¹ . Nkuaa mwi enara Sisasiva nraavu mwiqintairo veva nero uro nruka tosaini mwatasaa viro mwini variase tisanta ² . nraase qora airivano ntununukaama vinta mwira ututuma taavarora tiro, mwiva qaqira pisatero uro botiqi mwaari nero mwiqi mwatasaa viro nramariqaa varisanta nraase qoravano nramari tosaini variavaro ³ . Sisasiva mwo kua mwo kuaqaa numwa setaro timwa nira. Mwiva mwitaama tiro: Vainti mwovano sara suku intasasirero virave. ⁴ . Mwiva sara suku intataqiro visaro mwo siva aara tosaini unto nisaro kurivano nrima nramwa sairave. ⁵ . Mwo siva ori mwataqaa unto nisaro mwatavano sia vevainiqama vasi mwatava vasisarora tiro, unto niro qamwarama kumpiqa visaro ⁶ . suarivano nri nero itetaro aasarama saisaro mwia tuqavano sia mwataqi vevanto virara tiro, aasarama virave. ⁷ . Mwitaa sisaro mwo siva qankusa uki auquqa siva kumpiqairaqi unto niro vankusavaqama sero kumpiqa visaro vankusavano numwaqu saisaro sia tamwa riairave. ⁸ . Mwitaa sisaro sara suku sinivano suqe si mwataraqaa unto niro suqema sero kumpiqetaro uro suqe tamwa airi riatairave. Airi riataisaro mwo siva mwiavaqa aatara sero mwoqavaqa riataisaro qavaa mwo siva mwiavaqa nrai aatara sero nroraqama sero riatairave. ⁹ . Qini aato vasirera, mwi kuara osara napisi senta riaate, tiro. ¹⁰ . Sisasiva mwi kuaraqaa numwa sero timwa nisanta mwira nraaqiaranravuvano mwiva sinaini nri nenta mwira nuviravira sinta titanta, Re naraiqamave nraase qora sia kua vutu se timwa niraitira, mwo kuaqaa numwa setara timwa ni variaro? tinta. ¹¹ . Mwisa mwitaa tiavaro Sisasiva timwa niro titaro, Gotiva nraase qoraqaa naqisiani kuara qumpautai kuara, mwi kuara qiniara mwisa qaqi sairanta mwi kuara osara riaate timwa sero, qumina nraase qorara sia mwi kuara riaate tirave. Mwitaa tirara tina, ne mwo kuaqaa numwa setana mwisa timwa ni varuko. ¹² . Gotira kua riaariva variqiro viraro Gotiva mwira saaisaqa siraro mwira kua mwoqavaqa riaarive. Mwiva mwitaamaqiro vitaro Gotira kua mwoqavaqa riaanarove. Gotira kua sia riaariva variqiro viraro mwiaqaantairo pataiqa tutaanira mwira navisise varairaro mwiva qumina varianarove. ¹³ . Nraase qoravano takuetantavaqa sia napisi senta takue variarave. Mwisa kua rietantavaqa sia napisi senta riaarave. Mwisa mwitaa siarara tina, ne mwo kuaqaa numwa setana mwisa timwa ni varurave. ¹⁴ . Nraaes qora mwitaa si variarara tiro, ntaaru vetanto enaqaa Aisaiaava Gotira kua qovarama sai kuava mwaa enara mwivauma vasiro. Mwiva mwitaama tiro: Mwaa mwatanaasa naumaqaravano quminaqama visantara tinta, mwisa kua riaaqinta vitantavaqa sia kua napisi riaarave. Mwisa takuamwaqinta vitantavaqa sia napisi senta takuaarave. ¹⁵ . Mwisa vu aato mwuntusavano kempusaqama visanta mwisa niari aato suvaivu tenta niari vu qimpa tenta variarave. Mwisa sia mwitaa siraitinta, mwisa niari vuqaantainta takuetanta niari aatoqaantainta rietanta ni kua napisi senta rietanta maquqa si aarara qaqira saivaqenavauma ne mwisa suqema saanirave, tirave. Aisaiaava Gotiva mwitaama tiso, tirave. ¹⁶ . So, qinenravu vuqaantainta suqema senta takue varitanta aatoqaantai suqema se rie variarara tinta, qine quasetantama varivarave. ¹⁷ . Ntaaru vetanto enaqaa poropeti vaintivanove, suqema senta qai suqe aaraqaa nrue varia vaintisave, mwisa qine maqe takuaa inraisara takuaare tiara sia takuaarave. Mwisa qine maqe riaa kuara riaare tiara sia riaarave, tiro. ¹⁸ . Mwitaa timwa sero Sisasiva nrai nraaqiaranravu