¹ Ne hatase ioko, hesana hinrainda Ova siva hiva mvia nraaqinra nive, nraaqinra hiva pata vario mvia hiva saiqa vaindi ama variso. Hiva mvia hoona haana mvisasa hinatio mvia vaqa. ² Hiva vano mvia , mvia nana hinraindasa vaivarara tua vaindisa vaqama mviasa hinatua vaindisa vaqama mvemvanri asio varirao daireve mvia ova mvia nraunda sirao mvia hiva hisasa hina tuananrove. ³ Hitamase, te nraaqinra variorao, mvata hainona gahara vano vaqa vusato pataqani vano vaqama tii hadamvunra hutu tesanda mviqi variorane. ⁴ Nai Kotiva vano hisara nraundamandero osa ovarta sione timvandenasa, Kotiva nai mvaapu mvia sesaro mvata haino tunisaro, nraase mvoo vano kua mvanra mvemvanri asi varianaqi mvia mvatene. ⁵ Kotiva hitaso eena sooqa hutuso nraase ohra kua mvanra mvia mvemvanri asi variasa vitanove. Hita sisaro hiva vaiqa tii vaqa vita nanrove, nai mvaapu mvia nraananamaso. ⁶ Hamvia te mvia mvaapu mvia nraananamase varioro. Mvia hosara sara Kotiva nai mvaapu mvia mvanraqunra mvia sesaro tii vuraqi vario hiva hasara rero, "Goh, Goh!" tiso. Hiva taaravito tiso te Kotira nraaqinrave. ⁷ Hitasisanda te he mvoo vaqa umina saiqa vaindi varioro. Aho. Te Kotira nraaqinra varioro. Re Kotira nraaqinra varirandera mvia, mvia io hesana hirainda nraundamaso ri mvianeve tina mvia, io ri ova ri mviananrove. ⁸ Re Kotira he hindutasia mvia, re hunra kotisa, he utara mvanraqura variasa hisara rotu tia, hisa umina saiqa vaindi variarane. ⁹ Mate nee Kotira hindutasiavo, hiva nii Kotivave. Mvoo vaqa suqema vaine, seqe ne iane Kotiva vaa nii hindutasiso. Data sisandave nee ena hane mvata hainona gahara he mvia hosara vaqa vaina mviqi kuare siavo? Nee ena horo mvia umina saiqa vaindi variareve siso? ¹⁰ Ne akokanda nee nronra amase mvoosa vano nronra hisara mvoo nraundamase vate, hisarara mvoosave siso, toora mvoosave siso, hii mvooqi mvoo hinrainda hutuate iana mvia nee vaate hutuavo. ¹¹ Ne niinra ohramase sato tuoko! Ne nii vaqa vari saiqa sangue amase hutuokava hiva vaiqa akokaro uminasa virao, he mvia sara vaqa vasira amave. ¹² Ni atta vaasao, ne nii sapararuoko, nee ni nrananamse variate. Ne he sookaro kua mvanra vano nisa hinatine. Ne kua mvanra mvia sena mvia ne nii nrananamase varione. Nee vaqa hunra kotisa hisa tutase ati variate. Vurina hisararasa ne nii nraini kokanda nee he korasina mvoo vaqa nisa hutuane. Hamvia nee hitasiavana mvia ne niinra ohramase sato tuoko. ¹³ Nee hinduta sivave, ni mvamvanasa nriqa virava mvoo vano nrisana, ne vuriqamase nruma niiqi suqe mvasasa mvia timva oqa sionae. ¹⁴ Ni mvamvanasa nriqa virava vaisanda nee muanra varane, nee he ni vara korama mvatenda mvoqa mvianae. Nee ni vitare mvia, enseri mvoove siso nai Yesusira Karaisira mvia vitare sianemase ni vitaane. ¹⁵ Hamvia nee he mvoo vaqa mvoqaravo! Ne rapise nii timva mvioko, hataru vano vasirondera mvia, nee io neena vu mvia raqusenda ni mive. ¹⁶ Hita sisana ne ohrama mboo asioko. Ne nii nrautua ama varioko, naaqamave ne niiqi tariaqamase Yesusira suqe mvasasa utta vaina mvia timva oqa sioko. ¹⁷ Suwisi kua mvanra vaatasa hisa sangue amase nii vite vivanda hisa vaataterave, hisa mvia he nii suqeerara hutuavo. Hisa mvundusa vaiva vano nisanondai nii huvaise mvaaqanai vatee vanda, nee vaiqa hisa mvundusa vaina vaatare sangue vusato varevarave. ¹⁸ Mvoo vaqa suqeema vainae nana hinrainda mvoo mvia hoosara suqeva vasiarinanra vusato