¹ Vosuai voovau suaivo ikianna tammaa tuana, Aaparahhamo ari yoosinna Mamaree ivaki okaivaa oyai aamanaivaki mmaataiva hootikioo variravai. ² Ivo ari nnauu aaqaanivau varioo toodu udaangaivo innasi nniravai. Ivo ii taara vooma vaidida too, ivaudiri ditoo iya saaidi viravai. ³ Oro iya yuku oyaiyauvaki tooruvuyau haaro tunoo, ⁴ "Udaanga-o a teeno mminna voovai nivariraivaki fanniima vainai, yoketavee kiaunoo, saa nipikiada kuatee. Iikiai fai na ngii yuku yauva fini kiinai, aa yatari ooyai aamana aavaki numa nii taasipama variatee tiravai. ⁵ Ni taasipama varikiai fai na yeenna huda ngimminai nnaa yaagueeama kiada yapooma ngenge kuaare kiaipi kuatee. Tudu iyaa inna kuasai tunoo,"Inna aikioovai itaama ee kiannaneema iikianee tiravai. ⁶ Itaakua tudu rikioo Aaparahaamo seeno oro ari nnaauvaki ari nnaataivai Saraanna tunoo,"Akairaama yeenna paraawa yokeeta vooyauvai hanigia kiee hudaane tiravai." ⁷ Kiaakioo senoo oro puara burimakau yokeeta nnammariro voovai ruputu kioo ari mmoorivareerai mmioo tinoo makeeti yoketaama huda varaada ngiatee tiravai. ⁸ Tudu iya makemaake iya yeennaiyauva huda kiada varaada yatari iira nneera vooyauvaatama varaada nnaamma suuyai yauvaatama varada numa ii taaravooma vaidiya mmiravai, mmudu iya nneeravai. ⁹ Iya yeennaiva nnaa taika kiada Aaparahaama yaparaida tunoo, moo i nnaataivo Saraava deepi variinnee? Tuduu rikioo Aaparahaamo iya saai tunoo,"Moo aayaa nnauki variano." ¹⁰ Tudu rikioo Udaangaivoo Aaparahaama tunoo,"fai na ngiisi kava nnira suaivoo ataama vainoo.aanna yeenna utuaiyauvo kaana vaira suaivaki fai ii nnaataivo Saraava nnaakara voovai mmataanaravai. Itaakua tuuva Saraava ari nnaauva tipuuma fafa duuvo ii kua iva rikieeravai. ¹¹ Aaparahaamooya Seraaya vaa nnaakara mmateera suai yauvoo ngioovio taaika kioodu yoteera ngiaabai kiada varudu aa kuaavoo iyara vairavai. ¹² Itaakua tuu iva Saraava rikioo ari nnau keegiaiva tipuuma fafa duuvo kuasi rapidioo tunoo, vaa na yoteera kiauvai , fai na dataii sirigavai varaanarannee? Vaa ni vaativo ngiaabai kiaikiai na yoteera kiaunoo. ¹³ Udaangaivo Aaparahaama tunoo, "Aanirainno Saraava tunoo hama na aaikiooma nnaakara mmataanaravaivee tiinnee? Fai na kava vararanee ngiisi ngiau suai vaki fai ivoo nnaakara mmataanaravaivee. ¹⁴ Na kava ngiau suai vaki Saraava ngiaammuauvai mmataanaravai. ¹⁵ Tuduu rikioo Saraava inna tunoo,"Hama na raai kiauvaivee,"tikioo Udaangaivo inna tunoo,"Vaa ani kuaivaara raai kiannavaivee tiravai." ¹⁶ Itaa kua kiaa taaika kiada iya ivaki pikiada diitada yoosinna Sutumara viravai. Vuduu Aaparahaamoota iya tasipama viravai. ¹⁷ Udaangaivo tunoo,"Fai hama na iinara mminnnaiyauva Aaparahaama hatauma kiee inaravee tiravai. ¹⁸ Fai nnaagiai Aaparahaamo mmuakia gioonna kiaapu mmataavau variaiya gioova