¹ . Sisasiva nrai nraaqiaranravu sampaqa vuavaro Serusaremi vaininto vasisanta mwisa Betapaasi Oripi qaata saaraataqi vasi mwatusaraqi uro nenta Sisasiva nrai nraaqiara mwotana titero, ² . titaro Qinetana vutu mwatusaraqi uro nentama donki naane takuevarave. Donkivano nrai nraati vaqama sero saanaru taivaro varianira uro mwitana suvanu senta vitaqinta nrima ni miate. ³ . Vainti mwovano qinitana sapara siranta mwitaama tiate. Tiri nroravano donki mwirara tisantama nruro tiate. Qinetana mwitaa tivaro mwiva qinitanara so qamwarama varaqinta uro mwiatema tianarove, tiro. ⁴ . Ntaaru vetanto enaqaa poropeti vaintivano ti kuava mwivauma vasiarive tiro, Sisasiva mwitaa tira. Ntaaru poropeti vaintivano Gotira kua qovarama sero mwataama tiro: ⁵ . Qine Serusaremiqinraasa mwitaa timwa niate. Qini vuniaa vaintivano qine sianaini nri variso. Mwiva qisaasa sivara tiro, qisaasama sero donki mwoqaqaa nri variso. Mwi donkiva qaraasa donkivanoma variso, tira. ⁶ . Mwiva ti kuava mwivauma vasiarive tiro, Sisasiva nrai nraaqiara taaratana titaisanta mwitana Sisasiva tinema senta vuasa uro ⁷ . donkivaqa mwia nraativaqa vitaqinta nrima senta mwira nraaqiaranravuvano niari vaaqa dokiqa kuti mwitaavaro Sisasiva mwiaqaa mwaari nero mwatasaa viro varira. ⁸ . Varisanta nraase qora niari vaaqavaqa aaravau kuti mwitaavanta nraase qora mwo siasa satari qitu toqaqinta nrima aaravau kuti mwitaara. ⁹ . Kuti mwitaavanta Sisasira vuni vuasavaqa mwoqaini vi variasavaqa aasara nenta titanta, Devitira mwaaqu utu tuaareraate. Nroravano nrai utuqa nri vari vaintira suqema mwitaiso. Esaa naavuniaasa mwira utu tuaareraate, tinta. ¹⁰ . Mwitaa timwaqinta vi variavaro Sisasiva Serusaremiqi visanta esaa mwi mwatanaasa sanenta vitare nritare si varinta titanta, Qise, Nta vaintivave nriso? tiavanta ¹¹ . nraase qora mwo siasa titanta, Mwaa vaintiva Sisasivave. Mwiva poropeti vaintivano Nasareti Garirintairo nrivave, tinta. ¹² . Sisasiva uro Gotira nraavu nroraqi vera nero takuaisanta soqaa uti varia vaintisa mwiqi soqaa uti variavaro mwiva mwisa vara veva mwaaqaini pisatero, kuri nitaro moni vare vari vaintira tainavaqa vara qarau saira. ¹³ . Mwitaama sero mwisara titaro, Gotira bukuqi qara numwa taa kuava titaro, Nraase qoravano ni nraavuara Gotirara aasara ne varia nraavurave tivarave, tirave. Qine mwaaqi variavaro muara vaintivano qumpauvua mwatusara voqiama seroma mwaa nraavuva vaiso, tiro. ¹⁴ . Sisasiva mwitaa timwa sero mwiqi varisanta vu qimpa vi vaintisavaqa, qiqu sauqu naureraisavaqa, mwiva sinaini nriavaro Sisasiva mwisa suqema nitaisanta so variara. ¹⁵ . Sisasiva mwisa suqema nitero nrora saiqa vare varisanta nraaqiaravano Gotira nraavuqi varinta titanta, Devitira mwaaqu mwira utu tuaareraate, tinta. Mwitaa ti variavanta Gotira nraavuqaa naqisi varia vaintisavaqa mwaara osara ti varia vaintisavaqa, mwi inraisara takuenta Sisasira irorama mwitenta Sisasirara qao tinta, ¹⁶ . Re siave nraaqiaravano kua ti variara riaaro? tinta. Mwitaa tiavaro Sisasiva titaro, Eo, ne nraaqiara kua riauko. Qinevaqa mo, qine sia Gotira bukuqi mwaa kuara saara nitanta takuaarave? Mwitaama tiro: Re nraaqiara nraamwa nraasavaqa saaisaqa siaranta mwisa ri utu suqema senta tuaarere variavo, tirave, tiro. ¹⁷ . Sisasiva mwitaa timwa sero mwiva mwisa mwiqi sero veva nero mwatusa mwiavaqa sero Betanini ena mwiqi varirero viro. ¹⁸ . Mwiva qararaa toqaqi Sisasiva uro nanero Serusareminiara visaro sara nraataa sira. ¹⁹ . Nraataa sisaro takuaisaro varira voqia siva