¹ . Sisasiva mwitaa timwa sero nraase qora mwini ntununukaa sinta variasaravaqa nrai nraaqiaranravuaravaqa titaro, ² . Mwaara osara ti varia vaintisavaqa, Parisi vaintinravuaravaqa, Mosesiva timwa tai kuara suqe kua qini timwa niqi vi variara ³ . qine mwia riaaqinta vuate. Qine mwisa kua mwia qai rietantama sia mwisa nruanema senta nruate. Mwisa mwosqara qine mwitaa mwataa siate timwa setanta niari sia mwitaa siraitinta, mwisa maquqama setanta nrue variarave. ⁴ . Qise, mwisa nroraqama sero muaara nai kuara rumpa senta varaqinta uro nraase qoraqaa qu nitenta mwisara qu varaate timwa senta mwisa sia niari sauqu tutu senta nraase qora saaisaqa si variarave. ⁵ . Nraase qoravano mwisa mwaraqa tiate tinta, Parisivano Gotira saiqa vara mwite variarave. Mwisa Mosesiva ti kuara qara numwa senta qapuqama senta niari tiriqa qutenta, saantaaqivaqa rumpatenta, puruqa muasaa suqera rumpa varenta nraase qoravano mwisa takuaate tinta, mwatusaqaa nrue variarave. ⁶ . Mwisa omwata nraaraqaa uro varitanta vainti nroravano mwatasaa vitanta varianaini variare timwa setanta variarave. Mwisa mwaara nraavuqi uro varitanta suqe tainaqaa qai mwatasaa vinta variarave. ⁷ . Nraase qoravano mwisa suqema se kua mwanetanta mwaara kua ti vari vaintivave tiate titanta maaketiqi mwisa sasama setanta nrue variarave. ⁸ . Qinevaqa nkuaa meraqa sivorave. Vainti mwovano qini kua mwanero qiniara titaro, Re vainti nrora mwaara kua ti variaravave, tiasorave. Mwovano mwitaa tirera, qine mwirara, Sia qavaavaqa mwitaa tiane, tiate. Te qata vasaama varuro, tiate. Tiri mwaara kua timwa timwi variva nkuainkuvano qaima variso tiate. ⁹ . qini ntova nkuainkuvano naavuni variraratinta, sia mwataini variani vaintira mwora tiri tiqovave tiate. ¹⁰ . qine vainti mwora tiri qiata vaintive tivorave. Qine titanta, Gotiva titaiva Mesaiaavano, mwiva qaima tiri qiata vaintivano variso, tiate. ¹¹ . Qiniqintairo mwovano nrora vainti varirera, mwi vaintiva qinini saiqa vara nitaariva variarive. ¹² . Nrai utu tuaareraariva variraro Gotiva mwira utu vara mwatainiqama saanarove. Nrai utu vara mwatainiqama saariva variraro Gotiva mwira utu tuaarera saanarove, tiro. ¹³ . Mwaara osara ti variasavaqa, Parisi vaintivaqa, qine kumaariqama setanta suqe saiqa vare variasave. Qine naantiara maquqama virara rietanama ne qiniara mpo timwa nitauko. Nraase qoravano Gotiva naqisiraqi virera uti variavanta qine qenti mwisa vuqaa vasira vara quntovi vumwe variavo. Mwitaa sitanta qine nenta mwisa sia Gotiva naqisiraqi viraitinta, mwosa mwiqi vireranta uti variavanta qine mwisa aara vumwe variavo. ¹⁴ . [Mwaara osara ti varia vaintisavaqa, Parisi vaintivaqa, qine kumaariqama setanta suqe saiqa vare variasave. Qine vinta raumpirima virara ne mpo tuko. Qine tentoqa nraase mwisa nraavu muara vare varinta titanta, Mwovano te maquqa si saiqara utuanara takuero tiriara maquqa sia vaintisave tivorave, tinta qine nraase qora vuqaa varitanta Gotirara muasaama senta aasara ne variarave. Mpo, mwia saara qiniqa kua vasiariva nroraqama sero vasianarove.] ¹⁵ . Mwaara osara ti varia vaintisavaqa, Parisi vaintivaqa, qine kumaariqama setanta suqe saiqa vare variasave. Ne qiniara mpo tuko. Qine airi vainti vara maquqama sareranta uti variarave. Vainti mwovano qini kua rietaro qini vataqiro vuarive tinta, qine mwira mpaa sireranta nruka nrora qara varenta nriaraini