1 . Sisasiva mwi kuara mwi kuara timwa ni taiqa sero nrai nraaqiaranravuara titaro, 2 . Qine napisi saarave. Taara ena nritarairaro ntaaru naavuniaava qaqi vesasu nitairara rietanta omwata nre enava nrianarove. Mwi enaraqaa ni navaaqavuqinta uro saivanta ni satariqaa rusenta siritevarave,tiro. 3 . Sisasiva mwi kuara nrai nraaqiaranravu timwa nitero varisanta Gotira saiqa vara mwite variasa mwisa nroranravuvaqa, Suntaa nroranravuvanovaqa, mwisa Kaiapaasira nraavuqi qumpau senta ntununukaama vinta. Kaiapaasiva Gotira nraavuqaa naqisitaro vuniaa vaintivano varira 4 . mwira nraavuqi ntununukaama vinta Sisasira navaaqavuqinta uro ruserara qumpause kua tinta titanta, 5 . Omwata nraana enaraqaa mwira navaaqavu saaranta nraase qoravano iroramaqinta naqivorave , tiara. 6 . Sisasiva Betanini Saimonira nraavuqi uro varira. Saimoniva vuni varisaro susu rumuaaravano mwavana nre varira. 7 . Sisasiva mwi vaintira nraavuqi uro varisaro nraase mwovano vera nero Sisasira suqema mwitarero nramwasera suqe muna vira nrora moni saira ori taquqi varero uro Sisasiva taintaqaa sara nre varisaro mwira qiataqaa qarauru mwitaira. 8 . Mwira qiataqaa qarauru mwitaisanta mwira nraaqiaranravuvano takuenta nraase mwira irora sinta titanta, Naraiqamave mwitaama sero nramwasera mwia qumina taiqa saiso? 9 . Nramwasera mwia ninta nrora moni vara senta vesi nraase qora niataarave, tinta. 10 . Mwisa mwitaa ti variavaro Sisasiva mwisa kua riero titaro, Qinenravu naraiqamave nraase mwira irora si variavo? Mwiva mwitaa sitaroma ni suqema mite variso. 11 . Vesi nraase qora mwisa esaa ena qinivaqa variqinta vivarave. Ne qaima sia esaa ena qinivaqa variqina vuanirave. 12 . Nraase mwaava nramwasera qu mitetaroma ni qunamwa terara temanaa si variso. 13 . Ne quqaa tianira riaate. Naantiara ni kua mwasaasa nraase qora timwa nitantama maqe nraase qora mwaava niqaa nramwasera qu mitairara rietantama mwo mwatanaa mwo mwatanaasa timwa nivanta rievarave, tiro. 14 . Sisasiva mwitaa tisaro Sisasira nraaqiara 12 nravuqintairo mwovano mwira utu Suntaasi Isikeriotiva veva nero Gotira saiqa vara mwite varia vaintisa mwisa nrora vaintinravu varianaini viva 15 . uro mwisa sapara siro titaro, Ne Sisasira qovarama se qini sauquqi nrima saasera, qine nara soqaave ni mivarave? tisanta mwisa ori moni 30 nravu saara numwa senta mwiavaro Suntaasiva mwi monira varero 16 . mwi enaraqaantairo mwisa sauquqi Sisasira saani aarara mpaamaqiro vira. 17 . Sia ntotai beretira omwata nre isarava nri naisanta vuni nronai enaraqaa mwira nraaqiaranravuvano Sisasiva sinaini nri nenta sapara sinta titanta, Ntaraqive te uro temanama mwitaarara re vesasu nita enarara rietarama mwi sarara nrenarave? tinta. 18 . Mwisa mwitaa tiavaro Sisasiva titaro, Qine Serusaremini uro vainti mwora mwitaama tiate, Mwaara kua tiri timwa timwi vari vaintiva titaro, Mwaa enava ninima qovarama viso. ne nena nraaqiara sampaqa ri nraavuqi vesasu nitaa sarara nrarerave tiso, tiate, tiro. 19 . Sisasiva mwitaa tisanta mwira nraaqiaranravuvano Sisasiva tinema senta mwi sarara temanama senta vataara. 20 . Temanama senta vataavaro ena sisaro Sisasiva nrai nraaqiaranravu sampaqa uro sara taintaqaa mwatasaa variro sara nre varira. 21 . Sara nretaro mwisa timwa niro titaro, Ne tianira riaate. Qiniqintairo mwovano ni qovarama sero nravutaasa sauquqi saanarove, tiro. 22 . Mwitaa tisanta mwira nraaqiaranravu mwuntusa maquqa sisanta mwisa nkuaiqa nkuaiqavano Sisasira sapara sinta titanta, Nrorao, re niare tiaro? Sia ne mwivave, sia ne mwivave, timwaqinta vinta. 