¹ . Mwi enara Sisasira nraaqiaranravuvano Sisasiva varinaini uro nenta titanta, Gotiva naqisiraqi ntavave nroraqama viro vuniaa vaintivano variso? tinta. ² . Mwisa mwitaa tiavaro Sisasiva nraaqiara uapaarauru aarama sero mwisa vuqaa vatero ³ . titaro, Ne tianira riaate. Qine sia nraaqiara mwaa voqiama vinta varivera, qine siama so Gotiva naqisiani mwatusaraqi vivarave. ⁴ . Gotiva naqisianiraqi vuniaa vaintivano varirero sirera, mwiva nrai utu vara mwatainiqama sero nraaqiara mwaa voqiama seroma variarive. Mwi nraaqiarara voqia siarivama vuniaa vaintivano varianarove. ⁵ . Vainti mwovano nraaqiara mwaa voqia sianira quasama mwitetaro nivaqama quasama mitaanarove. ⁶ . Nraaqiara pata mwaa voqia siariva ni kua riaariva variraro vainti mwovano nri nero maquqa si aarara qumiqairera, mwi vaintiraqaa kua nroraqama sero vasianarove. Mwi vaintiva sia nraaqiara mwira maquqa si aarara qumiqaraitiro variraro mwira qunaqi ori nrora saanaru sero nrukaqi tuta saisaro naqutu viraqe sukiarave tiataarave. ⁷ . Mpo, mwataini vari nraase qorasa maquqa si saiqara utuate tiro, mwo inraisa mwo inraisavano mwisa qamaqaanarove. Maquqa si saiqara qovarama saani vaintirara mpo timwa mwitauko. (Naantiara mwi vaintiva takuaanarove.) ⁸ . Ri sauquvanove, ri qiquvanove, maquqa si saiqara uti varirera, mwia toqa sera qaqira pisaane. Mwiaqaantaira sauqu nkuainku vasiarivave, qiqu nkuainku vasiarivave, naavuni vira soma qaqi variqira vinarave. Maquqa si saiqara utitarama qiqu taaratanave, sauqu taaratanave, vasiariva variraro sia qimpaani tiaraqi ri tuta saasorave. ⁹ . Re vu siniqaantaira takue varitara maquqa si saiqara uti varirera, qavaavaqa mwitaamaqira vuasore tira, rena vu sini vauru sera qaqira pisaane. Re vu nkuainku qai vasirara sia maquqa si saiqara utiraitira, soma naavuni vinarave. Re vu taaratana vasiariva maquqa si saiqara utuqira virava naantiara qutu viraro ri tia nroraqi tuta saanarove. ¹⁰ . Qine takuetanta variate. Nraaqiara uapaasa mwaasa varivanta qine mwisaqintainta pata mworuara maqu kua tinta mwirara qumina nraaqiarauruve tivorave. Naavuniaasa mwisaqaa naqisi variasa sia mwisara qumina nraaqiarave tiraitinta, mwisara rietanta ni ntova naavuni varira tataaqaini variarave, tiro. ¹¹ . Sisasiva mwitaa timwa sero mwiva titaro, [Ne mwataini mwatatai nraaqiarava ne raumpirima vua nraase qorasa ntitarera tukuvave.] ¹² . Ne mwaa kuara tianira qine nantaamave riaavo? Vainti mwovano sipisipi 100 vataariva takuairaro sipisipi mwovano raumpirima virera,mwiva siave 99 sipisipi sini mwinravusa qaqi varisa qaataqaa pisatero raumpirima vuani sipisipira mpaa sirero vuanarove? ¹³ . Mwiva mwirara mpuaamaqiro viro uro mwira mpuaama sarera, mwiva titaro, Raumpirima saurama nena mpuaama sena vitauko, timwa sero mwoqama se mwirara quasetaro sipisipi 99 sia raumpiri siasara sia nroraqama quasaanarove. ¹⁴ . Mwira voqiama sero ni ntova naavuni variva mwaa nraaqiaranravusaqintairo mwovano raumpirima vuaso timwa setaro varirave, tiro. ¹⁵ . Ri qata vasaa mwovano ri mwo inraisa maquqama mwitairara re mwirara tirera sitarama uro mwira vita sera nentariaatana qai varitanta mwi kuara avuqavu siate. Mwiva ri kua riairera, mwira vita varera mwiaqaantaintatana qine suqema senta nkuaaqi soma variqinta vivarave. ¹⁶ . Mwiva sia ri kua riairera, uro vainti nkuainkuve taaratanave ntitaqira nriranta mwitanavaqa nrima varitanta ri kua rietantama so quqaa tiaro tivarave. ¹⁷ . Mwitaamaqinta vivaro mwi vaintiva qininravu kua sia qai riairera, mwiaqaantaira esaa Gotira nraase qora ntununukaama sera rena kua mwia esaa mwisavaqa timwa niane. Mwi vaintiva Gotira nraase qora ntununukaa sisara sia riairera, esaara mwiaqaantainta qine mwi vaintira titetanta titanta, Re mwo mwatanaa voqiama serama variaro. Re