¹ Kati puara hudeera tapiiva nini yatari akasiaivaadiri iikiane, inna hokobaivota kakumaivoota mmuakaraama [5m] vakiaive. Tapiiva tooya taarama taraama ataudo safuuma vaino rikioo mmataivaudiri ngau kuaivo taaravooma [3m] inna hokobaivo vakiaive. ² Kava tapiiva mmuakiaa tooyaida hayino voovaatama ngiau vioo burimakauva ooviva roosima vakiaive. Burimakauva oovi roosiiva iima kino tapiiva tasipama vainai fai baraasaivaadiri iyayaa rummua apu kiaanaravai. ³ Tapiiva iirana mminnaiyauva ataama iikiane, kusiyaanna yavaivootama savoorai yauvootama, diisaiyauvoota, fayai hara radeera fookai yauvoota, paraipaanaivootama, vakiaive. Mmuakiaa ii mminnaa iyauva baraasaivaadiri nnaasu iikiane. ⁴ Tapiiva puaisa utira yaaku yauva mmuakiaa tooyai yauvunu iima kiee baraasai vaadiri iyauva suuba roosiima uyu kiaane. ⁵ Mminna mminnaiyauva tapiiva veraivau yapeeraiva mmemmaivaki ai yaakuva yapaane. Inna ivoo tapiiva vuutaivaudiri vioovioo arai taikaivau mmataki kuaivai. ⁶ Tapiiva tuunnaiyauva iikiane, yatari akasiaivaadiri tapiiva tuunnaiyauva iimakiee baraasaivaadiri rummua apu kiaane. ⁷ Tapiiva tuunnaiyauva ututuuma kiannaiyauva akiaivaki vakiaannigiata taara atauya diaive. Ii tuunna iyauvoono fai tapiiva harata vararu tukioo vainaravai. ⁸ Tapiiva yatari hatatakiee iikiannai yauva kuoonnama rukia rukia kiaane. Dee mmanna mannaavai taapiivau na ivitaa kiaukai taannaneema iikiane. ⁹ Seera nnau sudaaqa tiraiva aakiaivaki hanikia voovai raukiee aakiaivaki buruqa yoketa vooyauvai yeena patai yauvaadiri funnukiaiyauva hiriane, geedainnigiata hirianna buruqai yauva hokobaiyauvo (100m). Ii buru qaiyauva raduda hirira tuunnaiyauvo (20) tuunnadave, iya mmemmai yauvaki (20) baraasai yauvaadiri iimakia yauda diri buruqai yauva harataane. ¹⁰ Ii yau iyauvo kuabairua yaudoono fai aikiooma buruqaiyauva harataa kioo sirivai vaadiri iima kiaa tuunnaiyauvunu puaisaka utukioo vainaravai. ¹¹ Itaama iikiannaneema mmua karaama geedainningia yapaanna buruqai yauvatama yapaane. ¹² Suai haatapeera nnigiata vai hanikiaivau yapeera buruqaiva hokobaivo (50m) vaivai. Inna tuunnaido (10) tuunnada dino rikioo harateeraido (10) diaive. ¹³ Ii hanikia ivo hokobavai suai raarirai nnigiata kuaive. ¹⁴ Keegiaivaki nnira buruqaiva hokobaivo (15m) vaino rikioo inna tuunnaido taaravoomada dino inna harateera tuunnaido mmuaakaraama taaravooma tuunnada dinaravai. Sainainnigiata vai ¹⁵ buruqaivoota mmuakaraama (15m) vakiaive. Iyauvo safuuma taara vooma yaagueeqa tuunnaidoo tama harateera tuunna taara voomaidootama diaive. ¹⁶ Hanikia pinaiva keegiaiva sipuraira buruqaivo (20m) vakiaive. Ii buruqa iyauva funnukai yauvo haboonnaivo, marakaminaivo, kooke vootama vaiyauva yeena pataiyauvaadiri yoketaama funnukiaavai. Ngiari iva funnida taiyaano nnaasu funnuaaravai. Iyauva tuunnaiyauvo taarama taarama dinorikioo harateera tuunaido tarama taarama diaive. ¹⁷ Mmuakiaa hanikiaiva tuunnaiyauva sirivaivaadiri nnaasu iikiate, harateera tuunaiyauvatama kuabai buruqaiva harataa tuunnaivau yagueeqama utiraiyauva baraasaivaadiri nnaasu iikiate. ¹⁸ Hanikiaiva hokobaivo (100m) vino rikioo paannaivo (50m) vino rikioo ngiau kuaivo yaaku saivai vainai rikiada buruqaiyauva yeena pataiyauvaadiri iima kiaivaatama harateera tunna barasaivaadiri iima kiaiva yapaate. ¹⁹ Mmuakiaa Sudaaqa tira nnauvatama iva aakiaivaki hanikiaiva raiira mminnaiyauva baraasai vaadiri nnaasu iikiate. ²⁰ Yaagueeqama tinai rikiada Isaraira gioonna kiapuuya yatari Orivaiva suuya yoketaiyauva nnaasu vitarada nnikiai toobaiva subi kikioo mmuakiaa suai toonnaasu variaive. ²¹ Sudaaqa nnau nuunairaiva aakiaivaki buruqaiva mmaanainnigiata Sudaaqa nnau aakiaivaki, Anutuqa kua mmaanna yaaku vaitana vaivaki fai Aroonotama inna mmaapuuyatama mmeekiaiva subi kikioo Aagini Anutuuqo variivaki too nnaasu variaive. Subi kikioo henanaannadiri teenono suaivo haatapaive. Inna ivaara Anutuuqo yoketaivai, Ivo inna kua mmaannavai Isaraira gioonna kiaapuuyaatama iya mmata haraiyaraatama vainaravai.