¹ . Sisasva qavaa nraase qora kua timwa nirero mwo kua mwo kuaqaa numwa sero timwa nira. ² . Mwiva mwo kua titaro, Gotiva nraase qoraqaa naqisiani kuara vasirero vuniaa vainti mwovano nrai mwaaquvano nraase varaanirara rietaro sara temanama se vataira voqiama sero vaiso. ³ . Vuniaa vaintivano mwisa mwisa aarama tero titaro, Naantiara qine nivaqama senta sara nraate, tiro.Timwa sero variro sara nrera temanama tero nrai saiqa vainti titero titaro, Qine uro mwisa timwa nivanta mwisa nrima sara nraate, tisanta uro timwa niavanta mwisa sia vuataa sisanta sia vuarave. ⁴ . Sia vuavaro vuniaa vaintivano nrai saiqa vainti mwonravu qavaa titero titaro, Ne aarama tau nraase qorasara mwataama tiate. Ne sara temanama tauko. Nena kauvaqa mwo quaara nraati suqeravaqa ruse toqa sunta vatauko. Ni maaquvano nraata varaanira nrima takuenta mwi sarara nraate, tiate, tiro. ⁵ . Mwiva mwitaa tisanta mwiva aarama tai nraase qorasa sia mwira kua riaraitinta, mwisa niari saiqa qai varaqinta vuarave. Mwovano nrai vutaqi visaro mwovano nrai soqaa saiqa vararero visanta ⁶ . mwonravuvano vuniaa vainti mwira saiqa vaintinravu navaaqavu senta nuqutu se vatenta ru saarave. ⁷ . Mwitaa siavaro vuniaa vainti mwira nrai mwoqama sero rara itaisaro nrai naqua vaintisa titaisanta mwisa uro nrai saiqa vaintinravu rusaa vaintisa niarivaqa rusenta mwisa mwatusave nraavuve tia quara saarave. ⁸ . Mwiaqaantairo vuniaa vainti mwiva nrai saiqa vainti mwonravu aarama sero titaro, Ni maaquvano nraata varaani sarara ne temanama tauko. Ne nraase qora aarama tena takuaukaro mwisa saiqavano sia soqa sisaro mwisa ni sara nrevavaqa sia soqa siso. ⁹ . QIne mwisa qaqira pisatenta uro sinintai sinintai aara ntununukaa siraqa nta nraase qorasave takuaivanta varisa mwisa ntita senta mwisara titanta, Vuniaa vaintivano sara nraanira qinevaqa uro nraate tiate, tirave. ¹⁰ . Mwitaa tisanta mwira saiqa vaintinravuvano aarantainta nta nraase qorasave takuasa suqesave, maquqa siasave, ntununukaama senta ntitaqinta uro saavanta mwisa sara nraa nraavuraqi kuraa saarave. ¹¹ . (Mwi enara nraata varaani sarara nrareranta nria vaintisa qentiana nrima naavaro qentiana naqisiva mwisa vuruqaqaantairo mwunruqama taisanta uro mwatasaa vinta variara. Vuniaa vainti mwira vuruqa rumpa varai vaintiva qai so mwiqi mwatasaa vuarive tira.) Mwisa nraavuqi suvai vuavaro vuniaa vaintivano takuaisaro qentianantairo sia vuruqa varai vaintiva nraavuqi varisaro ¹² . mwiva mwi vaintirara titaro, Qise, ni vaintio, re sia qentianantaira ni vuruqa rumparaitira, re ntaraqaama serave mwaaqi vera nera siaro? tisaro mwi vaintiva sia so kua tirave. ¹³ . Sia kua tisaro vuniaa vaintivano nrai saiqa vaintinravu timwa niro titaro, Qine mwaa vaintira qiqu sauqu rumpa senta unto mwataini rupisi siraqi pisataate. Mwiva mwini variro natetaro nrai aarai nkutitaro variarive, tirave, tiro. ¹⁴ . Sisasiva mwi kuara timwa sero mwiva titaro, Gotiva airi nraase qora aaramatairaqintairo mwoqatana qai ntitaanarove, tiro. ¹⁵ . Sisasiva mwitaa tisanta Parisi