23 . Mwitaa timwaqi vuavaro Sisasiva titaro, Bereti vara senta tetana nkuaa vasa mwaati tanaaqi naarava, mwi vaintivama ni qovarama saanarove. 24 . Ni mwataini mwatatai nraaqiarara mwitaama se ruse kuara ntaaru qara numwa taarave. So mwi kuava mwivauma vasianarove. Ni mwataini mwatatai nraaqiarara qovarama saani vaintirara mpo timwa mwitauko. Mwira nrova sia mwira mwata saataara mwira mwata tairave, tiro. 25 . Sisasiva mwitaa tisaro Suntaasiva mwira qovarama saariva Sisasira sapara siro titaro, Mwaara ti variarao, re niarave tiaro? tisaro Sisasiva titaro, Eo, riarama tuko, tiro. 26 . Sisasira nraaqiaranravu sara nre variavaro Sisasiva bereti vara sero Gotirara suqeve timwa sero neqa sero nrai nraaqiaranravu niro titaro, Mwaa vara se nraane. Mwaa ni mwavanama siso, tiro. 27 . Mwitaa timwa sero mwiva uaini kaapu vara sero Gotirara suqeve timwa sero mwinravusa viti niro titaro, Qine esaa mwisa mwaa nraate. 28 . Mwaa ni nraarema siso. Gotiva nraase qoravaqa qaraasa kua vataari kuava mwi kuava kempusaqama vuarive tiro, ni nraarevano mwira kempusaqama saanarove. Ni ru saivaro ni nraarevano qarauriro airi nraase qora saaisaqa sitaromwisa maquqa siani kuara nrunka nitaanarove. 29 . Ne tianira riaate. Mwaa enaraqaantaina ne sia uaini nraraitina qaqi variqi vuarinta, qine ni nkova naqisianiraqi nivaqa uro varivaqe ne mwi enaraqaa qini sampaqa qaraasa uaini nraanirave, tiro. 30 . Sisasiva mwitaa timwa sero nrai nraaqiaranravu sampaqa Gotirara isi timwa sero veva nero Oripi qaataqaara virama. 31 . Mwisa mwini vuavaro Sisasiva mwisa timwa niro titaro, Qine maqe enaqi ni sentama aatu ntuqeqaa sinta vivarave. Gotira bukuqi qara numwa taa kuava maqe mwivauma vasianarove. Mwataama tiro: Sipisipiqaa naqisiani vaintira Gotiva rusairanta sipisipi mwisa aatu ntuqeqaa sinta niariara niariara sampi mwona mwona vivarave, tirave. 32 . So naantiara ni vara qaqi ntivuma sairaqe varitana qini vuni ne naane Garirini vuanirave, tiro. 33 . Sisasiva mwitaa tisaro Pitaava qao tiro, Esaa mwaasa ri senta aatu vivaqe ne qai ri vaqama sena varianirave, tiro. 34 . Pitaava mwitaa tisaro Sisasiva titaro, Ne tianira riaate. Maqe enaqi kokoraaravano sia uka rairara re taara mwonaini niara titara, Sia ne mwi vaintira takuaurave tinarave, tiro. 35 . Sisasiva mwitaa tisaro Pitaava qao tiro, Ne sia riara sia mwira takuaurave tianirave. Rivaqama se ni ru saivaqenavaqa sia ne mwitaa tianirave, tiro. Pitaava mwitaa tisanta Sisasira nraaqiara sini mwinravusavaqa mwi kuara qai tiara. 36 . Mwiaqaantairo Sisasiva nrai nraaqiaranravuvaqama sero kyaqamwa uatutaaraqi mwia utu Gesameni mwiqi uro nero nrai nraaqiaranravuara titaro, Qine mwini mwatasaa vi varivaqe ne uro varuraqaa Gotirara asaara naase, tiro. 37 . Timwa sero Pitaaravaqa, Sepetira mwaaqutanavaqa qai ntita varero mwini visaro mwira sia sasa sisaro mwira mwuntusavano maquqa sisaro 38 . mwiva taaramwo mwinravusara titaro, Ni mwuntusavano mwoqama sero ua sisaro ni rusaaqara sisana varuko. Qinenravu mwaaqaa nivaqama se varitanta vu nampairi senta takuetantama variate, tiro. 39 . Mwitaa timwa sero Sisasiva sia muaasaqama viro uro varianaintairo qunto niro Gotirara aasara nero titaro, Nto, re sove tirera ne ita vi inraisara nramari voqiama se nraanira re qaqinaini vara saane. So sia ni sasa sira vataqira vuane. Rena sasa sira vataqira vuane, tiro. 40 . Sisasiva mwitaa timwa sero nrima nanero nrai nraaqiara taaramwonravu sainaini unto takuaisanta mwinravusa vuruara sisanta vaite variavaro mwiva Pitaarara titaro, Naraiqamave qine nivaqama senta pataiqaqa varitanta sia vu nampairi senta viti viri takuetanta variavo? 