1 . Sisasiva mwini visanta Parisi vaintinravuvanovaqa, Saintusi vaintinravuvanovaqa, Sisasiva varinaini uro nenta sai mwira qamaqetanta takuaare timwa senta Sisasirara titanta, Re tiri vuqaa nrora saiqa mwo tiri qumiqairaqenta te mwia takuentama te riara titanta quqaama Gotiva mwira titaisaro tukivave tiare, tinta. 2 . Mwisa mwitaa tiavaro Sisasiva mwisa timwa niro titaro, Qine takuaavaro eraisaro vuhero vehohaara utisanta qine titanta sura vuhaananrove tiarave. 3 . Qine toqaqi takuaavaro naavuqi sonkira risanta maqe aaqu nuanarove tiarave. Qine naavuqi takuetantama suari itaani osararave, aaqu nuani osararave, napisi takuetantama qine naraiqamave mwaa enara qovara siani osarara sia napisiavo? 4 . Maquqa si saiqara qai uti varia vaintisa Gotirara quminaqama senta sampi nrue variasama nrora saiqa tiri qumiqairaqenta ri osarara quqaave tiare ti variavo. Sia ne nena osara mwisa qumiqena nrora saiqa varaanirave. Gotiva ntaaru qini saivaqara Sonaara utinema sero nivaqa mwitaa siasorave. Mwirara qai rietantama qine ni osara takuentama qine niara Gotiva titai vaintivave tivarave, tiro. Sisasiva mwitaa timwa sero mwi vaintinravusa mwini sero virama. 5 . Sisasira nraaqiaranravuvano tauru senta sia bereti vararaitinta, qaqi nrukaqaa qareta vuara. 6 . Sisasiva titaro, (taupavanto vutaqi viro bereti vara nuai paaniqama saisaro ntotairave.)Parisi vaintivaqa Saintusi vaintivaqa mwisa mwisa taupa mwia voqiama senta variavo. Qinenravu mwisara rauritanta variate, tiro. 7 . Sisasiva mwitaa tisanta mwinravusa Sisasiva mwo kuaqaa numwa sero timwa ni kuara sia napisiraitinta, nrai timwa mwi nrai timwa mwi sinta titanta, Nara kuave siso? Bereti sia varenta nriara mwirarave mwitaa tiso? tinta. 8 . Mwitaa ti variavaro Sisasiva mwisa ti varia kuara napisi sero titaro, Qise, niara kempusaqama senta riaatara vaisanta qine niara sia kempusaqama senta rie variavo. Qine naraiqamave bereti sia vare nriara saara airi kua ti variavo? 9 . Qine sia napisi senta riaraitinta, qine tauruve saavo? Ne bereti sauquru vara sena vainti airi 5,000 vainti kuveqa sena nura qine mwisa nrenta saara viti vaati ntunu senta nauqe tua kuraaqa saarave? Siave qine mwirara riaavo? 10 . Ne 4,000 vainti bereti 7 nravukuveqa sena nura mwisa nretanta viti vaati saa sarara qine ntunu senta nauqe tua kuraaqa saarave? Qine siave mwiraravaqa riaavo? 11 . Ne votaini tu kuara qine naraiqamave sia napisi senta riaavo? Ne mwo kuaqaa numwa sena sia beretiara tuko. Ne qiniara titana, Parisi vaintinravuvaqa Saintusi vaintinravuvaqa mwisa taupa voqiama senta variarara tinta, qine mwisara rauritanta variate tuko tiro. 12 . Sisasiva mwitaa tisaro mwinravusa vu aatovano napisi visanta riaavaro Sisasiva sia beretivaqama senta suntaara taupara tiraitiro, mwiva mwo kuaqaa numwa sero timwa nitaro Parisi vaintinravuvaqa Saintusi vaintinravuvaqa timwa taa kuara mwirarama rauritanta variate tiso, tinta. 13 . Sisasiva mwatusa mwo Sisariaa Piripai vaini uro nero nrai nraaqiaranravu sapara siro titaro, Ni mwataini mwatatai nraaqiarara nraase qoravano nta vaintivave titantave variavo? tiro. 14 . Mwitaa tisanta mwinravusa titanta, Mwo siasa riara mwiva Soniva nramari ni varivave ti variavanta, mwo siasa riara mwiva tiri saivaqava Iraisaavave ti variavanta mwo siasa riara tiri saivaqava Seremaiaavave, qaraa mwo poropetivano qavaa qovarama viro variso ti variavo, tinta. 