^{1- 2} Ne Poruva, ne vavaramase ni atta vaasa nrunra nraasa Garesiaqi variasa niini soko. Ne Poruva, aposerive. He vaindi mvoosa vano ni vara aposeri vatanae, he Kotiva vaindi mvoonra tisaro hiva ni aposori nraundama dene. Ne aposerive, naaqamave Yesusi Karaisiva vaqa Ova Kotiva vaqa ni titanae, Ova Kotiva, Karaisiva utina huruma sesaro ena dio vinae! Heesa uttave iasa dasave ni vaqa haqi variasa hisa niinra vaiharara iavo siosi Garesiaqi variasao. ³ Ne nunamvu iariro tii Ova Kotiva vaqa Nronra Yesusi Karaisiva vaqa nii sahoqero vura tiro sira nii mvianrive. ⁴ Kotira mvundusa vainasa Yesusiva nai mvanraqunra seenae tii kora saiqara, hitaso vaindi mvata haino kora saiqa hutuana hatarura indairo tii vita raqutenae. Hiva tii Ora Kotira mvia mvundusasa mvia hutinae. ⁵ Mvia io uttarave, haamvia Kotira nrutu tuaherarava hesana nrau hesana nrau kuarive. ⁶ Ne hinduta siane, Karaisiva nai suqeraqi niinra hasara rene mvianra uttave iaterave. Haamvia ne enanaqe nrisara sina akoko nee he mvianra uttave iana! Haamvia nee mvoo kua mvoo kuara uttave iavo, mvia mvoosia vaindisa iavo uttara mvia Kotira suqe mvasasave. ⁷ Karaisiva he ena mvoo suqe mvasasa vaqa tii timva mvinae, mvoo vaindi vano nii vara hambi asiavo. Hisa Karaisira suqe mvasasa mvia hinriqa siare hutuavo; hisa mvundusa vaiva vano nee uttave ti iate, Karaisiva mvooqarama nana hinraindarara kua tine. ⁸ Te aposeri vanove siso , enseri naunri variasave, suqe mvasasa mvia he vaa tee nii timva mvionranema tisa, Kotiva hesana nrau hisa vara korama natananrove. ⁹ Te vaa nii timva nionrane, haamvia ne ena niinra ioko vaindi mvoosa suqe mvasasa amase nii timva mvivao suqe siranda, vaqa mvia he nee uttave iana mvia vaqa guaqaarama vainae. Hita sisana ne Kotira saparari ioko hita sia vaindisa hisa vara korama natane hesana nrau. ¹⁰ He ni mvundusa vaiva vano vaindi vano nianra mvundusa vasiate, naaqamave nai Kotiva ni nraundama denae. Ne vaindi mvoqarara mviane saiqa huti mvia, mvia ne he Karaisira saiqa vaindi varioko. ¹¹ Ni heena uttave iasao, ni mvundusa vaiva vano nee hindutasiaterave, Karaisira mvasasa nraase ohraqi timva oqa siona mvia he vaindi vano ovarama danave. ¹² He vaindi mvoo vano suqe mvasasa hamvia ni timva mvio aamvuqene. Nai Yesusi Karaisiva hiva vano ni timva mvine. ¹³ Nee vaa ni mvasasa mvia riane ne furi Suda Suda hosara vano rotu iana mvia vaatone. Ne Kotira siosi hisa muanra mviokava mvoo vaqa visana ne mvia vara koora mvatane sione. ¹⁴ Ne nronra ama hinduta sira vaqa sionae Suda hosara vano rotu iaa gaharara mvia, nena gua hosara hisa vaqa mvaanramase nena nraase ohra hisa hutasa varione. Ne ooramase vura nranra nrutuone Suda mvoo siasa he tii nraaqusa taatosa rotu iaa gaharara vaatana mvia vatavana. ¹⁵ Datamave, ne nena noonra vuraqi variokaro Kotiva ni nraundama denae, hiva nai sasa sinasa mvia hutine. ¹⁶ Hiva nai mvaapu Yesusira mvia ni taara vitene; hiva hitaso vateraqe, he Suda hosara variana mviiqi mvoosa vaqa mvia mvaapu suqe mvasasa mvia nivano timva mvianriverave. He ne amvanramase vaindi nrainindai mvasasa hoosara mvia mvoo vaqa hinduta siane kone. ¹⁷ He ne amamvanramase Damaskusi sena Serusaremunri ni vuri aposeri variasa hisa akane kone. Ne Arabiari he vaindi varianaqi kokava, ena hane Damaskusiri nrione. ¹⁸ Taara moma hii mvooqana Kotiva suqe mvasasa hamvia ni vusa vara oosa sesana ne Pitara akane Serusaremunri kone. Ne mvia vaqa 15 hisararara varine. ¹⁹ Ne Semisira vaqa horo akone, Nronra Yesusira atta vaasa hinai Serusaremuqi uttave iasa hisa iata vaindive, aposeri hinri hisa vaqa he akone. ²⁰ Kotiva hinduta siso ne naave niini vavarama dokava hiva io uttarave! ²¹ Ne Serusaremu sena, Siria vaqa Sirisia mvaatari konae. ²² Mvii hisarara mvino uttave iasa siosi mvatusa Sudiaqi variasa hisa he ni akane. ²³ Hisa atti riavanda mvoosa vano iavo, "Poruva, vuri Kotirara uttave iorasa muanra mvio vara korama nateva hiva, haamvia hiva vaqa suqe mvasasara te uttave iorana gua mvia timva oqa siso, vuri mvia huvaikuano sina mvia!" ²⁴ Hisa Kotira nrutu tuaherane naa gaharave ne hutuona mvianra.