¹ . Mwisa mwitaa tiavaro Sisasiva botiqi mwaari nero nrima nanero nramariqaa nrai mwaaqaini uro naira. ² . Uro naisanta vainti mwonravuvano vainti mwo sini mwavana qutu vira ntainamaqinta Sisasiva varinaini uro saavaro Sisasiva napisi saisanta mwi vaintinravusa niari qai titanta, Quqaama mwi vaintira suqema saanarove, tia vaintisa variavaro mwiva sini mwavana qutu vi vaintirara titaro, Ni mwaaquo, kempusaqama sera variane. Re Gotira kua neqa saanara ne nrunkama mwitauko, tiro. ³ . Sisasiva mwitaa tisanta mwaara osara ti varia vaintinravusa qao timwa senta nrai timwa mwi nrai timwa mwi sinta titanta, Mwaa vaintiva mwitaa titaroma Gotirara maquqa si kuarama ti variso, tinta. ⁴ . Mwisa mwitaa tiavaro Sisasiva mwisa vu aatoqi vasi kuara napisi sero mwisara titaro, Naraiqamave qine maquqa si kuara nenta vu aatoqi mwitaama senta riaavo? ⁵ . Qine niara titanta, Mwiva qumina vainti varitarora tiro, siama so nrai sena vaintivano Gotira kua neqa saanira nrunka mwitaanarove, tiarave. So mwo saiqa mwo? Sove ne mwaa vaintira suqema saanirave? qine ni timwa mivaqe riaase, tiro. ⁶ . Sisasiva mwitaama sero saparama nitero mwisara titaro, Ne mwataini mwatatai nraaqiaravama varukaro ni nroraqama saisana ne soma mwataini varitana vaintivano Gotira kua neqa saanira nrunka mwitaanirave. Qine ni kuara quqaa kuave tiate tina, ne mwaa vaintirara mwataa tirerave, tiro. Mwitaa timwa sero Sisasiva sini mwavana qutu vi vaintira mwirara titaro, Ntivira rena taintavaqa tu varera rena mwaaqaini vuane, tiro. ⁷ . Mwitaa tisaro mwi vaintiva ntiviro nrai mwaaqaini visanta ⁸ . mwini ntununukaama vuasa mwi saiqara takuenta aatu sinta Gotira utu nrora mwinta titanta, Gotiva mwi vaintira kempusaqama saisaro mwi saiqara varaiso, tinta tiarama. ⁹ . Sisasiva mwiaqaantairo viva vitaro takuaisaro vainti mwovano Matiuva taakisi varetaro saraara nraavuqi varisaro mwiva mwirara titaro, Ni vataqira nriaane, tisaro Matiuva ntiviro mwira vataqiro virama. ¹⁰ . Mwira vataqiro visaro Sisasiva nrai nraaqiaranravu sampaqa uro Matiura nraavuqi sara nre variavanta vaaqara vainti taakisi vare variasavaqa, maquqa si saiqara uti variasavaqa, Sisasira vaqama senta sara nre variara. ¹¹ . Nre variavanta Parisi vaintinravuvano mwisa takuenta Sisasira nraaqiaranravuara qao tinta, Naraiqamave qini nroravano taakisi vare variasavaqa, maquqa si saiqara uti variasavaqa, nkuaaqi sara nre variso? tinta. ¹² . Mwinravusa mwitaa tiavaro Sisasiva titaro, Qaqi variasa sia totaava sinaini vi variarave. ita visa qai totaava sinaini vi variarave. ¹³ . Te napisi senta nrue varurasave tiasa sia ne mwisa aararera tukuvave. Ne maquqa si saiqara uti varia nraase qorasa aararera tukuvave. Gotira bukuqi qara numwataa kuava Gotirara mwitaama tiso: Vaintivano quaara rusero ni mianirara sia ne mwirara quasaanirave. Vaintivano mworara mpo timwa mwitetaro, saaisaqama mwitaanira ne mwirarama quasaanirave, tirave. Qine mwi kuara osarara naumaqenta uro mpaama senta takuenta riaaqinta vuate, tiro. ¹⁴ . Sisasiva mwitaa tisanta Sonira nraaqiaranravuvano Sisasiva sinaini uro nenta mwira sapara sinta titanta, Tevaqa, Parisi vaintinravuvanovaqa, sara sukuantukuma te varuro. Naraiqamave ri nraaqiaranravuvanovaqa sia sara sukuantukuma taraitinta, qaqi sara nre variavo? tinta. ¹⁵ . Mwitaa tiavaro Sisasiva mwisa timwa niro titaro, Nraase varaari vaintiva nrai vataasavaqa varirera, ntavave mwira vataasa mwisara sara sukuantuku siate tianaro? Qao, sia mwovano mwitaa tianarove. Mwo ena nri nairanta mwisaqintai nraase varaani vaintira vara qaqini sairanta mwi enaraqaantaintama mwira vataasa natetanta sara sukuantuku sivarave, tiro. ¹⁶ . Mwitaa timwa sero Sisasiva mwo kuaqaa numwa setaro timwa niro titaro, Mwovano vaaqa nrihi nukema vira urirero siro siama qaraasa vuruqa toqa sero mwiaqaa taaqau tero uruaanarove. Naantiara vaaqa mwia siqairaro qaraasa vuruqa uru taariva viro kekopaqa siraro nrihi vaaqa mwivavaqa nroraqama sero nuke siaso tiro, sia mwitaa sirave. ¹⁷ . Qavaa tirerave. Sia mwovano qaraasa uaini tati sero memera pahiqo ututai taqura ntaaruaa taquai qavaa vara sero qaraurirave. Mwovano mwitaa sirera qaraasa uainivano