¹ Sa ngingi seenaiyara unnakua kuaiyauva tida yaagueeqama unnakua kuaiyauva iyaki haraate. Sa vaidi maisaiva tasipama nuainna variee nuunama mmoori varaane. ² Sa vooya tasipama maisa mmooriva iinaraivaara kuayeena raukiee, variare nuainna iya unnakua kiaiyauva eetaatama yaagueeqakiane. ³ Nnuturuaa vaidiyaatama hama nnuturua vaidiya i tasipama varikiai sa nnuturua vaidiiyara nnaasu yoketaakiane. ⁴ I nnammutuaiva puara fayai haitatuuyauvo raubiriiva tee safuuma varee oro nakaaraiva mmiane. ⁵ Vaidivoovai hama aiyara tuqinnaivo mmuaaraivaki vinai sa viee tee pikiee yaatare kuane. Oro inna tee tuqinnama inna vara ravisiane. ⁶ Mmanna haipuuya varira yoketaiyauvaara sa tee avu nnammariinna iya varee kua pinaivau yapaane. ⁷ Sa unnakua tira vadiiya tasipama nuainna variee hama tomeda iira vaidiiya kuminaya ruputi putuate. ⁸ Fai ngia itaama iikiai na irisai itomeda ii vaidiiva maisaiyauva hama kiaa kookieenaravai. ⁹ Sa koonnai aataru yauvakina mminaiyauva varaate, fai itai aataru iyauvoono ngi avu teeraiyauva suvuainai hama yopeema taaravai. Vaidi kua yoketaama tida rapisiima teeraiya sa mmooka hanigia mmiate. Sa arivoopinna vaidiva maisa aataruuva inna iikiane, mo vaa eeno inna variraiva taannaneema, mo eetaatama aa mmata aavau arivoopinna Iyiipa mmata ivau diaa kuave. ¹⁰ Fai a yaaku saivai sainaidiri mmuaa nuanuvaara ai mmataivau yeenna hauva utukiee kaanaiva varaanaravai. ¹¹ Itaama kiee yaaku saivai sainaidiri taara nuanura mmataiva pikiano aaronna ngi tasipama variaiya yeennaiyauva varaate. Varada pikiaa yeennaiyauva mmaguyakinnaa fayai mmararaiyaano nnaate. Itaama ii kiannaneema aii yeenna mmorivaatama mmuakaraaama iikiane. ¹² Yaaku saivai sainaidiri mmuaa suaivai aakiaivaki ai mmoriiyauva varaane, ii mmua suai ivau nnaasu kati variane. Fai itaama iinai rikiada ii puaraiya kati yoketaama variaaravai. Itaama iikiai fai i mmoori vareera gioonnaiya nnaakaraiyaatama arivoopinna vaidii ngitasipama variaiyaatama kati varida karaasa yaagueeqa varaaravai. ¹³ Safuuma na mmuakiaa mminna i giaa immiau iyauva ai yaataivaadiri arinaima rikiaane. Sa vo anutuu vooyauvaara kuatiee iya nnutuuyauva kiane. ¹⁴ Mmuakia nuanuvai aakiaivaki taaravooma neetu yeenna pinaiva oro niini hudaane. ¹⁵ Ngia yeenna pinaiva hudaareekia kiada sa yiisaiva ivaki yapakio yootaive,Na ngi giaa ngimmiau neema, fai ngia ii yeenna hama yiisataiva yaaku saivai sainaidiri taara suai nnaaravai. Fai ii suai ivau ngia Anutuuqo kooya Isarairaiyara kati yaata utuu suaivau ngiaaravai, ivo ii mminnaiva iima taikakinai fai iya innara yaata utuaaravai. Ii kuraaga ivau ngia Iyiipadiri mmaanai nniravai. Ivaara sa kati mmanna yaakuaatama ngiate. ¹⁶ Yeenna pinaiva taurira suaiva teera kiane, ai mmoorivakinna tauraana yeenna kaanaiva varaanna suaivau yeenna uruuyauva rututuokiane. Itaama kiee yeenna pinaiva