¹ . sisasiva nrai nraaqiara 12 nravu aarama sero ntita vatero mwinravusa nraase qoraqintainta vaana titenta nantaa nantaama ita vuarisave suqema nitaate tiro, mwiva mwinravusa nroraqama saira. ² . Mwiva nroraqama sai vaintisa utu vasirero: Vuni Saimonira - mwira utu mwo Pitaara, mwira qata Enturura, Sepetira mwaaqu Semisira, Semisira qata Sonira, ³ . Piripira, Bataromiura, Tomaasira, Matiura taakisi vare vari vaintira, Arapiaasira mwaaqu Semisira, Tatiaasira, ⁴ . Saimonira - mwira utu mwo Serotira, Suntaasi Isikeriotira - mwiva Sisasira nraavutaasa vuqaa qovarama sai vaintira. ⁵ . Sisasiva nrai nraaqiara 12 nravu titero kua timwa niro titaro, Qine visama sia mwo mwatanaa mwaaqaini vuate. Sia Sameriaa nraase qora mwatusaqivaqa vuate. ⁶ . Qine sia mwini viraitinta qine sipisipivano raumpirima viva sampiqama vinema senta variasa Isareri nraase qoraqi qai vuate. ⁷ . qine uro varitanta mwitaamama timwa niate. Gotiva qiniqa naqisiariva qini vainintoma nrinaiso, tiate. ⁸ . Qine ita visa suqema nitaate. Qine qutu visa ntivuma saate. Qine mwavana vauruqiro vuani rumuarava vaintiqaa vasianira nrunka nitaate. Qine vaanavano vainti vutaqi variasa titaivanta nritaraate. Ne sia qiniara moniara naaru tiraitina qaqi qini nroraqama saurara tinta, qinevaqa nraase qora qaqima suqema nitaate. ⁹ . Sia nrora monive, pata ori monive, numwa varenta vuate. ¹⁰ . qine virera sinta sia sara tuaqi, numwa senta, vaaqave, qiqu nraavuve, sauruve, mwi inraisara sia vararairinta, qaqima vuate. qine saaisaqama nitarera sisa mwisama qiniqa naqisiate. ¹¹ . Qine nrora mwatusaqive, pata mwatusaqive, uro nentama qini quasama nitaani vaintira mpaama sentama mwira nraavuqi qai variqinta vinta mwi mwatusara sentama vuate. ¹² . Qine nraavuqi vera narera sinta, mwiqi varisa kua mwanetantama, Qini mwuntusavano qisaasa siranta variate, tiate. ¹³ . Qine mwitaa tivanta mwiqi variasa qini suqema senta ntita vataivera, Gotiva mwisa mwuntusa qisaasama nitaanarove. Mwisa sia qini suqema senta ntita vataivera, Gotiva mwisaqintairo mwuntusa qisaasa sira mwia vara saanarove. ¹⁴ . Mwo nraavuqinraasave, mwo mwatusaqinraasave, sia qini quasama nitenta sia qini kuavaqa riaivera, qine nentaqaantai ntuvenrauma senta mwi mwatusaraqi tuta senta vuate. ¹⁵ . Ne quqaaqama sena qini timwa nianira riaate. Qini kua sia rie nraase qorasaqaa Gotiva nrora muaara vataanarove. Ntaaru Sontomiqi variasavaqa, Gomoraaqi variasavaqa,maquqa si saiqara qai uti variarave. Naantiara esaara enaqaa Gotiva ko titaroma mwi vaintisaqaa pataiqa kua vatero qini kua sia rie nraase qorasaa nroraqama seroma kua vataanarove, tiro. Sisasiva nrai nraaqiaranravu timwa nirama. ¹⁶ . Sisasiva mwitaa timwa sero timwa niqiro viro titaro, Qine mwaa kuara riaate. Ne qini titaarinta qine sipisipi voqiama senta vivanta mwo siasa qaasau vairi voqiama senta qini maquqama nitareranta uti varivarave. Mwirara rietantama qine memaruvano rauru setaro nruainema senta nruaate. Kuri mwosiva sia nrai sena