¹ . Parisi vaintinravuvaqa, mwaara osara ti varia vaintisavaqa, Sisasira takuareranta Serusaremintainta nri nenta Sisasira sapara sinta titanta, ² . Naraiqamave ri nraaqiaranravuvano tiri saivaqasa timwa taa kuara neqa se variavo? Ri nraaqiaranravuvano sia sauqu siqaraitinta, sara nre variarave, tinta. ³ . Mwisa mwitaa tiavaro Sisasiva niari timwa niro titaro, Qine mo, naraiqamave Gotiva vatai kuara sia riaraitinta, nenta kua qai riaaqinta vi variavo? ⁴ . Gotiva mwitaama tiro: Rena nrosa qosa utu tuaarera nitaane, timwa sero Gotiva qavaa titaro, Nrai nrora qorara maquqa si kuara ti variani vaintira ru saate, tirave. ⁵ . Gotiva mwitaa timwa tai kuava vaisanta qine mwi kuara sia riaraitinta, nenta riasenta qine titanta, Vainti mwovano nrai nrosa qosara titaro, Ne qinitana saaisaqa sitana nirera siani monira sia qinitana niraitina, Gotira mwirerave, tirera, ⁶ . mwi vaintiva soma nrai nrosa qosa qaqira pisero sia mwitanaqaa naqisiqiro vuanarove, tiarave. Qine kumaari kua timwa setantama qini saivaqasa timwa taa kuara nraase qora timwa nitanta qine Gotira kua ru senta siavo. ⁷ . Qine kumaariqama setanta suqe saiqa vare variasave. Aisaiaava ntaaru varitaro qiniara napisi sero kua qara numwa tairave. Aisaiaava Gotira kua qovarama setaro Gotiva mwitaama tiso, tiro: ⁸ . Mwaa mwatanaasa oqintainta qai ni utu tuaarere variavaro mwisa mwuntusavano sia niara vaisanta variarave. ⁹ . Mwisa mwaara titantama niari nraaqusa kua qai timwa nitantara tinta, mwisa quminama ni utu tuaarere variavo, tirave. Aisaiaava ntaaru qiniara mwitaa tirave, tiro. ¹⁰ . Sisasiva mwitaa timwa sero nraase qora aarama sero mwisara titaro, Mwaa kuara rietantama napisi senta naumaqaate. ¹¹ . Vainti oqi vitare vari inraisava sia mwira vara maquqama sairave. Mwira oqintairo nrinai inraisava mwi inraisava mwira vara maquqama se varirave, tiro. ¹² . Sisasiva mwi kuara timwa sero varisanta mwira nraaqiaranravuvano mwiva sinaini uro nenta titanta, Re siave napisiaro? Parisi vaintinravuvano re votaini timwa niana kuara rienta maquqa si kuarave timwa senta sia mwirara quasaavo, tinta. ¹³ . Mwisa mwitaa tiavaro Sisasiva titaro, Ni ntova naavuni variva takuairaro mwiva sia vara tuari inraisava kumpiqairaro mwiva mwi inraisara tuqa vaqama sero naruku saanarove, tiro. ¹⁴ . Mwitaa timwa sero mwiva Parisi vaintiara titaro, Sia mwisara nroraqama senta riaate. Mwisa vu qimpa visanta variasa sia aara takuaraitinta, varitanta vu qimpa vuasa saata mwonravuvaqa aara qumiqareranata uti variasave. Vu qimpa vuari vaintiva nrai sena vu qimpa vuani vaintira aara qumiqaase tianira so mwitanaqama oraqi nutu vivarave, tiro. ¹⁵ . Sisasiva mwitaa tisaro Pitaava titaro, Votaini nraase qora mwo kuaqaa numwa sera timwa niana kuara tiri timwa timwiraqe te mwi kuara osara napisi senta riaare, tisaro ¹⁶ . Sisasiva titaro, Qise, qinevaqa mwinravusa voqiama senta siave napisi riaavo? ¹⁷ . Qine sia napisiarave siso? Saravano oqima sero viva mwiaqaantairo raraqi viro mwiqintairo qaqinaini tuki tarairave. ¹⁸ . Vainti mwuntusaqi vasi inraisava oqaantairo qaqinaini nrinaiva, mwi inraisava vainti vara maquqama sairave. ¹⁹ . Vainti vu aato mwuntusaqintairo maquqa si inraisarara riaiva nri varirave. Vainti rusaarivave, mwora nraatara nruaarivave, sampi qaraqiro nruaarivave, muaara varaarivave, kumaari tiarivave, mwora utu mwataini tuki vuarive tiro kumaari kua tiarivave, mwiqintairo nri varirave. ²⁰ . Mwi inraisava mwi inraisava vu aato mwuntusaqintairo nri nero vainti vara maquqama saisaro Gotiva mwi vaintirara maquqa si vaintirave tirave. Vaintivano sia sauqu siqama sero sara nraariva sia mwira