tapitero taqu mwia takuma viraro qaqinaini namwa viraro taqu mwivavaqa maquqama vuanarove. Mwitaa siaso tiro vaintivano memera pahiqo ututai taqura qaraasa taqu vara sero qaraasa uaini qarauri varisaro uainivanovaqa taquvanovaqa so vasirave, tiro. ¹⁸ . Sisasiva mwitaa tivarisaro mwaara nraavuqaa naqisi vari vaintiva mwovano uro Sisasira vuqaa tori sauru raviro titaro, Ni nraavuravano qutuma viso. Re nrira rena sauqu mwiaqaa vatairaro qaqi ntiviro variarive, tiro. ¹⁹ . Mwitaa tisaro Sisasiva ntiviro nrai nraaqiaranravu sampaqa mwi vaintira vataqiro viro. ²⁰ . Aaraqaa vi varisaro nraase mwovano ita visaro 12 isiara qaqi qai tora qakue vari nraaseva Sisasira mwoqaini uro varitaro Sisasira vaaqa vitiqa saatu sero. ²¹ . Mwi nraaseva nrai riero titaro, Ne mwira vaaqa vitiqa saatu saariro ni ita viva taiqa viraqe soma varianirave, timwa sero Sisasira vaaqa vitiqa saatu saira. ²² . Saatu saisaro Sisasiva kuantaa viro mwira takuero titaro, Ni nraavurao, kempusaqama sera variane. Re niara ni saaisaqa siarivave tiararoma ri mwavanavano suqema viso tisaro maqe mwiqara mwi nraaseva suqema viro varira. ²³ . Sisasiva viva uro mwaara nraavuqaa naqisi varira mwira nraavuqi vera nero takuaisanta mwo siasa mpo titanta nate noma vaarara vuaqe variavanta mwo siasa nroraqama senta nate variavaro ²⁴ . Sisasiva titaro, Qine tukitarenta vuate. Mwi quaasiva sia qutu viso. qaqi vaite variso, tisanta mwisa nrai mwirara qai raima mwitaara. ²⁵ . Sisasiva mwisa titaisanta veva naavaro mwi quaasira vataaraqi vera nero mwira sauquqa tu varaisaro mwi quaasiva qaqi ntivira. ²⁶ . Sisasiva mwitaa si kuava esaa mwi mwataraqi viro nriro sisanta esaa riaara. ²⁷ . Sisasiva mwiaqaantairo aaraaqaa visanta vainti taaratanavano vu qimpai tana mwira vataqi vinta mwira aaramaqinta vinta titanta, Devitira mwaaquo, qaqi tiritanara mpo timwa timwi taane, tinta. ²⁸ . Mwitana mwitaa timwaqinta vuavaro Sisasiva nraavuqi vera nero varisanta mwitana mwiva varinaini uro naavaro Sisasiva mwitana sapara siro titaro, Qinetana niara quqaave mwiva tiritana vu nampairi timwitaanaroveve tiavo? Tivaqena riaase, tisanta mwitana, Nrorao, eo, tinta. ²⁹ . Mwitana mwitaa tiavaro Sisasiva mwitana vu vuqaa nrai sauqu vatero titaro, Qinetana niara quqaa mwitaa sianarove tiavenama qinitana vu nampairi nitauko, tisaro ³⁰ . mwitana vuvano nampairi visanta so takuenta. Mwitana so takue variavaro Sisasiva kempusaqama sero timwa niro titaro, Sia mwi kuara mwosavaqa timwa niate, tiro. ³¹ . sisasiva qao ti kuara mwitana qaqira senta uro mwi kuara mwosa mwosa timwa niqi vi variavaro mwi kuava mwi mwataraqi viro nriroma vira. ³² . Mwitana vuavanta vainti mwonravuvano niari sena vainti mwo vitaqinta uro Sisasiva varinaini saara. Vaanavano mwi vaintiraqi varisarora tiro, mwiva sia kua tisanta mwira vitaqinta Sisasiva sinaini uro saavaro ³³ . Sisasiva vaana mwira titaisaro nritaraisaro mwi vaintiva kua tisanta nraase qora mwini ntununukaama vuasa, Qise, te Isarerivano ntaaruvaqa sia mwataa si saiqara takuaunarave, tinta. ³⁴ . Mwisa mwitaa tiavanta Parisi vaintinravuvano qao, tinta. Vaana vuniaava mwira saaisaqa si varisaroma Sisasiva vaana tite variso, tiara. ³⁵ . Sisasiva mwo mwatusa mwo mwatusa nrora mwatusaqivaqa pata mwatuqivaqa nruetaro mwaara nraavuqi vera nero varitaro Gotiva nraase qoraqaa naqisiani kuara suqe kua timwa niqiro vitaro mwo qara mwo qarama sero ita visavaqa suqemaqiro vira. ³⁶ . Mwiva mwitaaqiro vi varisanta vaaqara nraase qoravano mwiva sinaini ntununukaa sinta vinta nrinta si variavaro Sisasira mwuntusavano mwisara mpoqa sisaro mwiva titaro, Mpo, vaintivano sia naqisi varisanta sipisipinravu niariara sampi nruenta sia so niari saaisaqa siraitinta, puposaisanta varia sipisipisa voqiama sentama mwaa nraase qorasa nrue variavo, timwa sero mwisara mpo timwa nitero. ³⁷ . Sisasiva nraase qorara mpo timwa nitero nrai nraaqiaranravuara titaro, Takuaate, airi saravano mpeqa sisanta mwira vanu varenta nrisa sia airivano variavo. ³⁸ . qine vuta qora sapara sivaro mwiva saiqa vainti mwonravuvaqa titairanta uro sara vanuate, tiro. (Sisasiva sara mpeqa siso tira mwiaqaa numwa sero nraase qorara tira.)