kurivaqa naqinema senta qinevaqa sia mwosa maquqamaqinta vuate. ¹⁷ . Qine vainti mwonravuara rauritanta variate. Mwisa qini navaaqavuqinta uro niari kaanasori nraavuqi senta qiniqa kua vatevarave. Qine mwaara nraavuqi varivanta qini nuqutu senta vatevarave. ¹⁸ . Qine ni saiqa vare varivanta mwia saara qini navaaqavuqinta uro nrora vainti vuqaavaqa, vuniaa vainti vuqaavaqa, sevarave. Qini uro saivanta qine mwisavaqa mwo mwatanaa mwatanaavaqa ni kua qai timwa niaate. ¹⁹ . Mwi enara qini navaaqavuqinta uro saivanta sia qini mwuntusavano nroraiqa siranta, Nara kuave tianarave? tiate. ²⁰ . Mwi enara sia qine nenta naumaqara qintai tiraitinta varivaro qini qora mwaraquravano qiniara mwitaa mwitaa tiate titaro qini oqintairo kua tianarove. ²¹ . Naantiara mwo siasa niari qatave niari vasaarave qovarama saivanta ru sevarave. Mwisa qosa niari nraaqiara qovarama saivanta ru sevarave. Mwisa nraaqiaranravuvano niari nrosa qosa kua sia riaraitinta, mwisa ru saate tivanta ru sevarave. ²² . qine ni saiqa vare varivanta mwia saara qini qoririma nitevarave. Mwitaamaqinta vivaro sia qamwarama puposairaro mwo ena mwo ena kempusaqama sero variqiro vi variari vaintiva, mwiva so variraro esaara enaqaa Gotiva mwira vitaanarove. ²³ . qine mwi mwatusaraqi varivanta qini maquqama nitetanta qini ru sarera utivera, qine aatu nuqema senta mwo mwatusaqi vuate. Ne tianira riaate. qine Isareriqi nruetanta ni kua sia esaa mwatusaqi timwa ni taiqa saivaqe ne mwataini mwatatai nraaqiarava qavaa tukuanirave. ²⁴ . Qumwaraa vaintivano nrai kua mwaara timwa mwi vari vaintira sia aatara sairave. Saiqa vaintivanovaqa sia nrai nrora vainti aatara sairave. ²⁵ . Qumwaraa vaintivano variqi viro nrai kua mwaara timwa mwi variani vaintira aananamwa viro mwiaqaantairo mwiva ne soma nkuaa meraqama varuko tianarove. Mwisa niara re vaana vuniaava Pierisepuriva variaro tiarave. Mwisa vota maquqa si utura mwia ni miasara tinta, mwisa naantiara qini ni nraaqiaranravuvaqa anoma senta maquqa si utura nivarave. ²⁶ . Qine mwi kuara rietantama sia vainti aatu aatu sitanta variate. Mwovano takuaaso tiro numwaqu taani inraisara, naantiara esaa mwi inraisara qoqaa qai qovarama saanarove. Maqe qumpau taani inraisara naantiara qovarama sairaro qoqaama vasianarove. ²⁷ . Maqe ne sonkiraqi varitana qini timwa ni varu kuara qine naantiara nuvaasaaniraqa varitanta timwa niate. Maqe ne tineqa sena qini timwa ni varukanta riaa kuara naantiara mwatusaqaa varitanta aasara namwa senta tiate. ²⁸ . Qini mwaraqura sia rusaraitinta mwavana qai ruse vaintisa sia mwisa aatu aatu siate. Qine Gotira aatu aatu sitanta variate. Vaintivano qutu viro qutu vuasa tiaqi vinaini viraro Gotiva mwira mwavanavaqa mwira mwaraquravaqa so ru taiqa saarivama variso. ²⁹ . So quqaave vaintivano pata moni nkuaaru sero uapaa kuri varairave? qine uapaa kurive tiara Gotiva mwiaqaavaqa naqisi variso. Gotiva sia sove tirera, uapaa kuri mwiva siama so untonuanarove. ³⁰ . Gotiva qiniqa naqisitaroma