nruetanta mwira mpaama senta mwira nenta saiqa qumiqaavaro mwiaqaantairo mwi vaintiva qinivaqa aatara sero mwoqavaqa maquqa si vaintiva varirave. Qine utuaraqaara mwiraqaa kua nroravanoma vasianarove. ¹⁶ . Qine mwosa aara qumiqareranta uti variavaro ninta vu qimpa visa variavo. Qine naantiara vinta raumpirima virara ne mpo tuko. Qine nraase qora mwaara osara timwa nitanta mwitaama tinta, Vaintivano Gotira nraavu utu netaro nrai sauqu iqiqaa vatero titaro, Ne mwitaa mwitaa sirerave, tirera, mwiva tiari kuava sia mwira tutaanarove. Vaintivano Gotira nraavuqi vasira gori moni utu netaro nrai sauqu iqiqaa vatero titaro, Ne mwitaa mwitaa sirerave, tirera, mwiva sia mwi kuara neqa saarive, tiarave. ¹⁷ . Qine mwitaa titantama sampi kuama tiavo. Qini vu qimpa visanta variavo. Gotira nraavuvano vuni vasi inraisavama vaiso. Gori monivano Gotira nraavuqi vaisarora tiro, Gotira nraavuvano mwi monira vara sotataqama sairave. ¹⁸ . Qine mwaara kua sampiqama senta nraase qora timwa ninta titanta, Quaara rusenta Gotira mwi varia tainara vaintivano mwi tainara utu netaro nrai sauqu iqiqaa vatero titaro, Ne mwitaa mwitaa sirerave, tirera, mwiva tiari kuava mwira tutaanarove. Mwiva mwi kuara sia neqa saarive, tiarave. ¹⁹ . Qine mwitaa titantama sampi kua ti variavo. Qini vu qimpa visanta variavo. Tainta mwiaqaa rusenta vataa quarava sia tainta mwia aatara sero vuni vasi inraisava vasirave. Gotira nraavuqi vasi taintava vuni vasivara tiro, quaara mwia vara sotataqama sairave. ²⁰ . Vaintivano sauqu iqiqaa vatetaro mwiva tainta mwia utu netaro mwiva tainta mwiavaqa, tainta mwiaqaa vasi inraisaravaqama, utu naiso. ²¹ . Vaintivano nrai sauqu iqiqaa vatero Gotira nraavu utu netaro mwiva sia nraavu utu qaivauma, nerove. ²² . Vaintivano nrai sauqu iqiqaa vatero naavu utu netaro mwiva sia naavu utu qaivauma nero, mwiva Gotiva mwatasaa vari taintara utuvaqa netaro mwi taintaraqaa mwatasaa viro varira Gotira utuvaqama nerove. ²³ . Mwaara osara ti varia vaintisavaqa, Parisi vaintivaqa, qine naantiara raumpirima virara rietanama ne qiniara mpo timwa nitauko, Qine kumaariqama setanta suqe saiqa vare variasave. Qine uapaa sara haantave, honti mperu mwia qai Mosesira kua riaaqinta vitanta numaara se Gotirainive, tiara nrai mwi variarave. Qine mwi kuara qai riaaqinta vireranta uti varitanta mwaara kua mwovano mwi kuara aatara sero vasira, mwi kuara qine sia rie variarave. Napisi se ko ti osararave, mpo timwa nite osararave, Gotirara kempusaqama senta rie osararave, qine mwi kuara mwi kuarara sia nroraqama senta rie variarave. Qine pata kua rietantama mwi kuaravaqa, nrora kuavaqa, riaaqinta vuataarave. ²⁴ . Qine mwosa aara qumiqarera uti variavaro ninta vu qimpa visanta variavo. Qine nramari nraare tinta takuavaro qumpauvano mwiqi vaisanta qine mwia qaqinaini vara pisatenta aantau nroravano mwiqi vasira mwiavaqama senta nampiqa se variarave. ²⁵ . Mwaara osara ti varia vaintisavaqa, Parisi vaintivaqa, qine raumpirima virara ne qiniara mpo timwa nitauko. Qine kumaariqama setanta suqe saiqa vare variasave. Qine kaapuvaqa tanaavaqa mwaaqaini qai siqe variasave. Qine nenta pasi qai siqama saavaro qini vutaqi vainti rusevave, muara varevave, nentara qai rietanta vare varivave, mwi inraisava qai vaiso. ²⁶ . Qine Parisi vainti mwaasave, qini vu qimpa visanta variasave. Qine kaapuvaqa tanaavaqa vutaqi