tira nronra vaqa sirao mvia. Vusato nronra tira gahara hiva nii vaqa vasio mvia, hiva vano mvia, mvia hosara suqe siariva nii vaqa vasiarive. Ne he nii vaqa variari hisarara mvino. ¹⁹ Ni nraaqinra pata hasao. Ne niinra nriqa virara nronra varoko, nraase vano nraaqinra mvatano nriqa virara varene masena. Hamvi nriqa virara mvia ne vara vare vinaa sarinda, nee nai Karaisira mvia nrananamase variate. ²⁰ Nronra amaso ni mvundusa vaiva vano hamvia ne nii vaqa varina nii vaqa suqemase kua iatara, hamvia ne he hinduta sioko naa hinraindave nii vaqa hutuarina mvia. ²¹ Seeqe ne ena nii timva mviane, mvoosiasa nii mvundusa vaiva vano nee Kotira kua mvanra mvia hesa vaatareve. Nee io hesa hindutamaseve riavo kua hiva tina mvia? ²² Te kua mvanra mviiqi nanra tuanisa riorao tiso, Abrahamuva hiva mvaapu taarama ovave. Mvia umina saiqa nraase mvia Hagavave, hiva mvaapu mvoo mvatene. Ati vari nraaseva nai mvia nraata hiva Seravave, hiva mvaapu mvoo mvatene. ²³ Hagava Ismairira mvatene, hiva neeri vaindi mvamvana mvundusasa ovara sine. Serava Aisakira mvatene, hiva vano mvia nai Kotira mvundusasa hiva nraundamande kuara mvia ioqama dano mvia ovara sine. ²⁴ Hamvia mvii nraasesa mviitana vano mvia kontraki taarama nraundamase variavo. Kotiva Isareri nraase ohra vaqa toorua kontraki mvia Hoora Sainaisa hutine. Mvii kontrakiva hiva vasiranda, Isareri hisa mviaqi, umina saiqa vaindi amase kua mvanra mvia mvemvaqi variaterave. Hagava umina saiqa nraase hiva mvii kontrakira mvia nraundamaso variso. ²⁵ Hagava hiva Hoora Sainai mvia nraundamaso variso, Arabia mvataqi. Hagava hiva Serusaremu mvaatusa mvia vaqama nraundamaso variso hamvia vaqa. Serusaremu hiva umina saiqa vaindi hisa nroova amaso variso. Hiva vaqa, mvia nraaqinra hisa vaqa, mviiqi varia nraase ohrasa hisa vaqama umina saiqa vaindi amase variavo. Hisa vano mvia hesana kua mvanra Kotiva Hoora Sainai sanondairo mvina mvia vaatavare vivarave. ²⁶ Karaha Serusaremu nau mvaatusa inava hiva, tii nroovave te dasave Karaisirara uttave iorasa hisa, mvii mvaatusava hiva ati vaiso! ²⁷ Karaha Serusaremu mviiqi vaaqara nraase ohra vano varive. Mviiva vaiqa toorua Serusaremu mvia vaqa saataramaso vasiananrove. Mvianra nrandara nrianrina ti vaindiva Aisaiava vavarama deva tiso, "Re davave Serusaremuqi varirava hiva mvooqarane! Re hamvia he nraaqinra vaqa sia, nraase vano he nraaqinra vaqa siva varinemase variarava! Mvoo nrau re vaiqa mvoqare hasara renanre, hamvia he nraaqinra vaqa sia mvia vaqa. Nraase he io nraaqinra mvaatarina vootimase variarava. Re vaiqa nraase neeri doosa vaqa vari nraaqinra mvaatasa hisa vaqa sataramase nraaqinra vaqa sinanre." ²⁸ Atta vaasao, nee Aisakira nraananamase variavo. Nee nraundamaso mvianeve timvande nraaqinrasave. ²⁹ Mvii hisararaqi nraaqinra vaindi mvundusasa ovara siva hiva, mvanraqunra mvundusasa ovara sina mviasa muanra vatenae. Hamvia mvii gaharava hiva ati vaisanda.Yesusiva nraundamande hinraindarara uttave iasa hisa korama mvataavo. ³⁰ Kotira kua hinai vano hata tiso: Umina nraase mvia vaqamase mvia mvaapu mvia vaqa raqusane.Naaqamave, umina saiqa nraase mvia mvaapu hiva, he io ova siari hinraindasa hisa duamaso nai nraata ati vari nraasera sanondairo mvatatena mvia vaqa mviananrove. ³¹ Hitamave atta vaasao, nee he umina saiqa nraase mvia nraaqinrave, nee ati vari nraasera Serara mvia nraaqinrave, nee vaqa ati variavo!