¹ 14 hii vano nrio taresanda mvia mvooqana, Banasiva vaqa, Taitusiva vaqama, Ne vaqa, te ena Serusaremunri korane. ² Tee korane naaqamave Kotiva ni timva mvio tiira nee kuate tisandave. Ne huqeeta amase uttave iasa nronra vaindi hisa timva mvione, ne suqe mvasasa timva oqa siokanda tutasa, hisa he Suis hosara. Naaqamave ni mvundusa vaiva vano ne hitasiarinda hisa ake uttave iate naave ne timva oqa siona mvia. Ni mvundusa vaiva vano ne hitasiariro he ne nuanriva hiva umina asiariverave. ³ Taitusiva hiva he Kotira hosara ina vaindive, hiva ni vaqa varisanda he hisa mvia vaqa sangue amase kua ti rera mvamvana tooqane ianave. ⁴ Vaindi mvianra rera mvamvana tooqane iasa hisa he uttave iasave, kumvanri mvia iavo te uttave iorasave iane. Hisa nraaqanrindai tii akareve, datamaseve te Kotira kua vaate Suwis kua mvanra vatasa hisa he vaatorana mvia akareve. Te hindutasi ioro Yesusi Karaisiva mvii indairo tii raaqu mvaanra mvatasa vatene. Hunra ia vaindisa hisa tii ena vitase kua mvanra mvia umina saiqa vaindi ama vatareve. ⁵ Mvamvana tooqara mvianra te he io pataqasa vaqa hisa vaqa gua vura variorane. Te he hisa kua mveemvanri asiorane, naaqamave utta mvasasa suqe haa hiva niiqi mvoo vaqa viovaria riverave. ⁶ Mvoosa iavo te nriqi tuora vaindisave iasa hisa he io ne kua timva oqa siona mviino tomaqase tive. Hisa nronra vaindi sinda mvia vaqa, he hiva mvoqanrataama vaiso. Naaqamave Kotiva hiva hesanasa hisara guaqaaramaso mvundusa vaiso. ⁷ Nriqi tua vaindisa hisa hindutasi iavo Kotiva vano nianra he-Suwis hosara hisaqi suqe mvasasa mvia timva oqa siane tiso iane, Pitava suqe mvasasa Suwisi hisaqi timva oqa sinema. ⁸ Kotiva Pitara sangue mvisaro hisa aposeri ama Kotira mvasasa vara Suwisini vine. Hiva guaqaarama ni vaqa, sangue mvio aposeri ama sesana ne mvia mvasasa vare he-Suwisi hosarani koko. ⁹ Nriqitua vaindisa hisa hindutasi iavo nai Kotiva vano saiqa hamvia ni mine. Semsisa, Pitasa, Sonisa, uttave iasa nriqi tuasa, vaaqara vano hisa hindutasi hisa vauta iasa, hisa tii saaqu mviane naaqamave te hisa gua saiqa vaindi siorandave. Te gua vura variorane Kotiva tii titero he neri mvamvana tooqa hoosarasa nraini kuate tisanda. Hiva ni titesana Suwisi hosara vano neeri mvamvana tooqasa nraini konae. ¹⁰ Hisa tiira sangue amase iavo, Serusaremuqi uttave iasaqi haarara amase variasa hisara he taunru sate, hisa saihoqate iane. Io mvii saiqara mvia ni hutuata sivave. ¹¹ Ne Antiokuqi variokaro pitava mviqi nrisana, ne mvia vuana akena ioko, re naa gaharave hutuarava hiva he avu avumaso vaiso. ¹² Mvia hironra sina mvia, Pitava Antiokuqi horo vario he Suda hosara uttave iasa hisa vaqa sara nrene. Nrandara Semisira vaqa variasa Suda hosara uttave iasa Serusaremu inasa, Semisiva titesanda Antioku mviiqi kuane. Pitava hisa ako satusio he Suda hosara uttave iasa hisa vaqa sara nrena mvia so he ena hisa vaqa vario sara nrene. Waa Suda hosara uttave iasa Serusaremu inasa hisa ni nakevo tio. ¹³ Suda hinri Antioku mviiqi variasa hisa vaqa mvia hunra vusato mvia vaatane. Banabasiva vaqa sato tio tiso, seqe ne he Suda hosara hisa se he hisa vaqa kuairasi varine! ¹⁴ Ne akokanda hisa he uttara Karaisira suqe mvasasa mvia vaatane. Hesa uttave iasa hisa nri kuaira siavana, hisa vusa Pitarara ioko, "Re Sudave, re he Suda hosara he kua mvanra vaatasa nrananamase variaro. Re dataseve he Suda hosara hisara tiranda hisa Suda nrananamase variva?" ¹⁵ Te Suda vano tii mvatatasave, he mvoo hosara kora saiqa hutuasa, Kotira kua mvanra he hinduta siasa hisa vano tii mvatatasave. ¹⁶ Hamvia te hinduta sioro, vaindi vano Kotiva Mosesira kua mvanra mvina vatariva hiva he Kotira vu mvino avu avumaso variso. Vaindi davave Yesusi Karaisirara uttave iariva hiva nraasuqa Kotira vusa avu avumaso variso. Te Suda mvoo siorasa vaqa Yesusi Karaisirara uttave ioro. Naaqamave te hita siararo Kotiva tiira avu avuma variasave iariverave, he Kotiva Mosesira kua mvanra mvina mvia vaatararove. Kotiva tiso, vaindi mvoo vano kua mvanra mvia vaatarina mvianra he ne iane re ni vusa avu avumaso variaravae iane. ¹⁷ Te Karaisirara uttave ti, Kotira saparari ioro te ri vusa avu avuma variareve ti mvia, te kua mvanra vaatorana mvia pikare, kua mvanra hiva taravito tiso te kora saiqa mvia hutuo rasave. He hiva taravito tiso Karaisiva hiva kora saiqa hutivave tiso. Ahoo! ¹⁸ Ne ena iane, kua mvanra mvia vaate mvia Kotira vusa avu avuma variane ti mvia, ne nrau nraapara rukuraqio orosina mvoo, vaindi mvoo vano ena hutine mase varioko. Hesanasa vusa mviqa ne Kotira kua mvanra rupioko. ¹⁹ Ne nena sanguesa Kotira kua mvanra vaatanesi mvia, ne uti vaindira votimase varioko; kua mvanra hiva ni ruqutuseso. Hita sisana mvia ne mvanraqunra vari mvia Kotira nrutu tuaherane. ²⁰ Ne torua vario mvanraqunrara mvia vaa Karaisira vaqa naunri satarisa hiritane. hamvia ne mvanraqunra variona mvia he nena mvanraqunrave. Karaisiva ni vuraqi vario ni nriqi tiso. Hamvia ne varina naa hinraidave hutuona mvia, ne Kotira mvaapu mvianra uttave ioko. Hiva gua vano nai mvanraqunra sesaro kotiva ni kora saiqa taunru mvatene. ²¹ Ne he Kotira suqesina mvia raaquse tosandata vatoko, te avu avuma vai gaharara mvia kua mvanra sanondainda vararera dera mvia, Karaisiva hiva umina utuananrove.