¹ . Sisasiva mwitaa tisaro 6 ena nritaraisaro mwiva Pitaaravaqa, Semisiravaqa, Semisira mwira qata Soniravaqa, mwinravusa ntita varero qaataqaa niariaraa varireranta vuara. ² . Mwini uro variavaro Sisasira mwavanavano qaraa mwo mwavana varero mwira vurivano suarivano itainema sero nuvaase varisaro mwira vaaqavaqa mwoqama sero tasuqiro nuvaase varira. ³ . Mwira mwavanavano mwitaama sero kyuqu visaro varisanta mwira nraaqiara taaramwonravuvano varitanta takuavanta Iraisaasa Mosesisa mwisa saivaqasatana qovarama vinta varitanta Sisasiravaqama senta kua ti variara. ⁴ . Mwitana Sisasiravaqama senta kua ti variavaro Pitaava Sisasirara titaro, Nrorao, suqemama tenravu ri vaqama senta mwaini varuro. Re sove tirera, te qaraa nraavu taaramwonravu rinaini mwo, Mosesiraini mwo, Iraisaaraini mwo, soqa nitaare, tiro. ⁵ . Pitaava mwi kuara qaqi qai ti varisaro tonavu tasuqiro nuvaasaiva mwisa numwaqu saisaro kuavano tonavuqintairo titaro, Mwaa ni mwaaqu, ni mwuntusavano mwirara mwoqama sero ni vari nraaqiaravama variso. Ne mwirara quasetanama varuko. Qinenravu mwira kua riaate, tiro. ⁶ . Kuavano mwitaa tisanta mwira nraaqiara taaramwonravu mwoqama sero aatuqa taisanta vurianantai mwataqaa unto ninta variavaro ⁷ . Sisasiva uro nero nrai sauquqaantai mwisaqa tu varero titaro, Mwaahuao, ntivuate. Sia aatu sitanta variate, tisanta ⁸ . mwinravusa tuaarera vinta takuavaro Sisasiva nrariaraa varisaro vainti mwo mwitana sia variara. ⁹ . Qaata mwiaqaantainta tuki variavaro Sisasiva mwinravusa timwa niro titaro, Maqeqa takua inraisara sia mwosavaqa timwa niate. Ne mwataini mwatatai nraaqiarava naantiara ne qutu vuaniraqintaina qavaa qaqi ntivina varianira mwi enaraqaantainama timwa niqinta vuate, tiro. ¹⁰ . Sisasiva mwi tisanta mwinravusa mwira sapara sinta titanta, Mwaara osara ti varia vaintisa mwitaama timwa ninta titanta, Iraisaava tiri saivaqava naane qovarama viro nri naanarove, ti variarave. Mwisa naraiqamave mwitaa ti variavo? tinta. ¹¹ . Mwitaa tiavaro Sisasiva titaro, So mwisa quqaa ti variarave. Iraisaava naane nrima esaa inraisa napisi sero temanama tarero nriarivama variso. ¹² . So ne qiniara titana Iraisaava votaini nrima varirarama tuko. Mwiva nrima varisanta vainti mwo siasa sia mwira napisi senta takuaraitinta, Iraisaara niari sasa sinema senta mwira maquqama mwitaarave. Mwi vaintisa ni mwataini mwatatai nraaqiararavaqa maquqama mitevarave, tiro. ¹³ . Sisasiva mwitaa tisaro mwisa aato ntutoraa visanta riavaro Sisasiva Iraisaaraqaa numwa sero Soniva nramari ni vari vaintirara tira. ¹⁴ . Mwinravusa qaataqaantai tukinta takuavanta airi nraase qora ntununukaama vinta variavaro vainti mwovano uro Sisasira vuqaa tori sauru raviro titaro, Nrorao, ni mwaaquara mpo timwa mwitaane. ¹⁵ . Mwiva ueraiqama viro anoma sero maquqama viro variso. Airi ena mwiva tiaqi numwa viro nramariqi