taakisi vare varia vaintisa voqiama serama variaro, tiate. ¹⁸ . Ne tianira riaate. Qine mwataini varitanta mwo inraisa mwo inraisa maquqa siani inraisarara qao timwa taivaro Gotivavaqa naavuni varitaro mwirara qao timwa taanarove. Qine mwataini varitanta mwo inraisa mwo inraisarave sia qao timwa taivaro Gotivavaqa naavuni varitaro sia mwi inraisarara qao timwa taanarove, tiro. ¹⁹ . Sisasiva mwitaa timwa sero titaro, Ne qavaa tianira riaate. Qiniqintai vainti taaratanavano nkuaa naumaqara vatenta Gotirara sapara sivaro ni ntova naavuni variva mwitana tinema sero nianarove. ²⁰ . Taaratanave, taaramwotanavanove, ni saiqarave tinta ntununukaa sivera, so ne mwinravusa vutaqaa varianirave, tiro. ²¹ . Sisasiva mwitaa tisaro Pitaava uro Sisasira sapara siro titaro, Nrorao, ni qata vasaa mwovano ni maquqama mitairera, ne nauqe nainive mwirara sia riqaa kua vatena qaqira pisarerave tianirave? Sauquru sinintai taara tainive mwitaa sianirave? ²² . Pitaava mwitaa tisaro Sisasiva titaro, Sia ne riara sauquru sinintai taaranaini mwira kua qaqira pisataane tuko. Ne riara mwira kua 500 naini qaqira pisataanema tuko, tiro. ²³ . Gotiva nraase qoraqaa naqisiariva mwaa kuara voqiama seroma vaiso. Nrora vainti mwovano nrai saiqa vaintinravu nitai monira nena vararerave tirave. ²⁴ . Timwa sero soqara sero vare varisanta mwira saiqa vainti mwo vitaqinta mwiva sinaini saavaro mwi vaintiva nrora moni 1,000,000 kinaa vara sero nramwa saiva vaisaro ²⁵ . mwiva mwi monira nrai mwianriva sia soqama sero vasisaro mwira nrora vaintivano titaro, Mwi vaintiravaqa mwira nraata nraaqiaravaqa, mwiva esaa inraisa vataaniravaqa, mwosa ninta moni varaqinta nrima ni mivaqena ne mwiva vara nramwa sai monira siniqama nena varaase, tiro. ²⁶ . Mwiva mwitaa tisaro mwira saiqa vaintivano quntoniro tori sauru raviro mpo tiro titaro, Re variraqe ne qasoma sena mwi monira mpuaamaqi vina uro esaa mpuaama sena rina mwiaase, tiro. ²⁷ . Mwitaa tisaro mwira nrora vaintivano mwirara mpo timwa mwitero titaro, So ne riaara mpo timwa mwitetanama mwi monira qaqira pisauko.Sia nina miane. Qaqira pisatera vuane, tiro. ²⁸ . Mwitaa tisaro mwi vaintiva veva nero viva uro takuaisaro saiqa vainti mwovano nrai mwira senava mwira moni 10 kinaa vara nramwa saiva nrisaro mwiva mwira uro qunaqaa tutero naquti variro mwirara titaro, Ni moni nramwa saanara qamwanrama sera nina miaane, tiro. ²⁹ . Mwitaa tisaro mwira senava mwiva quntoniro tori sauru raviro mpo tiro titaro, Re variraqe ne mwi monira qaso mpuaama sena ri mwiaase, tisaro ³⁰ . mwi vaintiva sia mwira kua riaraitiro, nrai sena vainti mwira karavusiqi sero titaro, Ni moni nramwa saanara esaa nina miraqenama ri suvanu saanirave, tiro. ³¹ . Mwitaa timwa sero nrai sena vainti mwira karavusiqi saisanta saiqa vainti mwonravuvano mwira takuaavaro maquqa sisanta re maquqama siaro timwa senta uro nrora vainti timwa mwiavaro ³² . mwira nrora vaintivano nrai saiqa vainti aarama sero timwa mwiro titaro, Re maquqa si saiqara uti variara vaintivama variaro. Re niara mpo timwa mitaane tiarana ne re nramwa saana monira nrora moni esaa qaqira pisatena sia nina miaane turave. ³³ . Ne riara mpo tunema sera revaqa rena senarara mpo timwa mwitaataara vaisara sia mwitaa siaro, tiro. ³⁴ . Mwitaa timwa sero mwira nrora vainti mwira mwoqama sero raraqitaisaro nraisaiqa vainti karavusiqi sero titaro, Mwiva karavusiqi varitaro nrai nramwa sai monira esaa nina miarive, tiro. ³⁵ . Sisasiva mwitaa timwa sero nrai nraaqiaranravu timwa niro titaro, Qine nenta mwuntusaqintainta nenta qata vasaasa qini maquqama nite kuara sia qaqira pisataraitinta qaqi qai riaaqinta vivera, qini ntova naavuni variva nenta maquqa si saiqara utua kuaravaqa qaqi qai riaaqiro vuanarove, tiro. Sisasiva tirama.