atedem bem yem maro yinta'em, '''iyena afakevege?'' ⁵ Manisire sasamiduka, ''Nazareti Jisasine.''Jisasi siyimem, ''Semuno.'' Judasi bemi manta Jisasi namugo yiyapim dananiyi wa'i itarem bage'em soldiayu nampa. ⁶ Jisasi yemi manisirem yiyimemi, ''Semuno,'' yemi yintudure yinepake rufaka magaga. ⁷ Afo bemi yewayegem yintaemi, ''Iyena afakevege?'' Yemi yewayege manisiga, ''Nazareti Jisasine''. ⁸ Jisasi yiyimem, ''semi yigem yiyimi dukaunave mana mini semuno. Yigemo semo sifakewate, e'ana manamo ena waita wayi wogo.'' ⁹ Mini fawarim bemi wafa waya sirukam amakagi'emi. ''Semi mana yerama i'rukauno,emo simena.'' ¹⁰ Afo saimon Pita bainati rukage'enim kumantarem a'nom waita'i ofisa ayam ugapakena agagam akefemi. Mini yogam waita avi'i Malkusi. ¹¹ Jisasi Pitam sasamem, ''bainati yerade anapim rano. Semi mini kapi Setifo'e simipike bu'nano yare. ¹² Afo Rom soldia nampa kepteniyu nampa Juda'yuyi ofisa'yu Jisasi kareyode nanako antaemo. ¹³ Anasi waka yemi avige bemo, nayeyare bemi Kaiafasi aintami.Mini Kaiafasi'mi ano waitayi ugage'emi mini oratefim. ¹⁴ Kaiafasi bemi mini Juda'yu manisirem intim yime, awogu'ino mana waita mano masidem waita anasi'yi magu matem fuginanim. ¹⁵ Saimon Pita nampa ena yogam waita awakure Jisasi bemo.Mini yogam waita Jisasi nampa upegemi a'nom waita'i naupa, nayeyare, a'nom waita bemi wafa amonaga. ¹⁶ Pita ontaga mapa itagem wami. Mini yogam waita, a'nom waita mano amonagayi, yeradem bem mana asika ontaga rafikayi maro sasami Pita avigem uremi kugu naupa. ¹⁷ Afo mini yogam inim ontaga rafikayi manisirem Pita nati sem,''emi mi'am waita manoni kato waita iveve?'' Bemi sem,'' semi ive.'' ¹⁸ Mini nuram iyonti rewami igam agantamage a'nom waita'i yogam waitayu nampa ofisayu itare vemi yumi koko'e'emo.Pita bewa'i yenampa itarem bem aumi koko'e'emi. ¹⁹ A'nom waita Jisasi intaemi beni kato waitayu nampa bemo intim yimewananti. ²⁰ Jisasi yewayege bemi sasamem ''semi a'makai sunamino mana magaga. Maden nuram Juda'yu manafim yema duwantuo'i mono naupa wa anona mono naupa intinti yime'e'uno. Semi aupawa mana waya isigau.'' ²¹ Naugaya emi semi sintaeveve? Mana waita anasi yinta'ono semo a suna intagayi. ²² Jisasi mini waya sirami, mana ofisa be ade itarem wage'eniyi Jisasim arevemi ayanako mani sem, ''naugayawa emi yewayegewa a'nom waita yanti miniseveve?'' ²³ Aka Jisasi bemi yewayegem sasamen semi, ''semo a'fim sayeke urukanami, afo fabarure seti sayekemi seno, afo semo avogu waya sirukanami naugayava semi sireveve?'' ²⁴ Afo Anasi'mi Jisasim ayapim nanti anta ugam nampa sasakama a'nom waita Kaiafasi wapa demi. ²⁵ Mini nurami Saimon Pita itarem miniga bemi igami kanevem wage'em. Mana waita mano benanti sem, ''emi beni mana kato waita iwanamino?'' Bemi muna sevemi ''semi iwauno mi waita.'' ²⁶ Mana a'nom waita'i yogam waita, Pita mo agagam akefayini akupikeno sem, ''embaga Jisasi nampa Olivi yunapim amonauna wafi ive?'' ²⁷ Pita yewayege mini waya umerewami kokori faisirem asemi. ²⁸ Kaiafasim amapake Jisasim avimantare Roman Gavana wapa bemo anona naupa. Wanurapa ugam wamisefo yemi i'upebuga gavanani anona naupa, nayeyare yemi manta yeyige faintana uremi yemi ka yunam bu nanayonati, yemi mini nurami nevem kanami wamisefo. ²⁹ Minugami sefo Pailotimi mapa kuntavem yemi siyimem semi, ''naye sayeke urukaga mana waitami yigemi koi sasakevege?'' ³⁰ Yemi yewayege bemi sasame semi, ''Afo mana waita'mo sayeke anta iyuruka nayami, seyuyami en ayapim avigeya mare irateyare.'' ³¹ Afo Pailoti manisirem yemi yiyimem, ''yigenana'o bemi avige marore ko amego, yigeyi kaga waya awakunte.'' Yudayu ben a'ga wayede sasame semi, ''anom a'ao sigane seyuya mana waita aruma fuginti.'' ³² Yemi mini waya semi wafa'o Jisasi siruka wayami amakagi inoyanti semo, ma mini wayayui bemi yiyimiyi mano yigatem iteyiom fugira beka fawar itenafi. ³³ Afo Pailoti yewayegemi Gavanani anona naupa untavem Jisasim araremi intaemi, ''emi Juda yuyi kina beve?'' ³⁴ Jisasi bemi manisirem yewayegem sasami, ''mana mini waya sinta ona enanao eyi intitike nafi ,o mana'a waita yuano sasameya semi sintaieveve?'' ³⁵ Pailoti ben aga wayedem semi, ''semi Juda waita begafu? Yemi eni wata anasi nampa mono naupa yinom waitayu yemi emi sentiyapim mareruka. Emi nayeyantaga uwaranave. ³⁶ Jisasi yewayegem semi, ''seti kindom mana magaga kenawaye. Afo seti kindom'mi mana magaga kena wage'em sina, seti yogam waitayu senanti aruwomi namugoyu semi manta Juda'yu yiyapi irararomi.Minugamifo, seti kindom'mi, mana magagake nawaye.'' ³⁷ Afo Pailiti benanti sem, ''emi mana kina beve?'' Jisasi bemi yewayegem sasamemi semi, ''emi senanti semi kini've sewanani. Mini yogakage setino'e semi maduka, Minuga'i semi mana magaga ye'u mana yogantana mararanti, fuga waya yiyimira. Masidem waita fuga waya awakurewayi yemi se a suna intevemo. ³⁸ Pailoti benanti sem, ''fuga wayami nayewafino?'' Bemi mini waya siremi, bemi yeradem mapa Juda'yu wapa kuntavem yemi siyime, ''manini waita'i sayeke bu afakauno. ³⁹ Yigemi mapa avu'ava rukami minimo semo awakure vunami anom nuram ka ayam nam nurami. Kugam waita yupike semi mana kugam waita sasakaunami mapa bevemino. Minugafo yigem yiyevene semi mana Juda'yuyi Kini sasakanam binoyanti yigepa?'' ⁴⁰ Yemi yerade aramanti semi, '' ive mini waita, Barabasi sasakana kumino magufage.'' Barabasi wata yuyi anene dirifarem umon marewam waita.