varinaravai. ¹⁹ Vaa neeno iinna mmataama kiauvai. Inna uru nnaakara sidinnaidi yaatama fai yoketaama variaravai. Fai Udaanga Anutuuqo ariino mmuakia mminna tiiyauva iya mminnaravaivee. ²⁰ Itama vaudu Aanutuuqo tunoo,ngioonna kiapu Sutuuma Kumuaara variai yaata mminna mminna maisaiyauvo yatarainoo tiravai. ²¹ Kia kioo tunoo, fai na neneeno oto iyaa tanaravai. Na mmanna iya kuaiva rikiauvai, kutavainnee? Vovara unnakua vainnee? Iya kutaa tuanaa mmoori maisaiva ikioo," innavee. ²² Udangaiva mmoori vareera tarama Sutuuma yoosinnai vakira viravai. Vuduu Aaparahaamo udaangaivaa tasipama ivau diravai. ²³ Aaparahaamo Udaangaivaa vainivau dioo vainno tunoo. Fai aa yoketa ngioonna kiaapuyata maisa ngioonna kiaapuyatama ruputinarannee? ²⁴ Aaparahaamo Udaangaivaa tunoo, mo taara vaidi yuku yaku taikakio voo vaidi vai yuku vaitana 50 yoketaa ngioonna kiaapuyatama fai a ruputinarannee? ²⁵ A yoketaa vaidiiyaata maisa vaidiiyaatama ruputinara ii kianna ivo inna hama yoketai ataruvai.Mmuakiaa mmata avau varida kua radudeeraiya safuuma maisaiya ngiari mmoori maisaiva irisaivaa ngiari ikiai vau ngiatama mminaravai. Hama yoketai yatama maisai yatama mmuakarama ikiaavai. ²⁶ Udaangaivo inna kua sai tunoo," Moo faiina teeno taara vaaidi yukuyaaku taika kioo voovaaidivai yaakuvai 50 yokeeta gioonna kiaapuya sutuuma varikiai fai na iyaraa yaata utuee hama iyaa ruputinaravaivee." ²⁷ Aaparahaamo kava ataakua tunoo, Udaanga-o sa na kaayau kuakiau iyauvaara i pirisa kiaivee. Na mmatayaa dia mmanna mmummuvai. Hama yopeema na mminna voovai iinaravai. ²⁸ Mo a taraa vaidi yukuyaaku taika kioo vo vaidivai yaakuvaitana (50) yoketa vaidiya variavai. Dataama vainnee? Yakuu saivai (5) yoketa gioonna kiapuu (45) atauu iva mmemmaivaki variai yaatama fai a ruputinarannee? ²⁹ Aaparahaamo kava Udaangaiva tunoo, "Moo ii taara vaidi yukuyakuu taika kioo (40) yoketa gioonna kiaapu iyaatama ruputinarannee?" Tuduu Udaangaivo tunoo hamavee tiravai. ³⁰ Aaparahaamo kava Udaangaiva yapayarainno tunoo, "Kii vooneetu kava na iyaparainaravee. Sa niyara ii nnanna taivee, mo mmua vaidivai yukuyakuu taika kioo (30) ivaki yokeeta gioonna kiapuuya variaiya fai dataainarannee?" Tuduu Udaangaivo inna sai tunoo, "Fai hama na iiya ruputinaravaivee tiravai." ³¹ Kava vooneetu Aaparahaamo tunoo, "Uaanga-o taane moo ii yoosinna ivaki mmua vaidivai yukuyakuu taaika kioo (20) yoketa gioonna kiapuu varikiai fai a ruputinarannee? Hameetave." ³² Tudu rikioo ivoo inna kuasai tunoo, "Udaanga-o sa niiyara i nnannataivee. Nnaagiai kuaiva na kiaunoo. Fai yakuuvaitana (10) yoketa gioonna kiaapuya ruputinarannee? Udaangaivo tunoo, "Hameetavee tiravai." ³³ Udaangaivo kuaiva kia taika kioo, Aaparahaama pikioo viravai. Vuduu Aaparahaamo kava vararanoo, ari nnauvaki viravaivee.