¹ Garesia inasao, "Nee hambiqasiavo! Dava vanove niisa he sasasi kuara vateso? Ohsa nii vusa Yesusi Karaisira satarisa naunri hiritane. ² Ni mvundusa vaiva vano nee gua hinrainda ni timva mviaterave: Sootuta Mvanraqunra vano niiqi tunina mvia, nee Mosesira kua mvaanra mvia vatavaove siso? Suqe mvasasa mvia rienda Karaisirara uttave iavaove niiqi tuniso? Hiva datama ovara sine. ³ Nee io hambi asiavo! Nee vuri nena vura Kotira mvianae mvanraqunra vano nii hurusisanda. Haamvia nee satoti iavo, te mviiqi varivare vindaa utuarasave timvande nee nena sanguesa mvanra kua vataavo. ⁴ Hesana muanra Karaisirara uttave ianondai varana mvia, nee he mvianra uttave tivao mvia mvii muanranra varava hiva umina asianaove. ⁵ Haamvia Kotiva niinra suqe sio nai mvanraqunra nii mvio nronra hinrainda niisa hutiso, nee mvianra satoti iavo nee Kotira mvanra kua mvia vataavaove? Nee mvia suqemase hindutasiate naaqamave nee Karaisira suqe mvasasa mvia riana, mvianra nee uttave iate! ⁶ Mosesiva Avarahamunra mvasasa vavarama denaqi tiso, Avarahamuva Kotira kuara uttave tisaro Kotiva mvianra avu avuma variara vaindio tine. ⁷ Nee vaqa hindutasiate, dasave Karaisirara uttave iasa hisa Kotiva varaso Avarahamunra nraqinra hutuso vateso. ⁸ Vuri he Suwisi hosara asiasa hisa uttave iana sanondai hisa Kotiva vusa avu avuma varianae, vaqara vaindi vano vaa vuri vavarama danae hiva hitasiari mvasasara mvianra. Te mvasasa tuani akorao Kotiva Avarahamunra suqe mvasasa hamvia timva mvine, "Naave ree hutuarana mvia sanondai, ne vaiqa heesana nraase ohra mvata haino variasa hisa suqema mvataanae." ⁹ Te mvia sanondai hinduta sioro, dasave Karaisirara uttave iasa hisa Kotiva Avarahamunra suqema mvateenema mvia hisa vaqa suqema mvateeso. ¹⁰ Kotiva dasave mvaanra kua vaate mvia nrutu tuaherare sisa hisara muanra varate tiso. Hiva hitama vaiso, nee mvasasa mviiqi tuanise akate, "Kotiva vaiqa heesanasa dasave, kua mvaanra Mosesiva vavaramandeva mvaanra bukuqi vaisa hisa, he heesa avu avumase vaata taiqa sesa hisa vaiqa muanra heesana nrau vare varina mviananrove." ¹¹ Kotiva tiso vaindi dasave mvia vusa suqeemase varisa hisa, hisa he mvi muanranra mvia vare varave, naaqamave hisa kua mvaanra mvia vataasave. Re kua mviqi tuania akane, "Hesana vaindi dasarave Kotiva suqeema variasave tisa hisa naaqamave Kotirara uttave iasave." ¹² Dasave mvaanra kua mvia vataare si, he Karaisirara uttave tisa, "Hisa toohare mvaanra kua ina hinrainda hutisa hisa, hesa mvaanra kua hisa vataate." ¹³ Kua mvaanra vano tiso, hesana nraase ohra he kua mvaanra vateesa hisa luqutu saate tine. Karaisiva tii mvaata varo nai hiva tiira utine. Kotira kua vano tiso, "Vaindi naunri satarisa hiritasa hisa mvia korasi raumbiri sia vaindi save." ¹⁴ Kotiva Abrahamunra suqeema mvaato mvianra tiso, ne vaiqa heesana hosara inna mraase ohra hisa vara suqeema mvatarine tine. Karaisira saiqa mvinondairo mvia, haamvia kotira suqeesiva hiva heesana nraase ohra vaqa vaiso. Te hesanasa Karaisirara uttave ti Sootuta Mvanraqunra varare, vuri Kotiva tinee mase. ¹⁵ Ni atta vaasao, Kotiva mvianeve tio nraundamadeva hiva, vaindi taarama vano