¹ . Sisasiva mwi kuara timwa ni taiqa sero Garirintairo Suntia mwata Sontaani nramari qarasini visanta ² . nraase qora airivano mwira vataqinta vuavaro mwiva mwini varitaro mwisa ita visa suqema nitairo. ³ . Sisasivamwini varisanta Parisi vaintinravuvano mwiva sinaini uro nenta Sisasirara sampi kua tiarive tinta mwo kua mwira sapara sinta titanta, Sove vaintivano mwo kua mwo kua vasiraro mwi kuara saara nrai nraata qaqira saanarove? Mwiva mwitaa sirera, mwiva tiri mwaara kua neqave saanarove? Tiqe riaare, tinta. ⁴ . Mwitaa tiavaro Sisasiva titaro, Qinenravu siave Mosesiva qara numwa tai kuara saara numwa senta riaavo? Mwi kuava mwataamama vasiro. Naavuvaqa mwatavaqa ututaiva, Gotiva vuniqama sero vaintivaqa nraasevaqa utu sero titaro, ⁵ . Vaintivaqa nraasevaqa ututaurara tiro, vaintivano nrai nrosa qosara sero nrai nraataniri nkuaaqi variqi vinta mwitana nkuaa mwavana varivarave tirave. ⁶ . Mwisa sia mwo mwavana mwo mwavana variraitinta, nkuaa mwavana qai variarave. So Gotiva mwitana nkuaaqa taaqau tairara tiro, mwovano mwitana naira saanarove, tiro. ⁷ . Sisasiva mwitaa tisanta mwinravusa titanta, Quqaa Gotiva mwitaa tirave. So naraiqama Mosesiva mwo kua tirave? Mosesiva timwa tai kuava mwataama tiso, Vaintivano nrai nraata qaqira pisataariva tanaavaqa mwiro soma qaqira saanarove tirave, Mosesiva naraiqama mwitaama sero kua timwa tairave? tinta. ⁸ . Mwisa mwitaa tiavaro Sisasiva mwisa niari timwa niro titaro, Mosesiva varitaro takuaisaro qini saivaqasa mwuntusavano kempusaqa sisanta sia Gotirara riaarave. Mwitaa si variavarora tiro, Mosesiva qisaasama sero so mwitaa siate, timwa sero mwi kuara timwa tairave. Ntaaru vuniqama sero mwata ututai enara sia mwitaama vasirave. ⁹ . Ne qiniara mwitaama tuko, Nraasevano sia vainti mwo vaqama sero nruaraitiro variraro mwira vaativano mwo kua saara mwira qaqira pisatero mwo nraase varairera, mwi vaintiva qaraasa nraaseniri nruetaroma mwiva nraata vaati nukema seroma mwiravaqa muaraqama seroma nruaanarove tuko, tiro. ¹⁰ . Sisasiva mwitaa timwa sero varisanta mwira nraaqiaranravuvano Sisasirara titanta, Qise, vaintivano mwitaama sero nraata varaariva vasirera, vaintivano sia nraata vararaitiro qaqi variarive, tinta. ¹¹ . Mwira nraaqiaranravuvano mwitaa tiavaro Sisasiva titaro, Sia esaa vaintivano qine tiane sinta sia nraata vararaitinta qaqi varivarave. Gotiva kempusaqama mwitaari vaintiva mwiva qai qaqi varianarove. ¹² . Mwo qara mwo qara si osara qaara mwosia vaintisa sia nraata varaarave. Mwo sia vaintisa mwata saavaro mwisa mwavana sia suqema vaisantara tinta, sia nraata varaarave. Mwosia vaintisa mwavana maquqama saavantara tinta, mwisa sia nraata vararave. Mwosia vaintisa Gotiva nraase qoraqaa naqisirara rietanta te Gotira saiqa vararerave timwa senta sia nraata varaarave. Mwi kuara napisi sero rie variariva, mwi vaintiva mwi kuara riaaqiro vuanarove, tiro. Sisasiva tirama. ¹³ . Sisasiva varisanta nraase qoravano niari nraaqiara ntita varenta Sisasiva mwisaqaa nrai sauqu vatetaro Gotirara aasara tiraro mwisa suqema nitaarive timwa senta Sisasiva varinaini ntitaqinta uro saare tinta utuavanta Sisasira nraaqiaranravuvano mwisa irora si variara. ¹⁴ . Mwitaa tiavaro Sisasiva qao tiro, Qaqi saivanta mwisa ne sunaini nriate. Sia mwisa aara suvaivuate. Gotiva naqisiari mwatusava mwi nraaqiarasa voqia siaasa mwisa mwatusama vasianarove, tiro. ¹⁵ . Sisasiva mwitaa timwa sero nrai sauqu nraaqiara mwisaqaa vatero mwisa