¹ Vaa Karaisiva handamvunra indairo tii raqu sesanda te ati varioro. Sangue amase dii vari he eena kora saiqa huti, mvia umina saiqa vaindi variate. ² Ni akate, ne Poruva nii timva mvioko. Nee neena mvamvana tooqevao mvia Karaisiva he io nii mvoo hinrainda mvoo saiho ananrove. ³ Ne hatase enanaqa timva oqa sione, hesa vaindi dasave neeri mvamvana tooqasa hisaqi. Nee sangue amase hesana kua mvanra mvia vatavare kuate. ⁴ Nee Karaisira sesari variasa, dasave kua mvanra he suqe hindutasiasa, nee he io kotira suqeera mvia hindutamase akevarave. ⁵ Sootuta Mvanraqunra sanguesa vaqa, uttave tira gaharasa vaqa te tiroma varinda suqe gahara hutuoro. ⁶ Yesusi Karaisiraqi mvia, vaindi vano mvamvana tooqove siso he tooqove mvia, he mvia mvooqanrata siananrove. Mvia mvundusa vaiva vano te Kotirara mvundusa vasi uttave iorana mvia sangue amse tutaterave. ⁷ Nee io suqe mase Yesusira vaatarasa varianae. Utta kua mvia he vaatate tio, mvia davavano nii huvaikine? ⁸ Kotiva nii nraunda siva hiva he io hitase vusato tuatetio niinra tinanrove. ⁹ Hunra kua mviisa mvoosa nii hesa timva mviava hiva korama vaiso. Iisi pataqatana parawaqi vatavao hiva mvia vara soota senema. ¹⁰ Ne Nronranra uttave ioko, nee vaiqa he io mvoo hinraida mvoonra uttave tivae, suqe mvasasa haara nraasuqave. Nraaseve, ohrave nii vito kora saiqaqi kuariva hiva vaiqa kora sooqa varananrove. ¹¹ Ni atta vaasao, mvoosa ia tiive ne nii timvamvina ioko seevanda hisa nii mvamvana tooqate iane. Ne nraanru he Karaisira vate mvia hita iokavave, haamvia ne he mvoovaqa hisa timva mvi neena mvamvana tooqate vaqa ioko. Hisa naa kuave iava hiva he uttarave; hesirao mvia, he io mvoo vano haamvia ni hario ruqutua nanrove. Ahoo, ne nii timvamvi ioko vaindi vano saatoti hisa neeri mvamvana tooqase Karaisira vatareve ti mvia, uttaara mvia Karaisiva satarisa utiva hiva hisara mvia umina hinrainda asiso. ¹² Ni mvundusa vaiva vano nii vusato vara hambiqasiasa hisa neeri tamva mvia hesa tooqa raaqu sate! ¹³ Ni atta vaasao, nee ati variate tio Kotiva niinra hasara reene. He iate ati varioro timvande ena kora saiqa mvia hutuate. Nee vano nainra nainra mvundusa vasi suqe siate, naaqamave nee ati variavo. ¹⁴ Yesusiva tiso; Mosesira kua mvanra hisa hesa kua mvanra guaqi osa ovara siavo. Hiva hata vaiso, "Rerara mvundusa vasiaranemase rera henanranra vaqa mvundusa vasiane." ¹⁵ Nee nainai ruqutuse korama mvate mvia, nee io vaiqa nainai vara korama vatevarave. ¹⁶ Hita sisana ne nii timva mvioko, nee vano Sootuta Mvanraqunra mviaqi ruenda, nee vaiqa Kotira vusa kora saiqa hutuare sivao nii goha siananrove. ¹⁷ Toorua vura mvundusa hiva he Sootuta Mvanraqunra mvianra mvundusa vaisaro, Sootuta Mvanraqunra hiva nainra vaqa he mvundusa vaivave. Hitaasiranda, taara hitana nrautua variva mvia, nee he ioo mvoo hinrainda mvoo hutuare mvundusa vasina mvia hutivave. ¹⁸ Sootuta Mvanraqunra vano nii nriqi tiranda mvia, He io kua mvanra hiva nii nriqi tinanrove. ¹⁹ Hamvia toorua vura gahara mvia vaindi vano hutina mvia omvatasa akerane. Hora hambaki huti, kora vusato ti, mvoosa korama mvate, suqe kua mvanra mvia rupiara gahara mvianra mvundusa vaive. ²⁰ Hura kotisara vaqa mvanraqunra kora siasara vaqa rotu ia gaharara vaqa rapi, he mvoosa suqesi, hinronrasi, vu nramvanri asi, nranranruti, neeriara nraasuqa mvundusa vasi, he kuairasi vari saiqa huti, neeri mvundusa vaisa vaqa nraasuqa kuairasi vari, ²¹ mvoosa sia hinraindarara mvundusa ri, wera nrambu nrenda vaindi sia hinraindara varenda, hita saiqa mvoosina vaqa hutuane. Hamvia ne ena nii timva mvioko, vaa vuri nii timva mvionema. Vaindi davave hita saiqa hutuariva hiva he io Kotira mvaatusaqi kuananrove, Yesusiva kingi vario tunuanri hisararasa. ²² Sootuta Mvanraqunra mvia sara mvia; mvoosara mvundusa vasia, mvoqare, vura tirosira vaqa vari, tiroma vari, he vura nranranruti, mvoosa saihoqe hisa suqesi, hesana nrau avu avumase nrue, ²³ Suqe gahara mvoosa taaravite, toorua vura mvundusa vaina vara mvatari asirana, mvii gaharasa hisara kua mvanra mvoo vano he aho vaqa tine. ²⁴ Te dasave Karaisirani amase variorasa hisa, te kora saiqa hutuorana mvia vaa soorane. Vaa Yesusira vaqa naunri satarisa mvia hiritavao vaa utio taiqenae. ²⁵ Te Sootuta Mvanraqunraqi vari mvia, te saararo Sootuta Mvanraqunra vano tii nriqi tuarive. ²⁶ Te vano mvia he tetara mvooqare, he mvoosa vura nraanra nrutuarina huti, he mvoosa vate hinraindarara vu nramvanri asiare.