¹ . Gotiva naqisiariva vasirero mwaa kuaraqaa numwa sena tiani kuara voqiama sero vaiso. Mwata airi vasi vaintiva vaa toqa enaqi ntiviro nrai uaini vara tutairaqi saiqa varaate tiro, saiqa vaintiara mpuaa sirero virama. ² . Viva uro vainti mwonravu mpuaama sero titaro, Qinenravu maqe ni saiqa vara mitaivaqe ne mwi enarara rietana qini nkuaiqa nkuaiqa moni nkuaa kinaa nkuaa kinaa niaase, tisanta eo tiavaro nrai vutaqi ntitaqiro uro sero. ³ . Uro sero varisaro suarivano nriro virintataqa sisaro mwiva maaketiqi viva uro takuaisanta vainti mwonravuvano qumina variavaro ⁴ . mwiva mwisara titaro, Qinevaqa uro ni vutaqi ni saiqa vara mitaivaqe ne ninta saiqara rietana soqaa niaase, tiro. ⁵ . Tisanta mwisavaqa mwini vuavaro mwiva varisaro suarivano virini qiataqa nriro isara isara mwuntusaqa sisarovaqa, suarivano tukiro vitintoqa sisarovaqa, mwiva vainti vitarero vota sine siro. ⁶ . Vuta qova saiqa vainti qaqi qai vitaqiro visaro saiqa taiqeva qaumaqa sisaro qavaa maaketiqi uro takuaisanta vainti mwonravuvano qaqi qai ntivinta variavaro mwisa sapara siro titaro, Qine naraiqamave maqe qumina varinta siavo? tisanta ⁷ . mwisa mwira timwa mwinta titanta, Sia vainti mwovano tiriara saiqa varaate tisantama te qumina varuro, tiavaro mwisara titaro, So qinevaqa uro ni uaini vutaqi saiqa varaate, tiro. ⁸ . Mwitaa timwa sero varisaro ena sirero sisaro vuta qova nrai saiqaqaa naqisi vaintirara titaro, Saiqa vainti esaa aarama sera mwisa niari soqaa niaane. Re naantiara nria vaintisa naane moni niqi vira uro vota vuni nria vaintisaqaa taiqa saane, tiro. ⁹ . Mwitaa tisaro mwiva saiqa taiqarera sianaini nriasa naane moni nkuaa kinaa nkuaa kinaa niro. ¹⁰ . Niqiro viro vota toqaqi nria vaintisa moni nirero sisanta mwisa titanta, Tiri moni mwoqavaqa timwianarove, tiavaro mwiva mwisavaqa nkuaa kinaa nkuaa kinaa qai niro. ¹¹ . Nkuaa meraqa se nisanta mwisa mwi monira varenta vuta qorara untu nrauru tinta titanta, ¹² . Qao, saiqa taiqaarava qaumaqa sisanta nria vaintisa saiqa pataiqa qai vara sentama nkuaa kinaa nkuaa kinaa varavo. Te vota toqaqi nrurasa suari nroraqi saiqa varaqi vurarama re naantiara nria vaintisa niaranema serama tirivaqa timwiaro. Naraiqamave mwitaa siaro? tinta. ¹³ . Mwisa mwitaa tiavaro vuta qova vainti mwora titaro, Ni vaintio, sia ne ri maquqama mwitauko. So quqaa ne vota toqaqi riara ni saiqa varairaqe ne ri nkuaa kinaa mwiase tukara re eo tianarave? ¹⁴ . Rena monivaqa varera rena mwaaqaini vuane. Ne rivaqa naantiara vita tausavaqa nkuaa meraqama sena niataa sisana nurave. ¹⁵ . Ne nena moniara tina, siave ne nena sasa sianiraqa qini ntusama sena nianirave? Ne qisaasama sena nena moni nukara naraiqamave re qori nuaro? tirave, tiro. ¹⁶ . Sisasiva mwi kuaraqaa numwa sero timwa niro taiqa sarera siro titaro, Mwia voqiama senta mwoqaini varisa qaso vuni utu vivarave. Vuni utuvisa qaso mwoqaini tuki vivarave, tiro. ¹⁷ . Sisasiva Serusareminiara aaraini vitaro nrai nraaqiara 12 mwinravusa qai ntita sero tineqa timwa niro titaro, ¹⁸ . Takuaate, tenravu Serusareminiarama vi varuro. Ne mwataini mwatatai nraaqiarava mwini uro naariro ni qovarama sero uro Gotira saiqa vara mwite varia vaintisa vuniaa vaintinravuvaqa, mwaara osara ti varia vaintisavaqa, nianarove. Niranta mwisa niara mwira ru saate timwa senta ¹⁹ . vitaqinta mwo mwatanaasa sauquqi uro saivanta mwisa niara