¹ . Sisasiva mwi kuara nrai nraaqiaranravu timwa nitero mwiva mwini sero mwasaasa nraase qora timwa nirero Garirini mwo mwatusa mwo mwatusainiara vira. ² . Sisasiva mwini visaro Soniva karavusiqi varitaro riaisaro Gotiva titai vaintiva nrora saiqa vare varisaro mwiva nrai nraaqiaranravu titaisanta mwinravusa uro Sisasira numwasiamwa sinta titanta, ³ . Gotiva titairaro naantiara nriariva quqaa re mwaa mwivave? Te vainti mwo vesave varianarave? tinta. ⁴ . Mwinravusa mwitaa tiavaro Sisasiva mwisa timwa niro titaro, Qinenravu mwaini nrima varitanta takuaarave, riaarave, nrima nanenta uro Sonira timwa mwiate. ⁵ . Vu qimpa vuasa qaqima takue variavo. Qiqu maquqama visa qaqima nrue variavo. Susu rumuaaravano mwavana nrevari nraase qorasa mwavana tavana visantama variavo. Aato kapaaqa sisa qavaa soma riaavo. Qutu vuasa ntivinta qaqima variavo. Vesi nraase qora Gotira kua suqe kua nrima rie variavo. Mwi kuara mwi kuara uro Sonira timwa mwiate. ⁶ . Niara sia taara vu aato tiraitiro kempusaqama sero nkuaa vu aato qai riaaqiro vi variariva, mwivama quasetaro varianarove, tiro. ⁷ . Sisasiva mwitaa tisanta Sonira nraaqiaranravuvano nrima nane vi variavaro Sisasiva nraase qora ntununukaama vuasa Sonirara timwa niro titaro, Qine ntaaru nara inraisa takuareranta qumina mwataini vuarave? Suqe vaaqa ututai vaintira takuareranta vuarave? Qao, suqe vaaqa ututa vaintisa sia qumina mwataqa variarave. Mwi vaintisa vuniaa vainti nraavuqi qai variarave. ⁹ . Qine nara inraisa takuareranta vuarave? Gotira kua qovarama saani vaintira poropeti vainti takuareranta vuarave? Eo mwiave. So sai ne qini timwa niarinta riaate. Qine mwi enara poropeti vainti aatara sai vaintira takuaarave. ¹⁰ . Gotira bukuqi Gotiva Sonirara mwataama tiro: Takuaane, ni kua timwa niani vaintira ne titaariro mwiva naane ri vuni vitaro ri aara temanaama mwitaanarove tirave, tiro. ¹¹ . Sisasiva mwitaa timwa sero mwisara titaro, Sai ne qini timwa niarinta riaate. Mwataini mwatataa nraase qorasa variavaro Soniva nramari ni vari vaintiva esaa mwisa aatara saivama variso. Soniva mwitaama varisaro naantiara Gotiva naqisiani nraase qorasaqintairo nrai vara mwatainiqa siariva qaima Sonira aatara saanarove. Soniva nramari ni vari vaintiva qovarama vi enaraqaantairo naqi varia vaintisa Gotiva naqisiani kuara numwaqu sareranta Sonira navaaqavu saasa mwaa enara nivaqa navaaqavu sareranta uti variarave. ¹³ . Ntaaru poropeti vaintinravuvanovaqa, Mosesivavaqa, Gotiva naqisiani kuara timwa qovaramaqi vi variavaro Soniva qovarama virave. ¹⁴ . Soniva varirero mwiva qini saivaqama Iraisaava qavaa mwataini qovarama vuari vaintivama variso. Qine mwi kuarara quqaave tivera, qine Sonirara mwiva Iraisaavavema tivarave. ¹⁵ . Qini aato vasirera, qine mwi kuarara naumaqenta mwia osara napisiate, tiro. ¹⁶ . Sisasiva mwitaa timwa sero titaro, Mwaa enara varia nraase qorasa, mwisa nara inraisa voqiama sentave variavo? Ne nara kuaqa numwa sena tiarintave qine mwi kuara napisi senta rievarave? Saiqe qini timwa niase. Mwisa nraaqiara uapaasa mwatusaqa ntununukaa sinta nareranta variane siavo. Niari sena nraaqiara mwo siasa aarama senta titanta, ¹⁷ . Te noma vuaqauranta qine isi naataara vaisantama qine sia isi naavo. Te netantama nate isira turanta qine nataataara vaisantama sia nataavo tiarave. Mwaa enara varia nraase qorasa mwisa voqiama senta variarave. ¹⁸ . Soniva nri nero sara sukuantuku