vara maquqama sairaro Gotiva mwirara maquqa si vaintirave tianarove, tiro. ²¹ . Sisasiva mwitaa timwa sero mwi mwatara sero uro mwo mwataqaa mwatusa taaratana Taiaavaqa Saintonivaqa vasi mwataraqaa varira. ²² . Mwini uro varisaro mwi mwataraqaanaa nraase mwovano Kenaani nraasevano Sisasiva varinaini uro nero Sisasirara nroraqama sero aasara nero titaro, Nrorao, Devitira mwaaquo, niara mpo timwa mitaane. Vaanavano ni nraavura vutaqi varisaro mwiva maquqama sero variso, tiro. ²³ . Mwi nraaseva mwitaa tisaro Sisasiva sia kua tiraitiro varisanta mwira nraaqiaranravuvano mwiva sinaini uro vaavaa tinta, titanta, Mwi nraasera saaisaqama sairaro vuarive. mwiva tiri vataqiro nritaro aasara namwaqiro nrisaro tiri puposaiso,tinta. ²⁴ . Mwisa mwitaa tiavaro Sisasiva qao tiro, Isareri vaintivano sipisipi voqiama senta raumpirima vuavaro Gotiva ni titaisana ne mwi mwatanaasa qai saaisaqama nitarerana tukuvave, tiro. ²⁵ . Sisasiva mwitaa tisaro mwi nraaseva nrima Sisasira vuqaa unto niro variro titaro, Nrorao, Qaqi ni saaisaqama mitaane, tisaro ²⁶ . Sisasiva qao tiro, Ne nraaqiara sara vara sena vairivano sinaini saasorave, tiro. ²⁷ . Sisasiva mwo kuaqaa numwa sero mwitaa tisaro mwi nraaseva titaro, Nrorao, vaintivano sara nretaro viti vaati saira qaqi vairivano nrairave, tiro. ²⁸ . Nraase mwiva mwitaa tisaro Sisasiva titaro, Re nraase niara kempusaqama sera riaaro.Nara inraisara ri mwuntusa vasiariva quqaa qovara sianarove, tiro. Sisasiva mwitaa tisaro maqe mwiqara mwira nraavuravano suqema viro varira. ²⁹ . Sisasiva mwi mwatara sero Gariri nruka tosantataa viva uro qaataqaa mwaari nero mwatasaa viro varisanta ³⁰ . nraase qora airivano mwiva sinaini vinta. Mwisa qiqu maquqama visave, vu qimpa visave, mwusaari naureraarera sisave, o suvaivu visave, mwo qara mwo qarama sero ita visave, esaa mwisa ntitaqinta uro Sisasira qiqutaraini saavaro mwiva mwisa suqema nitaira. ³¹ . Sisasiva mwisa suqema saisanta nraase qoravano takuavanta o suvaivu visa so kua tiavanta, mwusaari naureraarera sisa napisi variavanta, qiqu maquqama visa qaqi variavanta, vu qimpa visa qaqi takue variavanta, nraase qoravano mwisa takuenta vaimwatenta sauqu nrunkinkiraasinta Gotira utu tuaarerenta titanta, Qise, Gotiva suqema sero Isareri vaintiqaa naqisi variso, tiara. ³² . Sisasiva nrai nraaqiaranravu aarama sero titaro, Ne nraase qora ntununukaa sinta variasara nroraqama sena mpo tuko. Mwisa taaramwo ena ni vaqama senta variqi vitantama mwisa niari sara nramwa taiqa saavo. Ne mwisa niari mwaaqaini titaarinta so vivaro sara nraataa siranta tantu vaantuantakyaa vivorave, tiro. ³³ . Sisasiva mwitaa tisanta mwira nraaqiaranravuvano titanta, Mwaa qumina mwataqaave. Ntaintainta sara vara sentave mwisa nianarave? Nraase qora airini mwaini variavo,tinta. ³⁴ . Mwisa mwitaa tiavaro Sisasiva mwisa sapara siro titaro, Naauqe beretive numwa taavo? tisanta mwisa titanta, Bererti so 7 nravu vaisanta tavusa uapaa mwonravuvaqa numwa tauro, tinta. ³⁵ . Mwitaa tiavaro Sisasiva nraase qorara so mwataqaa mwatasaa variate timwa sero ³⁶ . bereti 7 nravuvaqa tavusavaqa vara sero Gotirara suqeve timwa sero mwi sarara kuveqa sero ntusama sero nrai nraaqiaranravu nisanta mwisa vara senta nraase qora niavanta ³⁷ . esaa mwisa mwi sarara so nraara. Mwisa so nraavanta mwira nraaqiaranravuvano mwisa nrenta viti vaati saara ntunu senta qurutaa tuara 7 nravu kuraaqa saara. ³⁸ . Mwi sarara 4,000 vaintivano nraavanta nraase nraaqiara airivanovaqa nraara. ³⁹ . Mwisa sara nramwa saavaro Sisasiva mwisa niari mwaaqaini titaisanta vuavaro mwiva botiqi mwaari nero Makataaniniara nrukaqaama tero vira.