vaintinravuvano mwiqintai veva nenta uro ntununukaasi varinta titanta, Nara kuave sapara siararo Sisasiva sampi kua tianarove? Sai mwaa kuara sapara siare, timwa senta ¹⁶ . mwisa niari vataqi nrua vaintisa mwonravu titenta Herotira nravunaasa mwonravuvaqa titaavanta mwisa Sisasiva varinaini uro nenta titanta, Mwaara ti variara vaintio, re mwaara osara timwa timwianranta te takuaurara re quqaa kua ti variaravave. Re sia vainti aatu aatu siraitira, vainti nroravaqa, qumina vaintiaravaqa, nkuaa kua qai ti variaravave. ¹⁷ . Te mwaa kuara tianarara re nantaamave riaaro? Te Gotira kua rietantama sove te Romeni mwisa vuniaa vainti Sisaara taakisi mwianarave? ( Mwi mwatanaasa sia Gotira kua riaarave.) ¹⁸ . Sisasirara sampi kua tiarive tia kuara Sisasiva vaa napisi naumaqero mwiva titaro, Qine kumaariqama setanta suqe saiqa vare variasave. Qine naraiqamave nevano sampi kua tiarive tinta mwitaa ti variavo? ¹⁹ . Taakisi moni nkuaiqa ni qumiqaivaqe takuaase, tiro. Mwitaa tisanta mwi monira nkuainku mwiavaro ²⁰ . Sisasiva mwisa sapara siro titaro, Moni mwiqaa viri taaratanave vaiso? Utu taaratanave vaiso? tiro. ²¹ . Mwitaa tisanta mwisa titanta, Sisaarave, tiavaro Sisasiva mwisara titaro, Mwirara rietantama qine Sisaava sianira nrai mwiate. Gotiva sianira Gotira mwiate, tiro. ²² . Sisasiva mwitaa tisanta mwisa mwira kua rienta titanta, Qise, mwiva tiri kua aatara sero suqe kua tiso, timwa senta sauqu nrunkinkinraa sinta Sisasira mwini senta vuarama. ²³ . Mwi enara Saintiusinravuvano Sisasiva varinaini uro naara. Mwi vaintisa niari mwaara kua rientama titanta, Vaintivano qutu vuariva esaara qutu viro siama qavaavaqa ntivuanarove, ti varia vaintisa uro nenta Sisasira sapara sinta titanta, ²⁴ . Mwaara ti variarao, tiri saivaqava Mosesiva mwaara kua titaro mwitaa tirave. Vaintivano sia nraaqiara mwataraitiro, qutu viraro mwira qatavanove mwira vasaavave mwira nraata varero nraaqiara mwata sukuarama mwitaarive, tirave. ²⁵ . Te kua tianara riaane. Ntaaru mwaini qate vase 7 nravu variarave. Vasaava nraase mwo vara sero sia nraaqiaravaqa mwataraitiro, qutu visaro mwira qata mwira nanaava mwira nraata varero ²⁶ . mwivavaqa qaqi variqiro vitaro uro qutu virave. Mwiva qutu visaro mwo mwira nanaava mwi nraasera vara sero sia nraaqiaravaqa mwataraitiro, qaqi variqi vitaro qutu visaro so mwitaamaqi vinta esaa mwi qate vase nravusa mwi nraasera varatenta sia nraaqiara mwataraitinta, qaqi qutu vuarave. ²⁷ . Qutu vuavaro nraase mwivavaqa variro qutu virave. ²⁸ . Naantiara nraase qora qutu viraqintainta qavaa qaqi ntivi enaraqaa mwi nraaseva ntara nraatave varianarove? Mwiva qaqi vari enara qora 7 nravu nraata varirave, tinta. ²⁹ . Saintiusi vaintinravuvano mwitaa tiavaro Sisasiva mwisa niari timwa niro titaro, Qine Gotira kua qara numwa taara napisiavo? Qine Gotira kempusara sia riaarave. Qine sia napisiasara tinta, qine sampi kua tiavo. ³⁰ . Naantiara nraase qora qutu visa qutu viraqintainta qavaa ntivi qaqi variqi vi enara siama nraase qora nrai vare nrai vare sivarave. Mwisa