numwa vi variso. ¹⁶ . Ne mwira vitaqina nrima ri nraaqiaranravuvano varianaini saukanta mwisa mwira suqema mwitaare tinta takuaavaro sia soqa sirave, tiro. ¹⁷ . Vainti mwiva mwitaa tisaro Sisasiva titaro, Qine mwaa enara varia nraase qorasa sampi nrue variasave. Qine sia Gotirara quqaaqama senta rie variavo. Qise, qine ni so puposaira uti variavana ne nantaa nantaama enave qini sampaqa variqina vuanirave? Ne nantaa nantaama enave varitana qini saaisaqa sianirave? So nraaqiara mwira vitenta ne varura mwaaqaa nriate, tiro. ¹⁸ . Timwa sero Sisasiva vaana titamwa saisaro nraaqiara mwira vutaqintairo nritarero visaro mwiaqaantairo mwira mwavanavano suqema visaro so varra. ¹⁹ . So varisanta mwia naantiara mwira nraaqiaranravuvano Sisasiva varinaini uro nentamwira sapara sinta titanta, Te vaana mwira titauraro naraiqamave sia nritare viso? tinta. ²⁰ . Mwinravusa mwitaa tiavaro Sisasiva titaro, Qinenravu sia Gotirara kempusaqama senta rie variasara tinta, vaana titaavaro sia nritaraiso. Maasiteti uruve hovante uapaa uru qaini vasirave. Qinenravu Gotirara riaaqinta viva mwi urura voqiama sero vasirera, qinenravu soma mwaa qaatarara mwaaqaantaira ntivira vutuni vuane tivaro qaatavano vuanarove. Qine mwitaama senta Gotirara kempusaqama senta riaaqinta vivera, qine esaa saiqa soma varevarave. ²¹ . [Qine sia Gotirara aasara nenta sara siakua qine sia so mwi vaanasa titevarave, tiro.] Mwitaa tirama. ²² . Sisasira nraaqiaranravuvano Garirini ntununukaa sinta variavaro Sisasiva mwisa timwa niro titaro, Mwovano ni mwataini mwatatai nraaqiarara qovarama sairanta ni navaaqavuqinta ²³ . uro vainti sauquqi saivanta ni ru saivaqe qutu vina taaramwo ena vari sena qavaa qaqi ntivuanirave, tiro. Mwitaa tisanta mwira nraaqiaranravu mwuntusavano maquqa sisanta variara. ²⁴ . Sisasiva nrai nraaqiaranravu sampaqa Kapenaamini uro naavanta Gotira nraavuqaa naqisitanta taakisi vare variasa nri nenta Pitaara sapara sinta titanta, Ri nrora vaintivanovaqa mwi taakisira se varirave siso? tinta. ²⁵ . Tiavaro Pitaava eo tiro, Mwivavaqa se varirave, tiro. Mwitaa timwa sero Pitaava nravuqi visaro Sisasiva naane Pitaara nuvi raavira siro titaro, Saimonio, Mwataini variasa mwisa vuniaasa nta mwatanaasaqintainta taakisi vare variarave? Niari mwatanaasaqintaintave vare variavo? Mwo mwatanaasaqintaintave vare variavo? Tiqe riaase, tiro. ²⁶ . Sisasiva mwitaa tisaro Pitaava titaro, Mwisa mwo mwatanaasaqintainta taakisi vare variarave, tiro. Tisaro Sisasiva titaro, Te sia mwo mwatanaasa variraitinta, te Gotira nravunaavano varitantara tinta, te taakisi saarava siama vasirove. ²⁷ . So mwisa tiriara tivorave. Mwirara rietarama uro nrukaqi huku tuta sairaro vuniqama sero tavusa nriariva nrima ruvirara mpati sera mwia o ntapahu sera mwiqintaira moni vara sera niaravaqa renaravaqa taakisiqa siane, tiro. Mwitaa tirama.