nuanuuvakira mmataama kiaane, yeenna pinaiva ai mmoorivakidiri varaannaiva itaama iikiane, ¹⁷ Ngi vaidi mmuakiaya Aagini Anutuuqa avunnigiata mmua nuanuvai aakiaivaki taara vooma neetu diate. ¹⁸ Fayaiva kati niminare kiannaiva sa kiauvai fayaiva nimiane, sa yiisa haatakiavo yootai yeennaiva nimiane. Yeennaiyau vaatama nnammari yauvaatama nini kati mmira aataruva iikiare kiakiada sa pikiakio vo heena voovai ngioovio pataakiaive. Mmuakia taurana yeenna yoketa ai ¹⁹ mmataivau diai yauva varee, ngingi Aagini Anutuuqa nnauvaki ngiate. Sa puara memeka nnaakaraiva ari kaanaiya nnaammai vaudiri ruvasakie hudaane. ²⁰ Faina Aangera voovai na titano ivoono fai i haitatuunno itaura vio aataruuva i vitainno i vitoo yoosinna na aini teerama kioovaki kuanaravai. ²¹ Mmuakia suai inna nnaasu taarada vatarada inna kuaiva rikiaate. Sa inna ausa hareera aataruuva iikiate. Itaama iikio fai hama ivo ari mminna mminna maisa iira aataruva pikiaanaravai. ²² Ni nnutuuvo innaya vaino. Fai a kuta tuana ni kuaiva rikiee mmuakia mminnaiyauva na kiauneema iinai fai neeno i nnammutua ikiaiya nnammutua iinaravai. ²³ Fai ni Aangeraivo i taura vioo ivitoo Amoora,Hitiita,Perii, Kenaana,Hiviiyaatama Yabusaiyasi kuanaravai. Sa iya unnakua anutuuyauvaara tooruvu yau haree,iyauvaara sudaaqatie,iya iikiaa neema iikiane. ²⁴ Iya unnakua anutuuyauva sikaunnaadiri iikiaiyauva tuayannaruee ruannamooqama patapatama raubirikiane. ²⁵ I Aagini Anutuuqara nnaasu sudaaqa kiane, ivoono fai i yeenna nnooriyauvaki raabainaravai. Fai na nniitareeraiyauva ngiikidiri varainnaanaravai. ²⁶ Hama fai gioonna vovoono aikiooma imataivau nnaakaravoovai mmata haraanaravai. fai na variraiva iino rikioo hokobavai kunaravai. fai na iinai gioonna kiaapuuya i mmataivaki kuaaraivaara aatukiaaravai. fai gioonna kiaapu voovai aataru tammaivau itaiiya na ruputinai putuaaravai. ²⁷ Fai na iinai i nnammutuaiya atuuda mmooka hanigia i mmiaaravai. ²⁸ Fai na sisikapuaiya titanai i taura kuaaravai, fai iyaano vida Hiviiyaata,Kenaanaiyaata, hitiitaiyaatama varainnakiai fai hama ngitaura kuaaravai. ²⁹ Fai hama yopeema na iya varainna mmaanai mmua nuanuvaara kuaravainne, o ii mmata iva suvuakino mmannavai vainaravai, itaama kinai fayai mmararaiya vari suvuakuaaravai. ³⁰ Fai na patatiee ngiikidiri iya varainnarare vinanaifai ngia kaayauma varida aa mmata aava varisuvua kuaaravai. ³¹ Fai neeno ngimmata atauva safuuma urapu kookeevaudiri hatokano Pesiaiya urapuuvau viooo, gaanga mmataivaudiri nnoori Yufiritiisa kuanaravai fai na ngi tee pikianai ngia rapida ari voopinnaiya numa vayaa mmata iva yaataraaravai. Ngie ngeeno fai iya varainnakiai kuaaravai. ³² Sa iya tasipamanne iya unnakua anutuuyauva tasipama kuaiva yeena rammuane. ³³ Sa iya i mmataivau variate iida fai iyaano ngi iikiai fai ngia ni avuuvau mminnamminna maisaivaki tuma ruaaravai.