¹ . Mwi enara Sisasiva mwaaraqa vutaqi qapaaqiri voqia sira uiti tutaaraqi nrue varisanta mwira nraaqiaranravu nraataa sisanta uiti tamwa neqa senta uru mwia nre variara. ² . Nre variavanta Parisi vaintinravuvano mwisa takuenta Sisasirara titanta, Rena nraaqiaranravu takuaane. Mwaara enaqaa sia mwitaa siate tiarama mwisa mwitaa si variavo, tinta. ³ . Mwisa mwitaa tiavaro Sisasiva niari timwa niro titaro, Ntaaru qini saivaqava Devitivavaqa, mwira vaqama senta nriasavaqa, nraataa sisanta variavaro Devitiva mwi enara mwitaa sira mwi kuara qine sia qaraqi saara numwa senta riaarave siso? ⁴ . Mwi enara Devitiva Gotira nraavuqi vera nero bereti Gotiraini vataara vara sero nretaro neqa sero nrai mwira vaqama senta nriasavaqa sini nisanta nraarave. Gotira saiqa vara mwite varia vaintisa qai aataara vasisaro qumina vaintivano sia so nraanarove tia kuara Devitiva qumina vaintivano mwi sarara nretarora tiro, mwi kuara neqa sairave. ⁵ . Qine Mosesira kua mwo sia saara numwa senta riaarave siso? Gotira saiqa vara mwite varia vaintisa mwaara enaqaa Gotira nraavuqi mwo saiqa mwo saiqa vare variarave. Mwisa mwaara enaqaa mwi saiqara varaqinta vitanta qao timwa taa kuara neqase variavaro kuavano sia mwisaqaa vasirave. ⁶ . Qine Gotira nraavuara nroraqama senta rievariarara ne qini timwa nirerave. Gotira nraavu aatara sauva ne mwainima varuko. ⁷ . Gotira bukuqi mwitaama tiro: Vaintivano quaara rusetaro mi saiqara sia mwi saiqarara ni mwuntusa nisana varuko. Vaintivano mworara mpo timwa mwitetaro saaisaqama mwitaira, ne mwi saiqararama ni mwuntusa nisana varuko, tirave. Qine mwi kuara osara napisi senta rietanta nruaatiri, qine siama qaqi varia vaintisaqaa kua vate variatiri. ⁸ . Ni mwataini mwatatai nraaqiarara nroraqama saisana varitana ne mwaara enaqaa naqisitana soma nena sasa siani saiqara varaanirave, tiro. Sisasiva tirama. ⁹ . Sisasiva mwini pisero viva uro mwisa mwaara nraavu mwoqi varira. ¹⁰ . Varisaro vainti mwovano mwira sauqu tapanra viva varisanta mwiqi variasa Sisasiraqaa kua vatarera uti varitanta mwira numwinravira sinta titanta, Vaintivano mwaara enaqaa sena vainti mwavana suqema mwitairera, mwiva mwitaa sitaro tiri mwaara kua neqave saanaro, siave neqa saanarove? tinta. ¹¹ . Mwisa mwitaa tiavaro Sisasiva niari timwa niro titaro, Qiniqintairo vainti mwo sipisipivano mwaaraqa mwata qukuteraqi numwa virera, mwi vaintiva nrai sipisipi mpati mwaari qaqini saanarove siso, siave mpati mwaari saanarove? ( Mwiva mwaara enaqa nrai quaara mpati mwaari saanarove.) ¹² . Vaintivano sipisipi aatara sairara tiro, vaintivano mwaara enaqa vainti mwo suqema mwitairera, siama Mosesira mwaara kua neqa saanarove. Mwitaa sitaro mwiva suqe saiqa varaanarove, tiro. ¹³ . Mwitaa timwa sero Sisasiva vainti mwirara titaro, Rena sauqu tutuane, tisaro nrai sauqu tutisaro mwira sauquvano suqema viro sini sauqu voqiama viro vasira. ¹⁴ . Mwaara enaqaa mwira sauqu suqema saisanta Parisi vaintinravu veva nenta vitanta Sisasira ru se kuara nrai timwa mwi nrai timwa si variara. ¹⁵ . Mwisa mwira ru sareranta kua ti variara Sisasiva riero mwi mwatusara pisatero visanta nraase qora airivano mwira vataqinta vuavaro Sisasiva mwisaqintai ita vuasa esaa suqema sero ¹⁶ . mwisara titaro, Sia ne saiqa varaanirara mwosa timwa niate, tiro. ¹⁷ . Sisasiva mwitaa timwa sero mwitaamaqiro visaro ntaaru Aisaiaava vetanto enaqaa ti kuava mwivau vasira. Aisaiaava Gotiva mwitaama tiso, tiro: ¹⁸ . Ni saiqa vainti takuaane. Ne mwira vara mwaaviara taurave. Ni mwuntusavano mwirara vaisana ne mwirara quasetana varuko. Ne nena mwaraqura mwiraqaa vataariro mwiva avuqavu siani osarara mwo mwatanaa mwo mwatanaasa esaa timwa nianarove. ¹⁹ . Mwiva sia anua kua tiraitiro, sia aasara namwa sero