¹ . Sisasiva titaro, Esaara enavano nri nairaro Gotiva nraase qoraqaa naqisiariva vasirero mwataamama vasianarove. Mwaraata sauqurutanavano niari nraata vaati varaavau vitanta qaraasa nraase varai vaintira uro enaqi vita varenta mwiravaqa sara nrareranta uti varitanta mwisa niari raamuvaqa varenta mwi vaintira vitareranta vuarave. ² . Mwi mwaraatasaqintainta sauquruvano sia suqe naumaqara vaisa vuavanta sini sauquruvano suqe naumaqara vaisa vuarave. ³ . Sia suqe naumaqara vaisa nkuaiqa nkuaiqavano niari raamu qai varenta sia tia itai ramwaserara vararaitinta, qaqi vuarave. ⁴ . Qaqi vuavanta suqe naumaqara vaisa nkuaiqa nkuaiqavano niari raamuvaqa varenta ramwasera taquvaqa varenta vuarave. ⁵ . Nraase varai vaintira ntita sareranta vuavaro mwi vaintiva sia vaa nrima naisanta mwinravusa vuruaara sisanta vaita vuarave. ⁶ . Mwaraatanravuvano vaite variavaro ena mwuntusaqi mwovano aasara nero titaro, Nraase varaari vaintiva nri variso. Nrivaqentanravu uro mwira sunasaare, tisanta ⁷ . mwaraata sauquruvano ntivinta niari raamu nkuaiqa nkuiqa temanama se vatenta variavanta ⁸ . sia suqe naumaqara vainravusa suqe naumaqara vaisara titanta, Qise, tiri raamu esaa qimpa viso. Qine nramwasera mwonravu timwivaqe tenta raamuqi qarauru taare, tiavanta ⁹ . mwisa qao tinta, Qinivaqa, nramwasera niararo sia soqa siasorave. Qine sanenta nramwasera soqaa sianaintainta uro soqaa siate, tinta. ¹⁰ . Mwitaa tiavanta mwisa nramwasera soqaa sireranta vuavaro nraase varai vaintiva nri nairave. Mwiva nrima naisanta mwaraata sauquruvano vaa temanamataa nramwusa mwira vaqama senta nraavuqi vera nenta sara nre variavaro qenti suvaivu taira. ¹¹ . Qenti suvaivu taisanta mwaraata mwo mwinravusa naantiara nrima nenta titanta, Nrorao, nrorao, qenti qantua timwi taane, tiavaro ¹² . nraase varai vaintiva mwiva qao tiro, Ne sia qini takuausave. Sia qenti qantua nitaanirave, tirave, tiro. ¹³ . Sisasiva mwi kuaraqaa numwa sero timwa niro titaro, Qine mwi kuara rietantama esaara enavano nrianira qine sia napisiarara tinta, qinevaqa takue varitanta temanamatenta variate, tiro. ¹⁴ . Sisasiva mwitaa timwa sero mwo kuaqaa numwa sero timwa niro titaro, Esaara ena nri nairaro Gotiva nraase qoraqaa naqisiariva mwaa kuara voqiama seroma vasianarove. Vainti nrora mwovano nriaraini virera siro nrai saiqa vaintinravu aarama sero ni moniqaave, ne vatau inraisaraqaave, naqisi mitaate timwa sero virave. ¹⁵ . Virera siro nrai saiqa vainti moni ntusama se nirave. Mwiva niari saiqa varaara mwivau moni mwia ntusama sero nirave. Mwora 5,000 kinaa mwinro, mwora 2,000 kinaa mwiro, mwora 1,000 kinaa mwirave. Nitero nriaraini virave. ¹⁶ . Nriaraini visaro, 5,000 kinaa varai vaintiva mwiva veva nero viva uro mwi moniraqaantairo suqema sero saiqa varaqiro viro uro mwo 5,000 kinaavaqa varairave. ¹⁷ . Mwiva mwitaa sisaro, 2,000 kinaa varai vaintivavaqa veva nero viva uro mwi moniraqaantairo nkuaa meraqa se saiqa varetaro mwo 2,000 kinaavaqa varairave. ¹⁸ . Mwitaa sisaro 1,000 kinaa varai vaintiva veva nero sia mwiaqaantairo saiqa utiraitiro uro mwata quku sero mwi monira qumpau sero mwataqi