fikivano aara tosaini vasisaro mwiva uro mwia tamwa siqu sero nraase tiro takuaisaro qituvano qai vasisaro mwiva mwi satarirara titaro, Re sia qavaavaqa tamwa rienarave, tisaro mwiaqaantairo mwi satariva tamusa viro. ²⁰ . Mwi satariva tamusa visanta Sisasira nraaqiaranravu mwia takuenta qise tinta, Nantaama serove satari mwituava qamwarama tamusa viso? tinta. ²¹ . Mwisa mwitaa tiavaro Sisasiva titaro, Ne tianira riaate. Qinenravuvaqa sia taara naumaqara tiraitinta, niara nkuaa naumaqara tutenta soma ne mwaa satarirara tunema sentativarave. Qine sia mwi saiqara qai varevarave. Qine nrora saiqa mwo saiqa mwo saiqa so varevarave. Qine mwaa qaatararavaqa titanta, Nramariqi qunto nuane, tivaro soma mwitaa sianarove. ²² . Qise, qine mwo inraisara Gotirara sapara sitantama qine so varevarave, tiro. ²³ . Sisasiva mwitaa timwa sero uro nanero Gotira nraavuqi uro varitaro nraase qora kua timwa ni varisanta Gotira nraavuqi Gotira saiqa vara mwite variasa mwisa nrora vaintinravuvaqa, Suntaa nrora vaintinravuvaqa, mwinravusa mwiva sinaini uro nenta mwira irora sinta titanta, Re nta vaintiva varitarave mwaa saiqara vare variaro? Ntava ri nroraqama saisarave re mwaa saiqara vare variaro? tinta. ²⁴ . Mwisa mwitaa tiavaro Sisasiva niari timwa niro titaro, Sai ne naane qini sapara siarinta qine ne tiani kuara so timwa mivera, ne nena nroraqama vina varitana mwaa saiqara varaurara qini timwa niase. ²⁵ . Ntava Sonira nroraqama saisaro Soniva nraase qora nramari nirave? Gotivave, qumina vaintivanove, mwira nroraqama saisaro mwi saiqara varairave? Qine timwa mivaqena riaase, tiro. Sisasiva mwitaa tisanta mwisa nrai sapara sinta nrai sapara sinta titanta, Te nara kuave tianarave? Te titanta Gotiva mwira nroraqama saisarove tiarera, mwiva tiriara qine naraiqamave Sonira kuara sia quqaave tiavotianarove. ²⁶ . Te titanta qumina vaintivano mwira nroraqama sairave tiarera, te nraase qora ntununukaama vinta variasara aatu sianarave. Esaa nraase qoravano Soniva poropeti vaintivano varirave ti variarave, tinta. ²⁷ . Mwisa mwitaa timwa senta Sisasirara titanta, Nrai ntavave Sonira nroraqama sairave? Sia te napisuro, tinta. Mwisa mwitaa tiavaro Sisasiva titaro, qine mwitaa tiavana ne nina nroraqama saisana mwaa saiqara vare varurara sia nintavaqa timwa nianirave, tiro. ²⁸ . Sisasiva mwitaa timwa sero titaro, Ne tirera siani kuara mwaara qine nantaamave riaavo? Vainti mwovano qorainti nraaqiara taaratana vatairave. Mwira qova nrai mwaaqu vuniaarara titaro, Ni maaquo, Maqe uro uaini vutaqi saiqa varaane, tisaro ²⁹ . mwira mwaaqu vuniaava titaro, Qao, sia vuataa sisana sia virerave, tiro. Mwitaa timwa sero mwiva varitaro mwo naumaqara tusero nrai qora uaini vutaqi saiqa vararero virave. ³⁰ . Mwiva visaro mwira qova nrai nraaqiara naantiarara mwiraravaqa uro nkuaa kua mwia qai tisaro mwiva qumina eo timwa serovaqa sia viraitiro qaqira pisatero sia varirave, tiro. ³¹ . Sisasiva mwi kuara timwa sero mwisa sapara siro titaro, Mwira nraaqiaratanaqintairo nta nraaqiaravave nrai qora kua riairave? tisanta mwisa titanta, Mwira vasaava vuniaava nrai qora kua riairave, tinta. Mwisa mwitaa tiavaro Sisasiva timwa niro titaro, So mwi kuara rietantama ne tirera siani kuara napisi se riaate. Taakisi vare variasavaqa, sampi nrue varia nraasesavaqa, variavanta qine mwisara maquqa sia nraase qorasave tiasa, mwisa qini aatara senta Gotiva naqisiraqi mwisa naane vi variarave. ³² . Ntaaru Soniva nri nero avuqavuma se vasi aarara qini qumiqaase tisanta