naavuniaasa voqiama senta qaqi varivarave, tiro. ³¹ . Sisasiva mwitaa timwa sero mwiva titaro, Nraase qora qavaa qaqi ntivi vari osarara ne qini sapara sirerave. Qine sia Gotira bukuqi mwaa kuara qara numwa taara saara numwa senta riaarave? Gotiva mwitaa tirave: ³² . Ne Gotiva ne ri saivaqasa mwariqavano varuko. Ne ri saivaqasa Ebarahaamuraqaave, Aisaakiraqaave, Saikopuraqaave, naqisi varuvave, tirave. So riaate. Qutu viro taiqavi inraisaraqaa sia Gotiva naqisi varirave. Qutu viro qavaa ntiviro qaqi variqiro vi inraisaraqaa Gotiva naqisi varivama variso, tiro. ³³ . Sisasiva mwitaa tisanta nraase qoravano mwini ntununukaa siasa mwira kua rienta titanta, Qise, Sisasiva osara kuama timwa timwiso, tinta. ³⁴ . Parisi vaintinravuvano riaavaro Sisasiva Saintiusi vaintinravuvano tia kuara aatara saisanta mwisa ntununukaa siaraqintairo ³⁵ . vainti mwovano mwaara osara timwa ni vari vaintiva Sisasirara sampi kua tiarive tiro, mwo kua Sisasira sapara siro titaro, ³⁶ . Mwaara ti variarao, Gotiva kua timwa tairaqintairo nara kuavanove nroraqama sero vuni vasi kuava vaiso? tiro. ³⁷ . Mwitaa tisaro Sisasiva timwa mwiro titaro, Riqaa naqisira Gotirara esaa ena mwuntusaqintairave, esaa ena mwaraquraqintairave, esaa ena vu aatoqintairave, mwirara qai mwuntusa vasirara variane, tirave. ³⁸ . So mwi kuava osara vuni vasi kuava vasirave. ³⁹ . Mwi kuara mwoqaini osara kua mwo vaiso. Mwi kuava vuni vasi kuara voqiama sero seroma vaiso. Mwitaama tiro: Rinara mwuntusa vasinema sero rina nravunaararavaqa ri mwuntusa vasiarive, tirave. ⁴⁰ . Mwi kuavavaqa osara kua puha rataara voqiama sero vaisaro esaa mwo kua Mosesiva timwa tai kuavave, poropeti vaintivano timwa tai kuavave, mwi kua tanaqaa siriviro vasirave, tiro. Sisasiva tirama. ⁴¹ . Parisi vaintinravu mwini ntununukaama vinta variavaro Sisasiva mwisa sapara siro titaro, ⁴² . Qine Gotiva titai vaintira Mesaiaara nantaamave riaavo? Mwiva ntara osaraqintairo mwatataarivave varianarove? tiro. Sisasiva mwitaa tisanta mwisa titanta, Mwiva tiri saivaqara Devitira osaraqintairo qovara sianarove. Mwiva Devitira nraintima varianarove, tinta. ⁴³ . Mwisa mwitaa tiavaro Sisasiva titaro, Nantaama serove Mesaiaavano Devitira nrainti varianarove? Ntaaru vetanto enaqaa Devitiva varisaro Gotira mwaraquravano mwira saaisaqa sisaro Devitiva Mesaiaara titaro, mwiva ni nroravanove tirave. Devitiva mwataa tirave: ⁴⁴ . Gotiva ni nrora vaintiara titaro, Re nritarera ni sauqu saantutaini mwatasaa vira variraqqena ne ri nravutaasa ru taiqa sena aatara saarira re mwisaqaa qiqu namwa tera variane, tirave. Devitiva mwitaa tirave, tiro. ⁴⁵ . Sisasiva mwitaa timwa sero qavaa sapara siro titaro, Devitiva Mesaiaavano qovara sianirara titaro, Mwiva ni nrora vaintive, tirave. Devitiva mwitaa tirara tiro, nantaama serove Mesaiaavano Devitira nrainti varianarove? tiro. ⁴⁶ . Sisasiva mwitaa tisanta mwisa nrai timwa mwiare tinta kuara mpaa siavaro sia vaisanta mwisa mwi enaraqaantainta aatu sitanta qavaavaqa mwo kua mwira sapara siarorave timwa senta variara.