qunamwa tero qumina varirave. ¹⁹ . Mwitaa sisaro mwisa nrora vaintivano mwonaini uro muaasama vari sero uro nanero nri nero moni nira mwia napisirera sirave. ²⁰ . Napisirera sisaro 5,000 kinaa varai vaintiva nri nero mwi monira vaqama sero 5,000 kinaa mwovaqama sero mwiro titaro, Nrorao, Re niara 5,000 kinaaqaa naqisi mitaane tiaranama ne mwi moniraqaa naqisitanama saiqa vara senama 5,000 mwoqavaqa varauko, tiro. ²¹ . Mwitaa tisaro mwira nrora vaintivano mwira timwa mwiro titaro, Re niara riaaqira vitarama suqema sera varaaro. Re pata inraisaqaa suqema sera naqisi mitaanarara tina, ne ri nroraqama saarira re nrora inraisaqaa naqisinarave. So riri nivaqama sera quasetara variane, tiro. ²² . Mwitaa tisaro 2,000 kinaa varai vaintivavaqa nri nero titaro, Re ni 2,000 kinaa mira mwiaqaa naqisiane tiarana ne mwiaqaa naqisitana saiqa utu sena 2,000 kinaa mwovaqa varauko, timwa sero mwi monira mwisaro ²³ . mwira nrora vaintiva titaro, RE niara riaaqira vitarama suqema sera varaaro. Re pata inraisaqaa suqema sera naqisi mitaanarara tina, ne ri nroraqama saarira re nrora inraisaqaa naqisinarave. So riri nivaqama sera quasetara variane, tiro. ²⁴ . Mwitaa tisaro mwira saiqa vainti 1,000 kinaa varaiva nri nero titaro, Nrorao, ne napisi saukara re saiqara vaavaa ti variara vaintivave. Re sia rena vara tutaana sarara vani variaravave. Re sia sara suku qintatataanaraqaantaira uro sara vare variaravave. ²⁵ . Ne mwirara rienama ri aatu aatu sitanama sia ri moniqaantai saiqa utiraitina, mwata quku sena mwiqi quku namwa sena rinaini qumpau mwitaurave. So mwaa takuane. Rena moni mwaa so rena varaane, tiro. ²⁶ . Mwitaa tisaro mwira nrora vaintivano mwirara titaro, Re saiqa vainti maquqa siaravama variaro. Qumina aara nruenarara qai rietara sia suqema sera saiqa vare variaravama variaro. Quqaave ne mwosa vara tutaara vanina mwosa qintatataaraqaantairo kumpiqaira vanuko? ²⁷ . Re mo mwitaa sitara naraiqamave sia ni moni varaqira uro benki nraavuqi mitaaro? Re benkiqi vatairaqena ne uro nanena nriariva mwi monira varena mwoqavaqa mwiqintaina varaataarave, tiro. ²⁸ . Mwitaa timwa sero mworara titaro, Mwi vaintiraqaantaira 1,000 kinaa mwia vara sera 10,000 kinaa vatai vaintira mwiane. ²⁹ . Suqema sero airi inraisaqaa naqisi mite vari vaintira ne mwoqavaqa mwiariro mwiva manaquma seroma varaanarove. Sia mwo inraisaqaa naqisi mite variani vaintiraqaantaina ne mwiva nara inraisave vataanira esaama vara saanirave, tiro. ³⁰ . Mwira nrora vaintivano mwitaa timwa sero titaro, So maquqa si saiqa vaintira mwira vitaqinta uro mwaaqaini saivaro sonkiraqi natetaro niari vai gutitanta variraqi variarive, tirave, tiro. Sisasiva mwi kuaraqaa numwa sero timwa nira. ³¹ . Sisasiva mwitaa timwa sero titaro, Ne mwataini mwatatai nraaqiaravave. Naantiara ne nroraiqama vina vuniaa vaintivano varitana naavuntaina tukuarinta naavuniaasa ni vaqama senta tuki varivaqe unto nena nrora vainti taintaqa mwatasaa vina varianirave. ³² . Variarinta esaa mwata maata vasinema vari nraase qorasa ni vuqaa ntununukaama vivaqe ne mwisa numaara sena taaratanaqaa variate tianirave. Sipisipi