qine mwira kuara sia quqaa kuave tiarave. Taakisi vare variasavaqa, sampi nrue varia nraasesavaqa, Sonira kuara quqaave tiarave. Qine varitanta takuavanta mwisa Sonira kuara quqaave tiavanta qine sia mwisa siane siarave. Qine mwo naumaqara tu senta maquqa si aarara qaqira pisatenta Sonira kuara quqaa kuave tiataara vaisanta qine sia mwitaa siraitinta variarave, tiro. ³³ . Sisasiva mwitaa timwa sero titaro, Qine rie varivaqena ne mwo kuaqaa numwa sena qini timwa niase. Mwata airi vasi vaintiva uaini vara tutero, mwia vara ututu tutukya utu tero, mwata quku sero uaini tamwa tatianira ututero, qaaraa nraavu muasaanaqi varitanta muara vaintiara takueravaqa ututairave. Mwiaqaantairo mwiva nriaara mwo mwataini virera siro, vainti mwonravu timwa niro titaro, Qine ni uaini vutaqaa naqisi mite varivaqe ne vuase, timwa sero mwiva nriaara mwo mwataini virave. ³⁴ . Mwini uro varisaro uaini siqi enava nri naisaro mwiva nrai saiqa vainti mwonravu titero titaro, Uro ni vutaqaa naqisi varisa tivanta uaini ninainivaqa siqu nivanta vare nriate, tisanta mwisa mwini vuarave. ³⁵ . Mwini vuavanta mwira vutaqaa naqisi variasa mwira saiqa vaintinravu navaaqavu senta mwo saavuqaantai nuqu senta vatenta, mwo rusenta, mwo oriqaantai nuqutu senta vataarave. ³⁶ . Mwitaa siavaro vuta qova qavaa vainti saata airi titaisanta mwisa vuni mwonravu sianema senta mwisavaqa nkuaa meraaqama nitaarave. ³⁷ . Mwitaa sisaro vuta qova naantiara esaara nrai mwaaqu nkuaiqa titero titaro, Mwisa mwira takuenta niara mwira mwaaquve titantama mwira suqema mwitevarave, tiro. ³⁸ . Mwitaa timwa sero mwira titaisaro visanta mwira vutaqaa naqisi variasa mwira takuenta nrai timwa mwi nrai timwa mwi sinta titanta, Mwaa vaintiva nrai qova qutu viraronrai qora mwatavaqa esaa inraisavaqa varaarivama variso. Nrivaqe mwira ru saararo mwiva vararera siari inraisava tirini qai vasiarive, tinta. ³⁹ . Mwisa mwitaa timwa senta mwira navaaqavu se vutaqintainta mwaaqaini mwaati senta mwira ru saarave, tiro. ⁴⁰ . Sisasiva mwitaa timwa sero mwisa sapara siro titaro, Mwitaa sirara tiro, vuta qova nrai mwaaqu rusera saara nantaave sianarove? tiro. ⁴¹ . Mwitaa tisanta mwisa Sisasirara titanta, Vuta qova maquqa sia vaintisa mwisa esaa ru taiqa sero mwiaqaantairo mwiva ni vutaqaa naqisitanta ninavaqa miate tiro, vainti qaraa mwonravu ntita vataanarove, tinta. ⁴² . Mwisa mwitaa tiavaro Sisasiva titaro, Qine sia Gotira bukuqi mwaa kuara saara numwa senta riaarave? Mwataama tiro: Ori nraavu soqetanta ori mwora sia suqe orive timwa senta qaqira pisataa oriva puhaqama viso. Gotiva mwi orira nroraqama sairara tinta, te mwia takuenta suqe saiqave turo, tirave. ⁴³ . Ne mwi kuara rietanama qiniara mwataama tuko, Qine mwira mwaaqu maquqama mwitera saara Gotiva qiniara sia ni nraase qorave tianarove. Mwiva qini qaqira pisatero mwo mwatanaasara mwisa ni nraase qora varivaqena ne mwisaqaa naqisi variarinta mwisa suqe saiqa vara mitaate, tianarove. ⁴⁴ . [Mwi oriraqaa qunto nuariva nukekaa siro pataiqa pataiqa utu vuanarove. Mwi oriva vaintiqaa qunto nirera, mwi vaintira nuqutu sero kukomwaqama sero saanarove, tiro.] ⁴⁵ . Sisasiva mwitaa tisanta Gotira nraavuqaa naqisi variasavaqa, Parisi vaintinravuvaqa, varitanta napisi saavaro Sisasiva uaini vutaqaa naqisi variasaqaa numwa sero mwisara tisanta ⁴⁶ . mwira navaaqavuqinta uro ko tiare timwa senta takuavanta nraase qora mwini ntununukaama vuasa Sisasirara poropeti vaintivanive tiavanta mwisa aatu aatu sitanta sia mwira navaaqavu saara.