qini osara esaa takue variva, mwiva qini qiata sausivaqa esaa saara numwa tairave. ³¹ . Qine uapaa kuri aatara saasave. Gotiva uapaa kuuriqaa naqisitaro qiniqaavaqa nritarero suqema sero naqisi varirara tinta, sia aatu sitanta variqinta vuate, tiro. ³² . Sisasiva mwitaa timwa sero timwa niqiro viro titaro, Vainti mwovano nraase qora vuqaa varitaro niara vutu sero timwa niro titaro, Ne mwira nraaqiarama varuko, tirera, nevaqa ni qova naavuni varira vuqaa varitana vutu sena titana, Nrai mwi vaintivavaqa ni nraaqiarama variso, tianirave. ³³ . Mwovano nraase qora vuqaa varitaro niara titaro, qao, sia ne mwira nraaqiarama varuko, tirera, nevaqa nena qova naavuni varira vuqaa varitana nrai mwi vaintirara titana, Qao, mwiva sia ni nraaqiarama variso tianirave. ³⁴ . Qine niara titantama, Mwiva tukiro varisantara tinta, nraase qora mwataini variasa mwaateraqama setanta variqinta vivarave, tiavo. Qine mwitaave tiavo? Qao, ne mwataini tukina varurara tinta, mwataini varisa ni nravutaaqa sitanta varivaro nroraqama senta naqiva qovara sianarove. ³⁵ . Ni saara qovavaqa mwaaquvanovaqa nravutaaqa sitanta varivarave. Ni saara nrovavaqa nraavuravanovaqa nravutaaqa sitanta varivarave. Ni saara mwira nraaqutuvano nrai nraaqutuniri nravutaaqa sitanta varivarave. ³⁶ . Vainti mwovano variranta mwira vataasa mwira nraavuqi variasa mwisama mwira nravutaaqa sivarave. ³⁷ . Mwovano niara mwuntusa vasianiravaqa aatara sero nrai nrorarave, nrai qorarave, mwoqavaqa mwuntusa vasiariva mwi vaintiva siama so ni nraaqiara varianarove. Mwovano niara mwuntusa vasianiravaqa aatara sero nrai mwaaquarave, nrai nraavurarave, mwoqavaqa mwuntusa vasiariva mwi vaintiva siama so ni nraaqiara varianarove. ³⁸ . Mwovano sia nrai ruse sirite satarira vara qu varero ni naantiara nriariva, mwiva siama so ni nraaqiara varianarove. ³⁹ . Vaintivano nrai mwataini qaqi varianirara qai nroraqama sero riaariva, mwi vaintiva esaarama qutu vuanarove. Vainti mwovano niara riaaqiro vitaro uro qutu vuariva, mwi vaintiva esaa enama qaqi variqiro vuanarove. ⁴⁰ . Ne qini titaarinta vivaro vainti mwovano qini quasama nitetaro mwiva nivaqama quasama mwitaanarove. Mwiva ni quasama mwitetaro ni ngova ni titairavaqama quasama mwitaanarove. ⁴¹ . Gotira kua qovarama sero timwa ni variari vaintiva, poropeti vaintivano nri nairaro vainti mwovano mwira kua riarera, quasama mwitairera, Gotiva poropeti vainti mwira suqema mwitainema sero mwi vaintiravaqa suqema mwitaanarove. Avuqavuma sero nrue variari vaintiva nri nairaro vainti mwovano mwirara avuqavuma sero nrue vari vaintirave saiqe mwira quasama mwitaase tirera, Gotiva avuqavuma sero nrue vari vaintira suqema mwitainema sero mwi vaintiravaqa suqema mwitaanarove. ⁴² . Vainti mwovano ni nraaqiara pata mworu takuero mwiva Sisasira nraaqiarave timwa sero quasama mwitetaro anaani nramarira saqa sero mwira mwirera, Gotiva sia mwi vaintira qaqira saraitiro, mwira soqaa suqema sero mwitaanarove, tiro. Sisasiva tirama.