¹ Atta vaasao, nii indairo mvoo vano kora saiqaqi tuma rirondera mvia. Nee atta vaasa dasave rotu tira gaharaqi sangue amase varisa hisa, nee vano vura suqe sirara vaqa mvia, mvia vitavare Kotira handamvunraqi enanaqa nriate. Nee vano neenanra sangue amase nunamvu tinda hamataraqi he tumaruate. ² Nee heesa atta vaasa hisa nee nai nai muanra vare, mvia ne vaiqa Yesusi Karaisira kua mvanra mvia ioqama devarave. ³ Vaindi mvoo vano ne io suqema varioko timvando nai hiva he suqema vario mvia, hiva nai hunra tiso. ⁴ Heesana nraase ohra gua gua vano neena gahara hutina mvia dua huti mvia, vaiqa nee neenanra mvooqa revarave. Naaqamave nee gahara hutuava hiva suqeetamaso vaiso. He neena huti gaharara mvia vaqamse mvoosa huti gahara vaqa duasiate. ⁵ Naaqamave ne hita iona mvia, neena gua gua vano neena naa gaharave hutuana mvi gahara mvia hutuate. ⁶ Ri atta vaasa utave tisa mvoosa Kotira kua ri vaqa timvamviva mvia, reera sirana suqe hinrainda mvoosiarina hisa vaqa duamase mviane. ⁷ Nee vano he nena hunra iate, naaqamave he io mvoo vano Kotira hunra iananrove. Naa vusarave hutaqi tuterana mvia, nai mvia purirane. Guaqarama, naa gaharave reera hutirana mvino vaiqa Kotiva soqa mvia duamaso ri mviananrove. ⁸ Vaindi vano neeri kora saiqa hutinema mvia vaiqa Kotiva hisa kora soqa mvinranda varevarave. Vaindi vano Kotira Mvanraqunra sara hukutu tutariva hiva vaiqa nai suqe gahara mvinondairo mvanraqunra vaaqara nrau vaaqara nrau varira varananrove. ⁹ Tee vano suqe gahara mvia hutuare mvia he goha siare, te suqe gahara mvia hutuare he goha sirandera mvia, mvoo hisarara mvia vaiqa te mvi gaharara mvia sara mvia puruarane. ¹⁰ Danave tiira vaqa saiqa vasiraqe mvia, hesana nraase ohra hisa suqema mvatare, dasave utave iasa hisa. ¹¹ Vavara taru hamviqi, mvitiri mvia nena saquqo vavara nronra mvia ramva donae. ¹² Vaindi dasave mvoosa vusa suqe vaindi variare mvia, hisa niinra sangue amase mvamvana tooqate iavo. Hisa waa Yesusira nrutuara tiisa muanra vatevo tinda mvia, hisa mvia mvanranre mvia hita iavo. ¹³ Vaindi dasave vaa neeri mvamvana tooqasa hisa, he kua mvanra mvia vatavo. Hisa mvundusa vaiva vano nee neena mvamvana tooqe vanda hisa nii mvamvana mvinondai nrutu nronra varareve ¹⁴ Ne vaiqa he nena nrutu tuaherarine, naaqamave mvata hainona gahara vano ni vusato indairo vaa utio taiqeso, Yesusira Karaisira vaqa naunri satarisa. Ne he ena mvata hainona gahara mvia vatarine. ¹⁵ Vaindi vano nai mvamvana tooqove, he tooqove mvia he nronra hinraindave, tuananra hinrainda mvia, te vano mvia karaha asiare. ¹⁶ Nraase ohra vano karaha asisa hisa vaqa, Kotira vura tirosirava vaqama suqesiva vaqa vaiqa hisa vaqamaso Isareri vaqa vasia nanrove. ¹⁷ Hainondairo viranda, he seevao nraase ohra mvoo vano ni korama mvatarive. Naaqamave, ne vaa Yesusira nrutuara muanra varokava mvia puru vano ni mvamvanasa vaa vaiso. ¹⁸ Hitamave atta vaasao, serao Nronra Yesusi Karaisira suqesiva hiva nii mvanraqunra mvia vaqa vasiarive. Uttaa!