timwaqi viranta aaraqaantaintavaqa nraase qoravano sia mwira kua rievarave. ²⁰ . Omwave quntove navanka viro vasianira mwiva sia mwini esaara neqa saanarove. Omwa qimpa virera uti varianira sia mwiva esaara qimpa saanarove. Mwiva mwitaa sitaro qisaasama sero variqiro viraro avuqavu siani osarava nritarero vasianarove. ²¹ . Esaa mwo mwatanaa mwo mwatanaasa mwira utu rietantama mwiva qai tiri saaisaqa siarivave tivarave, tira. Gotiva mwitaa tiso timwa sero ntaaru Aisaiaava mwitaa tira. ²² . Sisasiva varisanta mwo siasa vainti mwo vita varenta nriara. Vaanavano mwira vutaqi varisarora tiro, mwi vaintiva vu qimpa viva varitaro sia kuavaqa tiraitiro varisaro Sisasiva mwira suqema saisaro mwi vaintiva so takuetaro so kuavaqa ti varira. ²³ . Mwitaa sisanta nraase qorq mwini variasa mwi saiqara takuenta qisara sinta Sisasirara titanta, Qise, Devitira mwaaquvano qovara siariva mwaa mwi vaintivave siso? tinta. ²⁴ . Mwisa mwitaa tiavanta Parisi vaintinravuvano mwi kuara rienta qaqao tinta, Pierisepuriva vaana vuniaava Sisasira saaisaqa si varisarora tiro, mwiva so vaana tite varisanta nritarenta vi variavo, tinta. ²⁵ . Parisi vaintinravuvano mwitaa ti variavaro Sisasiva mwisa naumaqara napisiro mwisara titaro, Nkuaa mwatanaa varitaro ntusama viro nrai ri nrai ri si variariva qamwaramama taiqa vuanarove. Nta mwatanaavave, nta mwatusaraqinraavave, nta nraavuraqi variasave mwitaa sivera, mwisa qamwarama taiqa vivarave. ²⁶ . Saataaniva naqisi variari vaanasa vutaqa ntusama vinta nrai ri nrai ri sivera, nantaama serove Saataaniva mwisaqaa naqisiqiro vi variraro kempusaqama vasianarove. ²⁷ . Qine niara titanta, Pierisepuriva mwira kempusaqama saisarora tiro, mwiva vaana tite varivave. Niara mwi kuava quqaa vasirera, mo ntava qini vainti mwonravu saaisaqa si varisantave mwisavaqa vaana tite variavo? Qine niara tia kuarara qini vataqinta nrue varia vaintisama kumaari kuave tivarave. Qini vataqinta nrue varia vaintisa ti kuava qini tu varaanarove. ²⁸ . Gotira mwaraquravano ni kempusaqama saisana ne vaana tite varuko. Mwi kuava quqaa kua vasirara tinta, qine mwirara rietantama Gotiva tiriqaa naqisiari enava nri naiso tiate. ²⁹ . Qavaavaqa qini timwa nirerave, Nraavu qova kempusa vaintivano variraro muara vaintivano sia mwira rumpataraitiro, mwira nraavuqintairo sia so muara varaanarove. ³⁰ . Sia nivaqama sero variariva, mwi vaintiva ni nravutaama varianarove. Mwovano ni sipisipi sia aarama nkuaaqaa mitaariva varirera, mwi vaintiva ni sipisipi vataqiro uro mwona mwona raumpirima saarivama varianarove. ³¹ . Mwirara rietanama ne qini timwa nuko. Nraase qoravano maquqa si saiqara mwo qara mwo qara sianira utirave, maquqa si kuara mwo qara mwo qarama se mwosara tirave, Gotiva esaa mwi kuara nrunka niterovaqa vaintivano Gotira mwaraqurara maquqa si kuara tianira siama nrunka mwitaanarove. ³² . Vainti mwovano ni mwataini mwatatai nraaqiarara maquqa si kuara tirera, Gotiva mwi vaintira kua nrunka mwitaanarove. Vainti mwovano Gotira mwaraqurara maquqa si kuara tirera, Gotiva mwaa enaravaqa, naantiaravaqa, sia mwi vaintira kua nrunka mwitaanarove. ³³ . Satarivano suqe satari vasirera, suqe tamwa riaanarove. Maquqa siari satariva vasirera, maquqa si tamwara riaanarove. Vaintivano satari tamwa mwira takuetaro mwi satarirara suqe satarive, maquqa si satarirave, tianarove. ³⁴ . Qine quaisa maquq sira nraaqiarama variavo. Qine maquqa sia vaintisa varitanta qine nantaama sentave suqe kua tivarave? Mwira mwuntusaqive mwira naumaqaraqive mwo inraisa varaariva vaisaro ovano timwa qovara sirave. ³⁵ . Vainti suqeva nrai naumaqaraqintairove suqe saiqa varaariva vaisarora tiro, mwiva suqe saiqa qai vare varirave. Maquqa si vaintiva nrai naumaqaraqintairove maquqa