15 . Mwinravusa mwitaa tiavaro Sisasiva mwisa sapara siro titaro, So qinenravu mo? Qinenravu niara nta vaintivave titantave variavo? tiro. 16 . Sisasiva mwitaa tisaro Saimoni Pitaava Sisasira timwa mwiro titaro, Re Gotiva titai vaintiva Mesaiaavanove. Gotiva qaqi variqiro vi varira re mwira mwaaquvanoma variaro, tiro. 17 . Pitaava mwitaa tisaro Sisasiva Pitaarara titaro, Re Sonira mwaaqu Saimonivave. Re niara mwitaa tiararo Gotiva riara quase variso. Sia qumina vaintivano ni osarara ri vu aato mwisara napisianarave. Ni ntova naavuni variva, mwivama mwi kuara ri timwa mwisara re napisianarave. 18 . Ne riara mwitaa tireranave, Ri utu Pitaavave - Orivave. Ne ori nroraqa nena nraavu soqa tarerave. Mwi nraavuva Gotira nraase qoravanoma varivarave. Qutua inraisavavaqasia so mwi nraavura aatara saanarove. 19 . Ne ri ki mwianrira re naane qenti qantua nitairanta nraase qoravano Gotiva naqisianiraqi so vivarave. Re mwataini varitara mwo inraisa maqu inraisara qao timwa tairaro Gotivavaqa naavuni varitaro ri kua nkuaa kua mwia vataqiro vitaro qao timwa taanarove. Re mwataini varitara mwo inraisara sia qao timwa tairaro Gotivavaqa naavuni varitaro ri kua nkuaa kua mwia vataqiro vitaro sia mwi inraisarara qao tianarove, tiro. 20 . Sisasiva mwitaa tiwa sero nrai nraaqiaranravu kempusaqama sero timwa niro titaro, Sia mwosa timwa ninta niara mwiva Gotiva titai vaintiva, Mesaiaavano variso tiate, tiro. 21 . Mwi enaraqaantairo Sisasiva nrai qutu vuanirara nrai nraaqiaranravu vutu sero timwa niro titaro, Ne Serusaremini vuarinta mwini nrora vaintinravuvaqa, Gotira saiqa vara mwite varia vaintisa vuniaa vaintinravuvaqa, mwaara osara ti varia vaintinravusavaqa, mwisa ni maquqamaqinta vi varivaqe ne ita vuani inraisara varaqina vuarinta ni rusaivaqe ne qutu vina taaramwo ena varina qavaa qaqi ntivuanirave, tiro. 22 . Sisasiva mwitaa tisaro Pitaava mwira vita usini sero mwirara qao tiro, Nrorao, Suaa Gotiva mwisa sairanta ri mwitaama mwitevorave, tiro. 23 . Piaava mwitaa tisaro naara Sisasiva kuantaa viro Pitaara irora siro titaro, Saataanio, nriaraini vuane.Sia ni aara suvaivuane. Re sia Gotiva riainema sera rie variaro. Re qaqi vaintivano rie varianema serama rie variaro, tiro. 24 . Mwitaa timwa sero Sisasiva nrai nraaqiaranravu timwa niro titaro, Ni vataqiro nriari vaintiva, mwiva nrai mwatusa vasianira qaqira pisatero, nrai ru senta sirite satarira vara qu varero ni naantiara nriarive. 25 . Nrai mwaaqaini qaqi varianirara qai nroraqama sero riaariva, mwi vaintiva esaara qutu vuanarove. Vaintivano niara riaaqiro vitaro uro qutu vuariva, mwi vaintiva esaa ena qaqi variqiro vuanarove. 26 . Vaintivano mwataini variqiro vitaro esaa inraisa ntununukaama sero vatero mwiaqaantairo qutu viraro mwiva ntununukaama taani inraisava mwira sove saaisaqa sianaro? Sia sove. Mwiva sia soqaa utu sero qavaa qaqi variqiro vuanarove. 27 . Ne mwataini mwatatai nraaqiarava naantiara qavaa naavuntaina kempusavano uro nanatena tukirerave. Mwi enara ni ntora osara suqe siariva niqaantairo itero nuvaase variraqe ne naavuniaasa sampaqa tuki varitana esaa nraase qoravano saiqa varerara rietanama niari soqaa nianirave. 28 . Ne quqaa kua tianira riaate. Vainti mwonravuvano maqe mwaa mwaini ntivinta variasa, mwisa sia vaa qutu virave. Mwisa qaqi varivaqe ne mwataini mwatatai nraaqiarava nroraqama vina ne vuniaa vaintiqama vina variarinta mwisa qutu virave tuko, tiro.