qova nrai sipisipivaqa memeravaqa numaara sero ³³ . sipisipi nrai sauqu saantutaini ntita vatero memera ntita nrai sauqu sanaaqaini vatainema sena, ne mwataini vari nraase qorasa taaratanaqaa numaara saanirave. ³⁴ . Ne mwitaama sena taaratanaqaa numaara sena vatenama ne vuniaa vaintivano varitana ne ni sauqu saantutaini variasara titana, Nrite. Ni ntova qini suqema nitaisa variavo. Ntaaru mwaa mwatara ututai enaraqaantairo Gotiva qiniara rietaro ninta saama tero temanama tai mwatusaraqi riri variate. Qine ni suqema mitaasave. ³⁵ . Ni sara nraataa sisana varukanta qine ni sara miarave. Ni nramari nraataa sisana varukanta qine ni nramari miarave. Ne mwo mwatanaa vaintivano varukanta qine niara quasetanta nenta nraavuqi ni vitaqinta uro saarave. ³⁶ . Ne sia vaaqa vataukanta qine ni vaaqa miarave. Ne ita visana varukanta qine suqema senta niqaa naqisiarave. Ne karavusiqi varukanta qine nrima ni takuaarave, tianirave. ³⁷ . Ne mwitaa tiarinta napisi senta nrue vari nraase qorasa niara mwitaama tivarave, Nrorao, ntaire te ri takuaurara sara nraataa sisara variaranta te ri sara mwunarave? Ntaire te ri takuaurara nramari nraataa sisara variaranta te ri nramari mwunarave? ³⁸ . Ntaire te ri takuaurara re mwo mwatanaa siaranta te ri vitaqinta tenta nraavuqi saunarave? Ntaire te ri takuauraro ri vaaqa sia vaisara variaranta te ri vaaqa mwunarave? ³⁹ . Ntaire te ri takuaurara ri ita visara varianarave? Ntaire te ri takuarera karavusiqi vunarave? tivarave. ⁴⁰ . Mwisa mwitaa tivaqe ne vuniaa vaintivano varitana mwisa niari timwa nina titana, Ne tianira riaate. Qine ni qata vasaa sia utu vasianira mwo saaisaqa sitantama qine nivaqama saaisaqama mitaarave, tianirave. ⁴¹ . Ne mwitaa sena nena sauqu sanaaqaini varisara mwitaama tianirave, Qine ne varunantainta vuate. Gotiva qiniara maquqama vuate tiro, tirave. Gotiva Saataaniravaqa, Saataanira toveqi vaana mwisaravaqa, rietaro tia nrora itaira temanama sero vataira qine mwini vuate. ⁴² . Ni sara nraataa sisana varukanta qine sia sara miarave. Ni nramari nraataa sisana varukanta qine sia ni nramari miarave. ⁴³ . Ne mwo mwatanaa vaintivano varukanta qine sia niara quasetanta ni vitaqinta nenta nraavuqi saarave. Ne sia vaaqa vataukanta qine sia ni vaaqa miarave. Ne ita visanave, karavusiqive, varukanta qine sia nrima ni takuaarave, tianirave. ⁴⁴ . Ne mwitaa tiarinta mwisavaqa tivarave, Nrorao, ntaireve te ri takuaurara ri nraataa sisara variaro? Ntaireve ri nramari nraataa sisara variaro? Ntaireve re mwo mwatanaa vaintivano variaro? Ntaireve re vaaqa sia vaisara variaro? Ntaireve ri ita visara variaro? Ntaireve re karavusiqi variaro? Ntaire re mwitaa mwitaama variaranta te sia ri saaisaqa sunarave? tivarave. ⁴⁵ . Mwisa mwitaa tivaqe ne tianirave, Ne tianira riaate. Qine sia utu vasianira mwo sia saaisaqa sitantama qine nivaqama sia saaisaqama mitaarave, tianirave. ⁴⁶ . Ne mwitaa tiarinta mwia saara mwisa niari soqaa varenta esaa ena atura ntiqata variqi vivanta napisi senta nrue vari nraase qorasa niari soqaa varenta esaa ena suqema senta qaqi variqinta vivarave, tiro. Sisasiva tirama.