naane siqama saivaro mwaaqainivaqa suqema vasiarive. ²⁷ . Mwaara osara ti varia vaintisavaqa, Parisi vaintivaqa, qine naantiara vinta raumpiri sirara ne qiniara mpo tuko. Qine kumaariqama setanta suqe saiqa vare variasave. Vainti qunama tenta simeni namwa senta mwiaqaa penti koriqasira qutaara qine mwia voqiama senta variarave. Simeniqaa penti koriqasira qutaara takuetaro mwovano suqema sero vaiso tisarovaqa mwataiqi qutu vira mwusaarivaqa tapitai inraisava qaima vaiso. ²⁸ . Mwia voqiama senta nraase qoravano qini mwaaqaini takuetanta vainti suqe siasave tiavarovaqa qini vutaqi kumaari kua ti variavavaqa, maquqa si saiqara uti variavavaqa, kuraaqirave. ²⁹ . Mwaara osara ti varia vaintisavaqa, Parisi vaintivaqa, qine naantiara vinta raumpiri sirara ne mpo tuko. Qine kumaariqama setanta suqe saiqa vare variasave. Qini saivaqasa ntaaru varitanta poropeti vainti Gotira kua qovarama se varia vaintisa rusenta qunamwa taarave. Mwisa qunamwa taaraqaa qine suqema senta qaraa nraavu soqa nite variarave. Qini saivaqasa varitanta avuqavuma senta nrua vaintisa rusenta qunamwa taaraqaa qine nupi senta suqe si variarave. ³⁰ . Qine mwisa nraintivano titanta, Te ntaaru mwi vasa varunatiri, siama te tenta saivaqasa aananenta poropeti vainti mwisa rusaunatiri, tiarave. ³¹ . Qine titanta, Tiri saivaqasa ntaaru poropeti vainti rusaasa te mwaa mwisa nraintima varuro, tiarave. Qine mwitaa tiavaro nenta tia kuavama ninta tutaiso. ³² . So nenta saivaqasa maquqa si saiqara soqara taara varaqinta uro taiqa saate. ³³ . Qine quaisavano variavo. Qine quaisa nraaqiaravano varivaro. Gotiva qini ko timwa sero tia nroraqi tuta saanarove. Sia so qine mwiqintainta ntuqema senta vivarave. ³⁴ . Ne tianira riaate. Ne poropeti vaintive, suqe naumaqara vataa vaintisave, suqe kua timwa nia vaintisave, titaarinta qine mwisa mwonravu ru senta mwonravu rusenta satariqaa siritenta mwonravu nenta mwaara nraavuqi ntitaqinta nuqutu senta vatenta mwonravu mwo mwatusa mwo mwatusaqintainta nuqutu vataqinta nruevarave. ³⁵ . Mwiraravaqa rietaro ntaaru mwo vaintinravu ru saa kuavavaqa qiniqaama vasianarove. Vuniqama sero Eberira qumina rusairaqaantai soqara se mwisa ruqi nrinta nrima esaara Barakiaara mwaaqu Sekaraiaara rusaarave. Mwira rusareranta Gotira nraavuvano sini vasisaro, quaara ruse tia quara mwite varia taintava sini vasisaro, Sekaraiaava Gotira saiqa varetaro tavaarana varisanta mwira rusaarave. Esaa mwisa rusaa kuavavaqa qiniqaama vasianarove. ³⁶ . Ne tianira riaate. Mwosa mwosa Gotira nraaqiara rusaa kuava, esaa mwi kuava maqe mwaa enara variasaqaama vasianarove, tiro. ³⁷ . Sisasiva mwitaa sero titaro, Mpo, Serusaremiqinraa nraase qora soo, Serusaremiqinraa nraase qora soo, qine Gotira poropeti vaintinravu ru saasave. Gotiva titai vaintisa variavanta qine ori mpati senta mwisa nuqutu saasave. Kokoraaravano nrai nraatiqaa nraaokya iri sero qutainema sena ne vaaqara naini qiniara mpo timwa sena qiniqa naqisiase tukanta qine ni qoririma senta ni qaqira saavo. ³⁸ . Mwira saara Gotiva qini qaqira sairaro qini mwatusaqi sia vaintivaqa varivaro qumina mwata qaima vasianarove. ³⁹ . Ne tianira riaate. Qine mwaa enaraqaantainta sia ni takuaraitinta varivaqena ne qavaa qunto variarinta qine mwi enara napisi senta ni takuenta niara titanta, Gotiva titai vaintiva tukiso. Mwira suqema mwitaate tivarave, tiro.