si saiqara utuariva vaisarora tiro, mwiva maquqa si saiqara uti varirave. ³⁶ . Ne tianira riaate. Naantiara esaara enaqaa Gotiva ko titaroma mwaa enara qine mwo kua mwo kua qumina kua ti varirara rietaroma Gotiva qiniara qine naraiqamave mwi kuara mwataini varu enara tiarave, tianarove. ³⁷ . Qine mwaa enara suqe kua qai timwaqinta vivera, mwi enara ninta kuavano qini suvanu nitaanarove. Qine mwaa enara maquqa si kuara timwaqinta vivera, mwi enara ninta kuavano ninta rumpaanarove, tiro. Sisasiva tirama. ³⁸ . Sisasiva mwitaa timwa sero varisanta Parisi vainti sininravuvaqa, mwaara osara ti varia vaintisavaqa, Sisasirara titanta, Mwaara ti variara vaitio, nrora saiqa tirinravu vuqaa varairaqentama te ri osara takuentama quqaama re Gotiva titaisara tukuara vaintiva variaro tiare, tinta. ³⁹ . Mwinravusa mwitaa tiavaro Sisasiva titaro, Maquqa si saiqara qai uti variasave, Gotirara quminaqama senta nrue variasave, mwitaa siasama nrora saiqa tiri qumiqairaqenta quqaave tiare ti variarave. Sia ne qini vuqaa nrora saiqa vararerave. Gotiva ntaaru qini saivaqara poropeti vainti Sonaara mwitaama sainema sero Gotiva nivaqa mwitaa sianarove. Mwirara rietantama qine niara Gotiva titaivave tivarave. ⁴⁰ . Tavusa nroravano mwira atahu saisaro sonaava taaramwo ena enaqivaqa qisaravaqa tavusa visosaqi varirave. Nkuaa meraaqa sena nevaqa mwataini mwatatai nraaqiarava taaramwo ena mwata vutaqi variqina vuanirave. ⁴¹ . Sonaava taaramwo ena tavusa visosaqi variro mwiaqaantairo uro Niniveqi variasa Gotira kua timwa nisanta mwi mwatanaasa qamwarama senta mwira kua rienta maquqa si aarara qaqira pisatenta variarave. Naantiara esaara enaqaa mwi mwatanaasa Gotira vaqama senta varitanta qiniqa kua vatetanta mwitaama tivarave, Te Sonaara kua rietantama maquqa si aarara qaqira pisataunarave. Sonaara aatara sai vaintiva qine varianaini uro naisanta qine sia mwira kua riaarave, tivarave. ⁴² . Ntaaru vetanto enaqaa qini saivaqava Soromoniva mwo osara mwo osara takue variva varisaro vuniaa nraase mwovano mwira kua riarero vevara nriaara ntaintairove uro Soromonira kua riairave. Mwi nraaseva mwitaa sirara tiro, mwivavaqa naantiara esaara enaqaa qiniqa kua vatetaro mwitaama tianarove. Ne nriaarantaina Soromonira kua nrima riaurave. Qine ntaaru variavaro Soromonira aatara sai vaintiva varisanta qine sia mwira kua riaarave, tianarove, tiro. Sisasiva tirama. ⁴³ . Sisasiva mwitaa timwa sero titaro, Vaanavano vainti vutaqintairo nritarero vuariva aasara mwataqaa vitaro sai ne ho siase timwa sero takuairaro sia ho siariva vasiraro ⁴⁴ . mwiva nrai titaro, Sai ne nrima nanatena vota qaqira pisau nraavura vainti vutaqi uro qavaa variase, timwa sero uro takuaisaro mwi nraavuva qumina vaisaro nupi se siqama sero avuqavuma taiva vasirave. ⁴⁵ . Mwiaqaantairo vaana mwiva uro nrai sena vaana 7 nravu nrai mwiravaqa aatara senta maquqa si saiqara uti variasa aarama se ntita varero uro mwi vaintira vutaqi varirave. Naantiara mwi vaintiva vaana airi sampaqa varitaro anoma sero maquqama viro varirarama tuko. Mwaa enaravaqa maquqa si saiqara uti varisa, mwisavaqa maquqama vinta varivarave, tiro. ⁴⁶ . Sisasiva mwi kuara nraase qora timwa ni varisanta mwira nrovavaqa mwira qatanravuvaqa nri nenta mwira kua timwa mwireranta mwaaqaqa ntivi variavaro ⁴⁷ . mwovano Sisasira uro timwa mwiro titaro, Ri nrosa qata ri kua timwa mwireranta nrima mwaaqaqa variavo, tiro. ⁴⁸ . Mwiva mwitaa tisaro Sisasiva titaro, Ntasave ni nrosa qata vasaa variavo? tiro. ⁴⁹ . Mwitaa timwa sero Sosasiva nrai nraaqiara mwinravusaqa sauqu tutiro titaro, Mwaasama ni nrosa qata vasaa variavo. ⁵⁰ . Ni ntova naavuni varira mwira kua rietanta nrue variasa, mwisama ni qata vasaa, ni nrura nrasaa, ni nrosa variavo, tiro.