gua vura vari kua huvaikuse mvoo hinrainda mvoo hutuare sianema vaiso. Hisa kua huvaiqutena mvia, he io vaindi mvoo vano raaqiove siso mviasa kua mvoo vaqa rutaquso vataananrove. ¹⁶ Kotiva Abrahamunra vaqamaso mvia nraaqinra mvia vaqa nraundamaso tiso, ne vaiqa nii suqeema natarine. Kua hiva he tiso, "Ri nraaqinra hisa vaqave," mvia vaaqarave, "Ri nraaqinra mvia vaqave" tiso, mvia karaisira guara tiso. ¹⁷ Ne mvianra ioko, Kotiva toharo Abrahamunra vaqa gua vura vario mvia kua mvaanra 430 hii mvooqana Moesira mvina mvia, he io raaqivarave. ¹⁸ Te kua mvaanra mvia vaate Kotiva tii nraundamade hinraindasa hisa varare mvia, mvia he te tii nraundamande hataruraqindai varoro. Tee hinduta sioro, mvia vaa Kotiva Abrahamunra nraundamaso hesa mvii hinraindasa hisa mvia mvianeve tine. ¹⁹ Data vaisarove Kotiva nai kua mvaanra mvia tii mviso? Mvia; Kotira mvundusa vaiva vano mvia, kora saiqa (sini) mvia hoosara hiva omvatasa ovara siariverave. Hita vaisaro, Kotiva mvianeve tio nraundamado mvia, mvina mvia kua mvaara mvia vaqa mvinee. Mvia mvundusa vaiva vano, kua mvaanra hiva vasi varo virao hiva nraundamande nraaqinrava hiva ovara siari hisarararva nrianrive. Kotiva kua mvaara mvia enseri mvisanda hisa hutasanona vaindi timva mviavaro hiva tii timva mvine. ²⁰ Haamvia, vaindi mvoo vano mvoonra vaqa kua tirondera mvia, mvia he hutasa vario kua varo nruanri vaindiva vaqa variso. Kotiva nai vano Abrahamunra nai timvamvio mvia nraundasine, mvia mviano ti hinraindasa hisa. ²¹ Kua mvaanra hiva Kotiva nraundamande hinraindasa hisa vaqa nrautua amave vaiso? Io heve. Te io kua mvaanra mvia vate mvia Kotira vaqa heesana nranru variarane, hiva io tiira suqeetamase variasave iananrove. ²² Hiva he io hita vainove. Te hesanasa koora saiqa hutuorao, kua mvaanra hiva tii vaqamaso heesana hinrainda hisa vaqa handamvunra maso vato tii nriiqi tiso. Kotiva tii nraunda sio tiso, dasave Yesusi Karaisirara uttave tisa hisa, ne vaiqa handamvunra mviiqindai raaqu aqiri sarine tine. ²³ Vaiqa Kotiva suqee mvaasasa mvia ovarama seranda nraase ohra vano Karaisirara uttave iare siavao mvia, kua mvaanra vano tii handamvunra mandesanda he io orosi nuanra asiorane. ²⁴ Kua mvaanra hiva tii hinati ova amaso vario, tii vita varo Karaisira nraini viraqe, te vaiqa suqee mvaasasara uttave iararo Kotiva tiira avu avumase varia nraase ohrasave iananrove. ²⁵ Haamvia uttave tira hisararava hiva vaa ovara siso, he te mvoovaqa hinati ora mvia mvemvanri asi variarane. ²⁶ Nee heesanasa Yesusi Karaisirara uttave ti, mvia vaqa tambama vari, mvii gaharara mviinondai mvia nee Kotira nraaqinra variavo. ²⁷ Nee nraase ohra nrambu vare Karaisira vaqa tambama variasa hisa, haamvia nee Karaisiva hiva varine mase variavo. ²⁸ Karaisira hoosara mviiqi he Suda vaqa Griki vaqave. He umina saiqa vaindi vaqa, ati variasa vaqave. He nraase vaqa, he ohra vaqave. Hamvia Karaisiraqi mvia nee heesanasa hisa gua variavo. ²⁹ Nee Karaisira hoosara varirandera mvia, mvia nee vaqa Abrahamunra nraaqinra variavo. Nraanru Kotiva Abrahamunra nraundasio tiso, ri hoosara hisa mvianeve ti hinraindasa hisa varesa, hisa mvia neeve.