1 . Sisasiva mwitaa timwa sero Gotira nraavu mwini sero virera utisanta mwira nraaqiaranravuvano titanta, Gotira nraavu suqera mwaa takuaane. tiavaro 2 . Sisasiva eo tiro, qine maqe nraavu mwaa mwiavaqa suqe inraisa mwiqi vasiravaqa takuavaro vasirave. Ne tianira riaate. Naantiara ori taaqautaava mwoqavanovaqa sia nrai vuraataqaa nrai vuraatataa vasianarove. Nraavu mwaa ntukuraakurama saivaro qunto niro orivano munkova utu vuanarove, tiro. 3 . Sisasiva mwitaa timwa sero uro Oripi qaataqaa mwatasaa viro varisanta mwira nraaqiaranravuvano niari qai mwiva varinaini uro nenta mwira sapara sinta titanta, Vota tiarava ntaireve qovara sianarove? Nara inraisavano qovara siraqenta te mwiaqaa takuentave te so riara mwiva qavaa tukiraro mwaa mwatara taiqaani enava vainintoma vaiso tianarave? tinta. 4 . Mwisa mwitaa tiavaro Sisasiva titaro, Mwovano qini kumaari kua timwa nianirara rauritanta variate. 5 . Naantiara vainti airivanoqovarama vinta ni utu netanta Gotiva ni titaisana nruko tivanta airi nraase qoravano mwisa kumaari kuara quqaa kuave tivarave. 6 . Qine varivanta naqitanta, qua vora ntaivata sia aatu siate. Naqi kuava aaraintairo nriranta sia aatu siate. Naqi variva nri nairanta qine esaara ena nri naiso tivorave. 7 . Mwo mwatanaava mwo mwatanaaravaqa naquanarove. Qiata vaintivani qiata vaintivaqa naquanarove. Mwo mwataqi mwo mwataqi nroraqama se aara ne enava vasianarove. Mwoqi mwoqi mwata quauru tuanarove. 8 . Esaa mwi inraisava qovarama viranta sia esaara ena nri naiso tiate. Nraaqiara mwatarero qaso atura ntuariva vaisaro vuni itavi inraisara pataiqa soqarainema sero , muaara vasiani enava qaqi soqaraiso, tiate. 9 . Mwi enara qini navaaqavuqinta uro saivanta qini maquqama nitenta qini ru sevarave. Mwi enara qine ni nraase qora varivantara tinta, mwia saara esaa mwo mwatanaa mwo mwatanaasa sia qiniara mwuntusa vasiranta varivarave. 10 . Mwi enara niara quqaa mwivave tisa airivano qaqira senta nravutaavano nrivanta niari senasa qovarama senta vitira mwivave mwaa mwivave timwa senta mwisa nravutaaqa sivarave. 11 . Mwi enara airi vaintivano qovarama vinta varitanta ne Gotira kua qovarama se varuvave timwa setanta airi nraase qora kumaari aara qumiqevarave. 12 . Mwi enara maquqa siari saiqava nroraqama sero vasiranta airi nraase qoravano mwosara mwuntusa vasianira qaqira sevarave. 13 . Mwi enara sia puposairaro kempusaqama sero variqiro vitaro uro suqe aara taiqa saani vaintira, mwirama Gotiva ntitairaro naavuni uro varianarove. 14 . Gotiva nraase qoraqaa naqisiani kuara timwa niqi vivanta esaa mwata mwaaqaa variasa mwi kuara riaivaro so mwiaqaantairo esaara ena nri naanarove, tiro. 15 . Sisasiva mwitaa timwa sero mwiva titaro, Naantiara qine takuaivaro maquqa siari inraisava vainti vesi utu saari inraisava qovarama vuanarove. Vetanto enaqaa poropeti vainti Danieriva mwi inraisara maqu inraisara tirave. Qine takuaivaro mwi inraisava Gotira nraavu turuarani sia qumina vaintivano vera nenta vari nraavuraqi uro ntiviro varianarove. (Mwaa kuara saara nirava napisi sera riaane.) 16 . Mwiva mwini uro variranta Suntiaani varisa ntivinta saanenta verara qaataqaa vuate. 17 . Mwi enava nri nairaro nraavu aatareqani variariva saanero virera siro siama nraavuqintairo vera nero mwo inraisavaqa varaarive, qaqima saanero vuarive. 18 . Mwovano vutaqi saiqa vare variariva siama saanero nrai vaaqatua vararaitiro, qaqima saanero vuarive. 