timwa niro titaro, Qinenravu rie varivaqena ne sara suku intatamaqiro vi vaintiraqaa numwa setana timwa nu kuara, mwi kuara osara qini timwa niase. ¹⁹ . Gotiva nraase qoraqaa naqisiani kuara, vainti mwovano mwi kuara sia napisi sero riaraitiro varisaro Saataaniva nri nero mwira mwuntusa vu aatoqintairo mwi kuara navisi sero varairave. Mwi vaintiva sara sukuvano aara tosaini unto nira voqiama seroma variso. ²⁰ . Sara suku mwo siva ori mwataqaa unto ni osarava vasirero mwataamama vasiro. Vainti mwo siasa Gotira kua rienta, mwi kuarara quasama senta variavaro ²¹ . kuavano sia mwisa mwuntusaqi tuqa tuta sero vaisanta mwisa sia muasaama varitanta mwi kuara rienta. Mwi kuara saara mwisa maquqama nitarera uti variavanta mwisa tiri rivorave timwa senta Gotira kua qamwarama senta qaqira pisaarave. ²² . Sara suku mwonravuvano vankusa uki auqu vasiraqi unto niva mwia osaravano vasirero mwataamama vasiro: Mwo siasa Gotira kua rienta mwiaqaantainta mwisa mwatainiaa inraisara nroraqama senta rietanta moniarave mwo inraia mwo inraisara quasetanta mwia varerara qai nroraqama senta riaaqinta vitanta Gotira kua qaqira qaqira pisaavaro Gotira kuavano sia mwisaqi vasiqiro virave. ²³ . Sara suku mwonravuvano suqe si mwataraqaa unto nira osaravano vasirero mwataamama vasiro: Mwo siasa Gotira kua napisi senta rienta mwiaqaantainta mwisa Gotira kua riaaqinta vitanta suqe saiqa Gotiraini varaqinta vi variavanta mwosa Gotira kua riaaqinta vitanta mwisavaqa aatara senta Gotira saiqa varaarave, tiro. Sisasiva mwitaa tirama. ²⁴ . Sisasiva varitaro mwo kuaqaa numwa sero nraase qora timwa niro titaro, Gotiva nraase qoraqaa naqisiariva vasirero mwaa kuara voqiama sero vaiso. Vainti mwovano suqe suku uiti suku nrai vutaqi intatasirave. ²⁵ . Intatamataisanta esaasa enaqi vaita vinta sia takuaavaro mwira nravutaa mwovano nri nero uiti intatamatairaqi vankusavaqa intatamatairave. (Mwi vankusava vasirero mwia vekyavata qituvaqa uiti voqia sisaro mwia tamwa qai sia nkuaameraa sirave.) Mwira nravutaavano maquqa si sukura intatatero visaro ²⁶ . uitivano vankusa vaqama sero nkuaaqi kumpiqero qauma tamwa riarero utisanta mwira saiqa vaintinravuvano takuavaro mwi vankusava uiti vaqama sero kumpiqero vasirave. ²⁷ . Takuenta mwira saiqa vaintinravuvano uro vuta qora sapara sinta titanta, Nrorao, re suqe suku intatamasaanarave siso? Ntaintairove mwi vankusava qovarama viso, tinta. ²⁸ . Mwitaa tiavaro vuta qova titaro, Qise, ni nravutaa mwovano vankusa ni vutaqi intatama taiso, tisanta mwira saiqa vaintinravuvano mwira sapara sinta titanta, Sove te uro mwi vankusara naruku saanarave? tiavaro ²⁹ . mwiva qao tiro, Sia vankusa mwia naruku saate. Qine vankusa narukitanta uiti vaqama senta naruku sevorave. ³⁰ . Qaqi saivaro uitivanovaqa vankusavanovaqa nkuaaqi kumpiqaarive. Uitivano mpeqa siqe ne ni sara vanu varetanta nria vaintisara mwitaama tianirave, Qine mwi vankusara naane toqa se rumpa senta varaqi uro tia quara tentama mwiaqaantaintama uiti toqa senta varaqinta ni sara nraavuqi uro mitaate, tianirave, tiro. Sisasiva mwi kuaraqaa numwa sero timwa nira. ³¹ . Sisasiva varitaro nraase qora mwo kuaqaa numwa sero timwa niro titaro, Gotiva nraase qoraqaa naqisiani kuava mwaa kuara voqiama seroma vaiso. Vaintivano maasiteti uru varaqiro uro nrai vutaqi vara tutairave. ³² . Mwia uru mwiva pata uapaaraqaini vasirave. Mwia vara tutaisaro kumpiqero satari nroraqama viro sini