raima mitenta saana vara senta mwiaqaantainta ni mwoqasanta ntuteqaateqama mitenta mwiaqaantainta uro satariqaa ni rutaivaqena ne qutu vinama taaramwo ena vari sena qavaa qaqi ntivuanirave, tiro. Sisasiva tirama. ²⁰ . Mwi enara Sepetira mwaaqutana nrova mwitana ntita varero Sisasiva sinaini viva uro mwira vuqaa varitaro kankataama viro mwataqaa qunto niro varitaro nrai saaisaqama mwitaanirara Sisasira sapara sira. ²¹ . Sisasira sapara sisaro mwiva mwira nrai sapara siro titaro, Nara inraisarave tiaro? tiro. Mwitaa tisaro nraase mwiva titaro, Sove maqe mwaa re eo timwa tairanta naantiara re nroraiqama vira vuniaa vaintivano varinaraqa ni maaqutana nroraqama sairanta mwovano ri sauqu saantutaini variraro mwovano ri sauqu saanaaqaini variarive, tiro. ²² . Mwi nraaseva mwitaa tisaro Sisasiva mwinravusara titaro, Qinenravu mwitaama se ni sapara sitantama sia mwi kuara osara napisiraitintama, mwitaa tiavo. Ne ita vuanira nramari voqia sira nraanira qinetanavaqave nrevarave? tisanta mwitana titanta, Soma nraanarave, tinta. ²³ . Mwitana mwitaa tiavaro Sisasiva titaro, Quqaama qinetanavaqa mwi nramarira mwia nrevarave. Ni sauqu saantutainivaqa, saanaaqainivaqa, mwata saavi varitanasa sia ni saiqa vasirave. Ni ntova vainti taaratana temanama sero vatai vaintitanama mwini mwata saavi varivarave, tiro. ²⁴ . Sisasiva mwitaa tisanta mwira nraaqiara sini 10 mwinravusa mwi kuara rienta mwi qate vasetana irora siara. ²⁵ . Mwinravusa mwi vaintitana irora si variavaro Sisasiva esaa mwinro mwaanro mwinravusa aarama sero sero so eqaate tiro, Mwo mwatanaasa naqisiqi vua osarara qine riaarave. Mwisa vuniaa vaintivano nritare virintoqama varitanta mwi saiqara mwaa saiqara tirini varaate ti variarave, Mwisa nrora vaintinravuvano titanta, Ne nroravano varuko. Ni kua qai riaaqi vuate, ti variarave. ²⁶ . Qine sia mwisa siane siate. Qiniqintairo mwovano nroraqa sirero sitaro mwiva qini saiqa vara nitaarive. ²⁷ . Qiniqintairo mwovano nritarero vuni varirero sitaro mwiva karavusi vainti voqiama viro qini saiqa vara nitaarive. ²⁸ . Ne mwataini mwatatai nraaqiaravama varuko. Qinevaqa sia nraase qorara ni saiqa vara mitaate tina, tuvave. Ne nraase qora mwisara saiqa varaqi vina, airi nraase qora saaisaqama nitarera mwisara rietanama qutu virerave timwa sena tukuvave, tiro. Sisasiva tirama. ²⁹ . Sisasiva nrai nraaqiaranravuvaqa Seriko senta vi variavanta nraase qora airivano Sisasira vataqinta vi variavanta ³⁰ . vainti taaratanavano vu qimpa vi tana aara tosaini varitanta riaavaro Sisasiva nritarero vitaro tisanta mwitana aasara nenta titanta, Nrorao, Devitira mwaaquo, qaqi tiritanara mpo timwa timwi taane, tinta. ³¹ . Mwitana mwitaa tiavanta nraase qoravano mwitana irora sinta tineqa variate tiavantavaqa mwitana sia mwisa kua riaraitinta, nroraqama senta aasara nenta titanta, Nrorao, Devitira mwaaquo, qaqi tiritanara mpo timwi timwi taane, tinta. ³² . Mwitana mwitaa tiavaro Sisasiva nrima ntiviro variro titaro, Nevano qinitana nantaa siarive tintave qinetana niara aasara ne variavo? tiro. ³³ . Mwitaa tisanta mwitana timwa mwinta titanta, Nrorao, tiritana vu nampairi timwi taanerama ri aare varuro, tinta. ³⁴ . Mwitaa tiavaro Sisasiva mwitanara mpo timwa nitero mwitana vuqaa nrai sauqu viti vataisaro mwitana vuvano qamwarama nampairi visanta so takuenta mwiaqaantainta Sisasira vataqinta vuara.