19 . Mwi enara nraaqiara tuaqama vuari nraasevave, nraamwa mwi variari nraasevave, mpo, anoma sero mwisara sia suqe ena vasianarove. 20 . Sia suqema sero suari itaani enaraqaave, mwaaraqaave, mwi enava nri nairanta qine saanenta vuare tinta mwusaari tusevarave. Mwirara rienta qine Gotirara aasara tivaro suari suqema sero itaaniraqa mwi enava nriranta qine so aatu vuate. 21 . Mpo, naantiara mwi enava nri nairanta muaara nrora varenta atura ntiqata varivarave. Nraase qoravano maquqama vinta varivarave. Ntaaru mwata mwaa ututai enaraqaantairo sia mwitaa si enavavaqa qovara sirave. Naantiaravaqa sia mwi enara voqiasiariva qavaavaqa qovara sianarove. 22 . Mwi enava muasaa ena vasirantavauma, esaa nraase qora taiqa vivaro sia mwoqavanovaqa varianarove. So Gotiva nrai saama tai nraase qorasara rietaroma mwi enara teqoqama saanarove. 23 . Mwi enara mwovano qiniara Gotiva titaiva Mesaiaavano mwainima variso, mwinima variso, tirera, sia mwira kua riaate. 24 . Mwi enara airi vaintivano qovarama vivaro mwovano kumaari tiro titaro, Ne Mesaiaave, tiraro mwovano, Ne Gotira kua qovarama se varuvave, tiraro mwiaqaantainta vitanta airi kumaari ti vaintisa qovarama vivarave. Mwisa qovarama vinta kumaari saiqa varaqi vitanta Gotiva nrai saama tai nraase qorasa mwisa tiri kuara quqaa kuave titanta maquqa si aararaqaa vuate tinta, nrora saiqa varaqinta vivarave. 25 . So qine sia mwi vaintisa kuara quqaa kuave tiate tina, ne mwaa enara varitana naantiara qovara sianirara maqe qini timwa ni varuko. (ne naantiara unto qoqaa variarinta esaa nraase qora ni takuevarave.) 26 . Mwi kuara riaaqinta vivaro naantiara mwovano qini timwa nitaro niara mwiva qovarama viro qumina ntatama variso tirera, sia mwini ni takuareranta vuate. Qini timwa nitaro niara mwiva nraavu mwiqi qumpau viro variso tirera sia mwira kuara quqaave tiate. 27 . Aaquakyaa tisaro esaa naavuvano nuvaasainema senama ne mwataini mwatatai nraaqiarava qoqaama tukuanirave. 28 . Ntaraqaave qutu vuari inraisava vasianira mwiaqaama memoravano ntununukaa sivarave, tiro. 29 . Sisasiva mwitaa timwa sero titaro, Naantiara muara nrora varetanta atura nti enava taiqa viraromwi enaraqaantairo qamwarama suari vuvano enama viraro toravano sia itairaro qovoravano qunto ni qunto ni siraro naavuni kempusa inraisa vasiva esaama qasaa qasaa sianarove. 30 . Mwi enara nraase qoravano naavuqi mwo inraisa qovara sianira takuentama so mwia niara mwiva tukirero temana siso tivarave. Mwisa mwitaa timwa senta esaa mwata maata vasinema variasa sora mwata sivarave. Mwisa sora mwata si varitanta takue varivaqe ne mwataini mwatatai nraaqiarava naavuntaina tonavuqi tuki variarinta ni takuevarave. Ne mwuruqama taari inraisava mwoqama sero itero nuvaasero koriqa si variraqena ne kempusavano tuki 31 . varitana naavuniaasa titaarinta nomuvano nroraqama sero uka tiranta mwisa uro mwata mwoqintai mwoqintainta Gotiva nrai saama tai nraase qorasa esaa ntununukaama senta ntitevarave, tiro. 32 . Sisasiva mwitaa timwa sero titaro, Qine fiki satari vitama se takuetantama mwo kua napisi senta riaate. Satari mwiva tamwa riaa taiqa sero vasiro mwiaqaantairo qaraasa qitu narero utisanta qine mwiaqaa vitama se takuenta titanta, Suari nrora itaari enava qaumantoma vaiso, tiarave. 