suqema nitero vira. ¹⁶ . Mwo ena vainti mwovano Sisasiva varinaini uro nero titaro, Mwaara ti variara vaintio, ne suqe saiqa nantaa sianira Gotira vara mwitaaniraqaantainave ne esaa ena qaqi variqina vuanirave? tiro. ¹⁷ . Mwitaa tisaro Sisasiva titaro, Re naraiqamave suqe saiqara ni sapara sira siaro? Gotiva nkuainkuvano suqema varivave. Ri esaa ena qaqi variqira vuataa sirara, re Gotiva timwa tai kuara esaa mwi kuara riaaqira vuane, tiro. ¹⁸ . Sisasiva mwitaa tisaro mwi vaintiva sapara siro titaro, So ne nara kuave Gotiva timwa tairaqintaina riaaqina vuanirave? tisaro Sisasiva timwa mwiro titaro, Mwaa kuara timwa tairave: Sia vainti ru saane. Sia mwora nraatavaqa nruaane. Sia muara varaane. Sia mwora kumaari tiane. ¹⁹ . Rena nrosa qosa utu tuaarera nitaane. Re renara ri mwuntusa vasinema sera rena sena vaintiaravaqa ri mwuntusa vasirara variane, tirave.Mwi kuara timwa taira riaaqira vuane, tiro. ²⁰ . Sisasiva mwitaa tisaro mwi vaintiva titaro, Ne esaa mwi kuara tianara ria napisi savama varuko. Nara inraisavanove qaqi vaisana ne sia soqa suko? tiro. ²¹ . Mwitaa tisaro Sisasiva titaro, Re mwoqavaqa Re mwoqavaqa suqe vaintivano varirera, uro esaa rena vatena inraisara nira moni vara sera sia mwo inraisa vate nraase qorasa niraro naavuni ri soqaa vasiarive. Mwiaqaantaira re ni vataqira nriane, tiro. ²² . Sisasiva mwitaa tisaro vainti mwiva mwi kuara riero airi inraisa vataivara tiro, mwira mwuntusavano maquqa sisaro sia Sisasira kua riaraitiro, qaqira pisatero virama. ²³ . Visaro Sisasiva nrai nraaqiaranravuara titaro, Ne tianira, riaate. Airi inraisa vatesa Gotiva naqisiani mwatusaraqi mwusaari tusetantama vivarave. ²⁴ . Ne qavaa tiarinta riaate. (Kameri quara nroravano nantaama serove vuqa uvintaqi ntuqiaraanarove? Sia so mwitaa sianarove.) So kamerivano vuqa uvintaqi so ntuqiaraaninravauma, airi inraisa vataari vaintiva Gotiva naqisiani mwatusaraqi so vuanarove, tiro. ²⁵ . Sisasiva mwitaa tisanta mwira nraaqiaranravuvano mwi kuarara airi naumaqara tinta titanta, Qise, airi inraisa vatesa Gotira mwatusaqi sia so vivera, nrai ntavave so mwini vuanarove? tinta. ²⁶ . Mwitaa tiavaro Sisasiva mwisa takuero titaro, Mwataini variasa mwisa niari qai varitanta siama so vivarave. Gotiva esaa saiqa so qai vare varivave, tiro. ²⁷ . Mwitaa tiavaro Pitaava titaro, Takuaane, tenravu ri vataqinta virera sinta, esaa inraisa mwini senta qaqima nruro. Te mwia qiata nara inraisave varaanarave, tiro. ²⁸ . Pitaava mwitaa tisaro Sisasiva mwinravusara titaro, Ne tianira riaate. Sia ne qine saiqa vare varirara tauru saanirave. Esaa inraisa qaraasa inraisaqama sero vasiani enaraqaa ne mwataini mwatatai nraaqiarava, ne mwi enara tasuqi variani inraisara kempusa inraisavaqama sena naavuni nrora tainaqaa mwatasaa vina variarinta qine ni nraaqiara 12 nravuvano ni vataqinta nrisa, qinevaqa tainta 12 nravuqaa naqisitanta mwisa kua avuqavu sivarave. ²⁹ . Vainti mwovano nrai mwaaqave, nrai qata vasaave, nrai nrura nrasaave, nrai nrosa qosave, nrai nraaqiarave, nrai mwatave, qaqira pisatero ni saiqarave tiro vuariva, mwi vaintiva mwia qiata nrai soqaa varetaro sia nkuaa naini varaanarove. Mwiva mwoqavaqa varetaro 100 naini varairaro mwia vuraataqa Gotiva mwirara re esaa ena esaa ena qaqi qai variqira vuane tianarove. ³⁰ . Maqe nraase qora airivano vuni variasa, qaso mwisa tukitarenta naantiaraini varivarave. Maqe mwaa naantiaraini variasa, mwisa qaso nritarenta vunima varivarave, tiro.