saravaqa aatara sero satari nrora vaisaro kurivano mwia qumaraqi nraavu soqatenta variarave, tira. Sisasiva mwi kuaraqaa numwa sero timwa nira. ³³ . Sisasiva varitaro nraase qora mwo kuaqaa numwa sero timwa niro titaro, Gotiva nraase qoraqaa naqisiari kuava mwaa kuara voqiama seroma vaiso. Mwiva taupataira voqia sirave. Nraasevano bereti suntarera sitaro uiti parauaa vara sero mwia ntotaarive tiro taupataira vara sero parauaa vaqama sero kuantaa saisaro taupataiva vutaqi vaisaro beretivano nuai paaniqa siro ntota virave, tiro. Sisasiva mwi kuaraqaa numwa sero timwa nira. ³⁴ . Sisasiva nraase qora mwo kua mwo kua timwa nirero mwiva sia vutu sero timwa niraitiro, mwiva mwo kuaqaa numwa setaro qai timwa niqiro vira. ³⁵ . Mwiva mwitaa timwaqiro visaro ntaaru vetanto enaqaa poropetivano ti kuava quqaa mwivau vasira. Mwi kuava mwataama tiro: Ne nraase qora kua timwa nirera sina sia vutu sena timwa niraitina, mwo kuaqaa numwa setana timwa nirerave. Mwaa mwatara ututai enaraqaantairo kua qumpau sero vataqiro vi kuara sia riaara ne mwi kuara osara qini timwa nirerave, tira. ³⁶ . Sisasiva mwo kuaqaa mwo kuaqaa numwa sero timwa niqiro viro mwiaqaantairo mwiva nraase qora mwini sero nraavuqi visanta mwira nraaqiaranravuvano mwiva variraqi uro nenta Sisasirara titanta, Vota tiana kuara mwia nravutaavano vankusa mwia vutaqi intatama ta kuara mwi kuara osara tiri timwa timwiraqe riaare, tinta. ³⁷ . Mwira nraaqiaranravuvano mwitaa tiavaro Sisasiva mwinravusa timwa niro titaro, Vainti mwovano suqe suku intata si vaintirara tura ne mwataini mwatatai nraaqiarava ne mwaa mwivave. ³⁸ . Vainti mwira vuta osaravano vasirero esaa mwaa mwatavama vaiso. Suqe suku mwia osaravano vasirero Gotira kua riaa nraase qorasama variavo.Vankusa mwia oaravano vasirero sia Gotira kua riaa nraase qorasa Saataanira nraaqiarama variavo. ³⁹ . Mwira nravutaavano vankusa suku intatama taa vaintira osaravano vasireromwiva Saataanivave. Sara vanu varenta nria enara osaravano vasirero vasirero naantiara mwaa mwatava taiqaani enavama vaiso. Sara vanu varenta nria vaintisa osaravano vasirero mwisa naavuniaa vaintinravuve. ⁴⁰ . Mwira saiqa vaintinravuvano vankusa toqa se rumpa senta varaqi uro tiaqi quara taanema sero, naantiara mwaa mwatava taiqaani enaraqaa mwitaa sianarove. ⁴¹ . Ne mwataini mwatatai nraaqiarava variqi vina mwaa mwatava taiqaani enaraqaa ne naavuniaasa titaarinta mwisa unto ne naqisu mwataraqaantainta sia suqe nraase qora ni nraaqiaranravu maquqama nite variasavaqa, esaa maquqa si saiqara uti variasavaqa, rumpaqinta ⁴² . tia nrora itaaniraqi tuta saivanta mwisa tiaqi varita atura nitanta nataqi vitanta niari aarai teti nretanta varivarave. ⁴³ . Mwisa mwini uro tuta saivanta avuqavuma senta nrue vari nraase qorasa suarivano itainema senta itaqi vivaro Gotiva mwisa ntova mwisaqaa naqisiqiro viranta variqi vivarave. Qini aato vasirera, mwi kuara osara napisi senta riaate, tiro. Sisasiva mwitaa tirama. ⁴⁴ . Sisasiva mwo kuaqaa numwa sero nraase qora timwa niro titaro, Gotiva nraase qoraqaa naqisiariva mwaa kuara voqiama seroma vaiso. Mwiva nrora moni vasi inraisara qumpau taira voqiama seroma vaiso. Mwataqi mwi inraisara qumpau taiva vaisaro vainti mwovano mwira mpaama se takuero, mwiaqaantairo mwiva quasero mwi inraisara qavaa qumpau tero uro mwi mwatara soqaa siase timwa sero mwiva esaa nrai vatai inraisara niro moni vara sero uro mwi mwatara soqaama sero