¹ . Mwi enara Herotiva vuniaa vaintivano Gaririqaa naqisi varitaro nraase qoravano Sisasirara ti varia kuara riaara. ² . Riero Herotiva nrai saiqa vaintiara titaro, Qise, mwi vaintiva Sonivave. Soniva nramari ni vari vaintiva qutu viraqintairo qavaa qaqi ntiviro nrue variso. Mwiva qavaa qaqi ntiviro nruetarora tiro, mwiva nrora saiqa so vare variso, tiro. ³ . Vuni Herotiva nrai qata Piripira nraata Herotiaasira varero varisaro Soniva Herotira timwa mwiro titaro, ⁴ . Re rena qata nraase sia varaataara vaisarama varaaro, tisaro mwi kuara saara Herotiva vainti mwo titaisaro uro Sonira navaaqavu sero mwira rumpaqiro nrima karavusiqi saira. ⁵ . Herotiva Sonira ru saataa sisaro nraase qora aatu aatu sitaro sia mwira ru saira. Nraase qora Sonirara poropeti vaintivanove tiavarora tiro, Herotiva ne mwira rusaarinta ni irora sivorave timwa sero varira. ⁶ . Mwitaamaqi viro Herotiva nrai mwataa enava qovara sisaro mwi enaraqaa vainti mwonravuara aasara naisanta riri ntununukaama vuavaro Herotiaasira nraavuravano mwisa isi namwa nitaisaro Herotiva mwira takuero mwoqama sero quasama mwitero ⁷ . nrai sauqu iqiqaa vatero titaro, Nara inraisarave ri mwuntusa vasianira ni timwa miraqe ri mwiase, tiro. ⁸ . Mwitaa tisaro mwi quaasi mwaraatava nrai nrora sapara sisaro mwira nrova mwi kuara tiane tisaro mwi mwaraatava Herotirara titaro, Soniva nramari ni vari vaintira mwira qiata tanaaqa vatera varaqi nrima ni miaane, tiro. ⁹ . Mwitaa tisaro Herotiva vuniaava varisaro mwira mwuntusavano maquqa sisaro varitaro mwiva vota sauqu iqiqaa vatetaro sara nrareranta nrima varia vaintisa vuqaa timwa tai kuarara rietaro mwiva vainti mwo titero mwi quaasi mwaraatava tinema sera mwitaa siane tisaro ¹⁰ . mwi vaintiva uro karavusiqintairo Sonira quna tuqu sero ¹¹ . Sonira qiata tanaaqa vatero varaqi uro mwi mwaraatara mwisaro mwiva nrai nrora uro mwirama. ¹² . Sonira vataqi nruaa vaintisa nrima Sonira mwavana varaqinta unto qunamwa tenta mwiaqaantainta mwisa uro Sisasira timwa mwiara. ¹³ . Sonirara Sisasira uro timwa mwiavaro Sisasiva mwi kuara riero mwini pisate botiqi mwaari nero nrai nraaqiaranravu sampaqa niariaraa varireranta sia vainti varianaini vuavanta nraase qora airivano mwisa vua kuara rienta mwo mwatusa mwo mwatusaqintainta mwisa mwatanuna Sisasira vataqinta vuara. ¹⁴ . Vuavaro Sisasiva botiqi nramariqaa viva uro nero takuaisanta nraase qora airivano ntununukaa sinta variavaro mwiva mwisara mpo timwa nitero mwisaqintairo ita vua nraase qorasa suqema nitaira. ¹⁵ . Sisasiva mwini varisaro suarivano tuki visanta mwira nraaqiaranravuvano mwiva sinaini uro nenta titanta, Mwaini qumina santave. Ena siasorave. Nraase qora mwaasa titairanta uro mwatusa vasianiraqintainta sara soqaama senta nraate, tinta. ¹⁶ . Mwira nraaqiaranravuvano mwitaa tiavaro Sisasiva qao tiro, Sia mwisa titaivanta vuate. Nentavano mwisa sara nivanta nraate, tiro. ¹⁷ . Sisasiva mwitaa tisanta mwinravusa qao tinta. Te takuauraro mwaini bereti sauquruvaqa tavusa taaratanavaqa qaima vaiso, tinta. ¹⁸ . Mwisa mwitaa tiavaro Sisasiva mwi sarara mwaini vara ni miaatetimwa sero ¹⁹ . nraase qorara mwusausanta mwatasaa vinta variate timwa sero mwiva bereti sauquruvaqa tavusa taaratanavaqa vara sero naavuni takuetaro Gotirara suqeve timwa sero bereti kuveqa sero mwi sarara nrai nraaqiaranravu nisanta mwisa nraase qora esaa ntusama senta niavanta ²⁰ . mwisa esaa so nraara. Esaa nraase qoravano so nraavanta mwiaqaantainta mwira nraaqiaranravuvano qurutaa tuara tua nrora varenta mwisa nretanta viti vaati saa sarara ntunu senta tua 12 nravu kuraaqa saara. ²¹ . Mwi enara vainti qai 5,000 vano nraavanta nraase nraaqiara airivanovaqa mwi sarara nraara. ²² . Sisasiva sara nitero mwiaqaantairo nrai nraaqiaranravu titero titaro, Qine botiqi mwaari nenta nrukaqaama tenta sini tosaini qine naane vi varivaqe ne nraase qora titaarinta niari mwaaqaini mwaaqaini vuate, tiro. ²³ . Mwitaa timwa sero mwiva nraase qora niari mwaaqaini titamwa sero mwiaqaantairo Gotiravaqa kua tirero verara qaataqaa visaro enama visaro mwiva mwini nrariaara varira. ²⁴ . Varisaro botivano nramari tavaaraqaa visaro vaururuvano mwisa vuare tianantairo nrisarora tiro, nramarivano boti venaqiro vi varira. ²⁵ . Vaururu tivaisaro nramarivano boti venaqiro vi varisaro qauma qataasirera sinaini Sisasiva nruka mwutuqaa qiquqaantai namwaqiro viro mwisa sianaini visanta ²⁶ . mwira nraaqiaranravuvano takuavaro mwiva nruka mwutuqaa qiquqaantai namwaqiro nrisanta mwisa mwoqama sero aatuqitaisanta vaanave titanta nroraqama senta aatu si varitanta kua aasara ora ne variavaro ²⁷ . Sisasiva qamwarama sero mwisara titaro, Kempusaqama senta qaqi variate. Nema nruko. Sia aatu siate, tiro. ²⁸ . Sisasiva mwitaa tisaro Pitaava titaro, Nrorao, quqaa re varirera, tiraqe nevaqa nruka mwutuqaa qiqu namwaqina re sianaraini vuase, tiro. ²⁹ . Pitaava mwitaa tisaro Sisasiva titaro, So nriaane, tiro. Mwitaa tisaro Pitaava botiqintairo mwaavi nero nruka mwutuqaa qiquqaantai namwaqiro Sisasiva sinaini viro. ³⁰ . Mwiva mwini vitaroma so vuanirave timwa sero takuaisaro vaururuvano nroraqama sero tisaro mwiara rietaro mwiva aatu si varisaro mwira qiquvano nramariqi mwatainiara vi varisaro mwiva Sisasirara aasara nero titaro, Nrorao, ni tu varaane, tisaro ³¹ . Sisasiva qamwarama nrai sauquqaantai viti sero mwira tu varero titaro, Re vaururuvano tirara qai qai rietara siama niara kempusaqama sera riaaro. Naraiqamave re taara naumaqara tutaaro? tiro. ³² . Sisasiva mwitaa timwa sero mwisaniri botiqi mwaari naisaro vaururuvano qamwarama taiqa vira. ³³ . Mwitaa sisanta mwira nraaqiaranravu botiqi variasa Sisasirara quasetanta mwaraqa timwa mwitenta titanta, Re quqaama Gotira mwaaquvano variaro, tiara. ³⁴ . Mwinravusa mwitaa timwa senta botiqi nramariqaama tenta Genesaretini uro naara. ³⁵ . Uro naavanta mwi mwatanaasa Sisasira napisi senta takuenta kua raaqu saavaro esaa mwia vaini vasi mwatusaraqi viro nriro sisanta esaa mwi mwatanaasa ita vi nraase qorasa ntitaqinta nrima Sisasiva varinaini sentama ³⁶ . Sisasirara mpo tinta titanta, Sairanta mwisa ri vaaqa vitiqaa saatu saivaro naara mwisa mwavana suqema vuarive, tiavanta Sisasira vaaqa vitiqaa tu varaasa suqema qai vuara.