siro sia uainivaqa nraisanta mwisa mwirara titanta, Vaana sampaqa varivave, tiarave. ¹⁹ . Ne mwataini mwatatai nraaqiarava nri nena saravaqa nramarivaqa nraukanta mwisa niara titanta, Mwira takuaate. Mwiva mwoqama sero sara nre varivave. Mwiva uaini nretaro uera nevarivave. Mwiva taakisi vare variasavaqa, maquqa sia vaintisavaqa, tontiqa si varivave, tiarave. Mwisa niara mwitaa tivariarave. So kuavano suqe kua vasirera, mwi kuara riaaqira virava takuairaro suqe kua qai vasianarove, tiro. ²⁰ . Sisasiva mwatusa mwinravusaqi vaaqara saiqa nrora saiqa vara nitaisanta mwi mwatanaasa sia maquqa si aarara qaqira saraitinta, variavaro Sisasiva mpo timwa nitero mwi mwatanaasara titaro, ²¹ . Mpo, qine Korasinivanovaqa Betsaitaavanovaqa qine takuevarave. Ne qini vuqaa nrora saiqa varaunema sero ntaaru mwovano nrora saiqa Taiaa mwatanaasave Saitoni mwatanaasave vara nitarerave tutiri, mwi mwatanaasa mwo mwatanaasara tinta, vaama kainaama vaaqa ututenta niari mwavanaqa kaupa qutenta, maquqa si aarara qaqira saatiri. ²² . Ne qini vuqaa nrora saiqa varaukanta qine sia maquqa si aarara qaqira sera mwia saara esaara enaqaa Gotiva ko titaro Taiaa mwatanaasaqaavaqa Saitoni mwatanaasaqaavaqa kua nrora vatero qiniqa kua nrora mwoqavaqama vataanarove. ²³ . Mpo, qine Kapenaamiqi variasa qine titanta, Gotiva tiri nroraqama sairaqenta naavuni vuanarave, tiavo. Qao, siave. Gotiva qini vara sero qaqira sairanta qine qutu vuasa varira tiaqi uro varivarave. Ne qini vuqaa nrora saiqa varaunema sero ntaaru mwovano Sontomi mwatusaqi varitaro mwi mwatanaasa nrora saiqa vara nitaase tutiri, mwi mwatanaasa maquqa si aarara qaqira saavaro Gotiva sia mwi mwatusara taiqa saisaro mwaa enara mwi mwatusava qaqima vaitiri. ²⁴ . Ne qini vuqaa nrora saiqa varaukanta qine sia maquqa si aarara qaqira sera mwia saara naantiara esaara enaqaa Gotiva ko titaroma Sontomi mwatanaasaqaa kua nrora vatero qini Kapenaamiqinraasaqaa kua nrora mwoqavaqama vataanarove, tiro. ²⁵ . Sisasiva mwitaa timwa sero mwi enara Gotirara aasara nero titaro, Nko, re naavuqaavaqa mwataqaavaqa naqisi variaravave. Re mwi inraisara mwi inraisara qumpau tera nrora vainti esaa osara takuaa vaintisa sia qumiqaraitira, qumina nraase qora qumiqe varianarara tina, ne ri utu tuaarerauko. ²⁶ . Eo, nko, so re rena sasa siraqa mwitaa siataa sisarara tira, mwitaa siaro, tiro. ²⁷ . Sisasiva mwitaa timwa sero titaro, Ni nkova niara esaa inraisaqaa rena naqisiane tirave. Sia qumina vaintivano ni mwira mwaaqu osara napisirave. Ni nkova nrai qai ni osara napisi sairave. Sia qumina vaintivano ni nkora osarara napisirave. Ne mwira mwaaquvano qai mwira osara napisi saurave. Ne ntasave timwa niataa siraqena timwa niarisa mwisavaqa ni nkora osara napisi rievarave, tiro. ²⁸ . Sisasiva mwitaa timwa sero titaro, Qine nrora muaara nai inraisara menaqu vare vi variavaro puposaisanta variasa ne qiniara tirerave, Qine ne siarinaini nrivaqe ne qini qaqi varira niarinta qine tekya siate, tuko. ²⁹ . (Burimakauvano kua riaarive tiro satari nkosi sero vaataariqaa rumoatairaqaa numwa sena tirerave.) Qine satari ne nianira vara senta nenta qukuqa vataivaqe ne nena saiqa qini qumiqaase. Sia ne nena utu tuaareraraitina, ne qisaasama se varurara tinta, qine soma tekya sivarave. ³⁰ . Ne qini qukuqa satari qu nitaariva suqema sero vasianarove. Ne qiniqa muaara vataariva vuvua taanarove, tiro. Sisasiva tirama.