varero uro nrora moni vasi inraisara qumpau taira mwiavaqa varairave, tiro. ⁴⁵ . Sisasiva mwitaa timwa sero mwiva mwo kuaqaa numwa sero timwa niro titaro, Gotiva nraase qoraqaa naqisiariva mwaa kuara voqiama seroma vaiso. Vainti mwovano sau mwusaari voqia sira soqaa sirero mwo mwatusa mwo mwatusa mpaasi vari vaintira voqiama seroma vaiso. ⁴⁶ . Mwi vaintiva nrora moni vasira mwi inraisara mpaama sero uro nrai vatai inraisara mwosa niro moni varaqiro uro mwia vatai vaintira mwiro sau mwusaari voqia sira nrora moni vasira mwia varairave, tiro. ⁴⁷ . Sisasiva mwitaa timwa sero mwiva mwo kuaqaa numwa sero timwa niro titaro, Gotiva nraase qoraqaa naqisiariva mwaa kuara voqiama seroma vaiso. Vaintivano vaae nramari nroraqi miavi saavanta tavusa airi mwo qara mwo qara siasa mwiqi vinta varia kuara voqiama seroma vaiso.Vaae nramari nroraqi miaavi saavanta tavusa airivano vitarenta ⁴⁸ . nkuravinta variavanta vaintivano vaae mwia narauqinta uro nramari tosaini senta mwiqintai ntusama senta tavusa suqe siasa vara senta mwo tuaqi numwa tenta maquqa siasa vara senta qaqira pisaarave. ⁴⁹ . Naantiara esaara enaqaa mwia voqiama sero vasianarove.Mwi enara naavuniaasa tukinta nraase qora ntusama senta napisi senta nrue varisa qaqi senta, maquqa si saiqara uti vari nraase qorasa ⁵⁰ . vitaqinta uro tia nrora itaaniraqi tuta saivanta mwisa mwiqi varitanta sevu avu tinta natetanta niari vai nkutitanta varivarave, tiro. ⁵¹ . Sisasiva mwitaa timwa sero nrai nraaqiaranravu sapara siro titaro, Qini mwi kuara mwi kuara qini timwa nura napisi sentave riaavo? tisanta mwinravusa eo tiavaro ⁵² . mwiva mwinravusa timwa niro titaro, Gotira ntaaruaana kua osara timwa ni vari vaintisaqintairo mwovano Gotiva nraase qoraqaa naqisiani kuararavaqa quqaave timwa sero Gotira nraaqiaraqama vuariva, mwi vaintiva nraavu mwo qova voqiama seroma variro. Mwi vaintiva nrai nraavuqi mwo inraisa mwo inraisa vatairaqintairo ntaaruaana inraisa suqe inraisavaqa, qaraasa inraisa suqe inraisavaqa, vare varirave, tiro. ⁵³ . Sisasiva nraase qora mwo kua mwo kuaqaa numwa setaro timwa ni taiqa sero mwiva mwi mwatusara sero ⁵⁴ . nrima nanatero uro nrai mwaaqaini mwaara nraavuqi varitaro mwo kua mwo kua timwa nisanta nraase qoravano qisara sinta titanta, Qise, mwi vaintiva ntaintairove mwi kuara mwi kuara suqe kua riaiso? Ntava mwira kempusa mwisarove mwiva nrora saiqa vare variso? tinta. ⁵⁵ . Mwisa mwitaa timwa senta qao tinta, Mwi vaintiva nraavu soqe vari vaintira mwaaquvanoma variso. Mariaava mwira nrovama variso. Semisivavaqa, Sosepivavaqa, Saimonivavaqa, Suntaasivavaqa, mwinravusa mwira qatanravuma variavo. ⁵⁶ . Mwira nruranravu mwaini tirivaqa variavo. Ntaintairo mwiva mwi saiqara mwi saiqara osara takuairave? tinta. ⁵⁷ . Mwitaa timwa senta mwisa Sisasirara titanta, Mwiva sia nrora vaintive. Mwiva qumina mwaa mwatanaava qaima variso, timwa senta mwira qoririma mwitaara. Mwisa mwitaa tiavaro SIsasiva mwisa timwa niro titaro, Poropeti vaintivano mwo mwataini uro variraro mwi mwatanaava mwirara nrora vaintive tiroma mwirara quasama mwitaanarove. Mwi vaintiva nrai mwaaqaini uro nrai nravunaasa vaqama sero variranta mwira nravunaasa mwirara qumina vaintima tiri voqiama sero qaima variso tivarave, tiro. ⁵⁸ . Sisasiva mwitaa timwa sero mwi mwatanaasa mwirara qumina vaintivano sia tiri so saaisaqa siarivave tiarara tiro, Sisasiva mwini varitaro nrora saiqa patgaiqatana qai vara nitaira.