33 . Mwia voqiama senta naantiara qovara siani inraisarara tura, qine mwia vitama se takuenta niara mwiva tukuani enava qaumantoma vaiso tivarave. 34 . Ne quqaama tuko. Mwaa enara varisa sia esaa qutu vivaro mwi inraisara mwi inraisarara tuva qovara sianarove. 35 . Naavuvanovaqa mwatavanovaqa taiqa viraro ni kuavano qaima qaqi vasiqiro vuanarove. 36 . Sisasiva mwitaa timwa sero titaro, Nta isaravave, suari vuvano ntaraqaave, vasiraqe ne tukuanirave? Sia vainti mwovano napisi sairave. Sia naavuniasavaqa mwirara napisiarave. Nenavaqa mwataini mwatatai nraaqiarava sia mwirara napisurave. Gotiva ni ntova, mwiva qai mwi enarara napisirave. 37 . Noaava vari enara nraase qoravano utuanema sero naantiara ne mwataini mwatatai nraaqiarava tukuani enaraqaa vasianarove. 38 . Mwi enara sia aaqu nramarive, sukuravano numwaqu sai enara nraase qoravano sara nrenta, nramari nrenta, nraata vaati varenta, mwitaamaqi vi variavaro Noaava nramariqaanaa nraavuqi viqetero varisaro 39 . aaqu sukuravano nrivi varisaro mwisa vu aatovano napisi visanta titanta, Qise, te taiqa vuara enava nri naiso, tiavaro nramarivano mwisa naqutu taiqa sairave. Ne mwataini mwatatai nraaqiaravama varuko. Ne uro naanatena tukuani enaraqaavaqa nraase qoravano nkuaa meraaqa senta varivarave. 40 . Mwi enara vainti taaratanavano vutaqi saiqa vare varivaqena ne nkuainku qai vitena mwo mwira saanirave. 41 . Mwi enara nraase taaratanavano sara reri ni varivaqena ne mwo vitena mwo mwira saanirave. 42 . Qine qini nroravano tukuani enara sia napisiasara tinta, qine takue varitanta variate. 43 . So mwaa kuara rietanta variate. Nraavu qova varitaro muara vaintivano nrianira napisi sero nrai nraavuqaa naqisi varitiri, siama muara vaintivano nraavuqi viqetero muara varaitiri. 44 . Mwi kuara rietantama qinevaqa temanaama tenta variqi vitantama ni vesa variate. Ne mwataini mwatatai nraaqiaravama varuko. Qine sia niara tukuanarove ti enara, mwi enaraqaama ne tukuanirave, tiro. 45 . Sisasiva mwitaa timwa sero titaro, Saiqa vainti suqeva nrai nrora vaintiara rietaro suqema sero saiqa vare variari vaintiva, mwiva nantaa siarivave varianarove? Mwiva saiqa vainti mwataa siarivama varianarove. Mwira nrora vaintivano nriaraini virera siro mwi vaintira nroraqama sero titaro, Rena saiqa vainti sini mwisaqaavaqa naqisitara mwi enara mwi enara sara ntusama sera niane, timwa sero 46 . vuariva nruero uro nanero nrima takuairaro mwira saiqa vaintivano mwiva tinema sero saiqa vare varirera, nrima takuero mwira suqema mwitairaro mwiva quasaanarove. 47 . Mwiva suqema mwitero mwi vaintirara titaro, Ne qavaa ri nroraqama saarira re ne vataani inraisaraqaa esaama naqisinarave, tianarove, tuko. 48 . Saiqa vainti mwiva qaqira sero sia mwitaa sirairo, maquqama sero saiqa varetaro nrai naumaqa sero titaro, Qao, ni nroravano qasoma seroma uro nanero nrianarove, timwa sero 49 . mwiaqaantairo nrai sena saiqa vainti mwisa nuqutu sero uro mwoqama senta uera nramari nre variasa sampaqa saravaqa nramarivaqa nramwaqiro virera, 50 . mwo ena, mwira nrora vaintivano mwi enaraqaa siama nrianarove tiani enaraqaa, qisarama mwitero mwira nrora vaintivano uro nanero nrima mwira saiqa takuero 51 . nrai saiqa vainti mwira nuqutu sero vatero mwira titero titaro, Kumaariqama setara suqe saiqa vare vaintisa maquqa si mwatara varenaini revaqa vuane, tiraro natetanta vai nkutinaini mwiva vuanarove, tiro. Sisasiva tirama.