41 . Saataaniva qini qamaqaaso tinta qine takue varitanta Gotirara aasara netanta variate. Qini mwaraquravano mwitaa siataa siraro qini mwavanavano qai sia so kempusaqa sisanta variavo, tiro. 42 . Sisasiva mwitaa timwa sero qavaa uro Gotirara aasara nero titaro, Nto, ne mwaa nramarira nraanira sia re qaqinaini vara saraitira qaqi naane tirera, ne ri sasa sira vataqina virerave, tiro. 43 . Mwitaa timwa sero qavaa uro nanero unto takuaisanta mwira nraaqiara taaramwonravu vuruara sisanta vaite variara. 44 . Vaite variavaro Sisasiva qavaa mwinravusa sero viva uro Gotirara taaramwo naini aasara netaro vota tinema sero qai qavaavaqa tira. 45 . Gotirara aasara namwa sero Sisasiva uro nanero unto taaramwo mwinravusara titaro, Qise, qinenravu qaqi qaive ho sitanta vaite variavo? So takuaate. ni mwataini mwatatai nraaqiarara navaaqavuqinta uro maquqa si saiqara uti varisa sauquqi tuata se isaravama nri naiso. 46 . Ntivivaqenravu vuare. Ni qovarama sero nravutaa sauquqi saari vaintivama mwaa nri variso, tiro. 47 . Sisasiva mwi kuara ti varisaro mwira nraaqiara 12 nravuqintairo Suntaasiva uro naira. Suntaasiva uro naisanta mwira vaqama senta airi vaintivano paiqavaqa sana saavuvaqa tu varenta uro naara. Gotira nraavuqi Gotira saiqa vara mwite varia vaintisa mwisa vuniaasavaqa, Suntaa nrora vaintinravuvaqa, mwisa mwi vaintisa titaavanta mwisa Suntaasira vaqama senta nriara. 48 . Suntaasiva Sisasira qovarama saanirara vota mwisa timwa niro titaro, Ne uro mwira kua mwanetana mwira motasaani vaintira mwira mwivave. qine mwira uro navaaqavu saate, tiro. 49 . Suntaasiva mwitaa timwa sero mwiva mwisa sampaqa uro nero mwiva qamwarama sero Sisasira vaini uro nero titaro, Mwaara ti variarao, varirave, timwa sero mwira mota sero. 50 . Suntaasiva mwira mota saisaro Sisasiva titaro, Ni vaintiomwo inraisara nrinara qamwarama sera utuane, tisanta Suntaasira vaqama senta nriasa uro Sisasira navaaqavu senta tutenta tuqara tutaavaro 51 . mwiaqaantairo Sisasira nraaqiara mwovano paiqa nrai tuaqintairo veva narau sero mwiaqaantairo vainti mwo aato toqa saira. Gotira nraavuqi saiqa vare varia vaintisa mwisa vuniaa vainti mwira saiqa vainti aato toqa saira. 52 . Teqa saisaro Sisasiva qao tiro, Rena paiqa veva nrai tuaqi numwa taane. Paiqaqaantainta naquasa niarivaqa paiqaqaantainta ru saarave. 53 . Re sia napisianarave siso? Ni saaisaqa sisa ni ntora sapara siariro mwiva qamwarama sero naavuntairo naavuniaasa naquasa mwaara 12 nravu titairanta soma tukivarave. 54 . Ne mwitaa tiarinta mwisa tukivera, nantaama serove ntaaru qara numwa taa kuava quqaa mwivau vasianarove? tiro. 55 . Sisasiva mwitaa timwa sero mwiaqaantairo Suntaasira vaqama senta nria vaintisara titaro, Qise, qine kamanira vaqama sero naqirera uti vari vaintira voqiama senta ni navaaqavireranta paiqavaqa saavuvaqa vare nriavo? Ne mwo ena mwo ena Gotira nraavuqi varitana nraase qora kua mwasaasa timwa ni varukanta qine sia mwi enara ni navaaqavuarave. 56 . Ntaaru poropeti vaintinravuvano mwaa inraisava qovara sianirara qara numwa taa kuava quqaa mwivau vasiarive tiro, maqe mwaa inraisava qovarama viso, tiro. Sisasiva mwitaa tisanta mwira nraaqiaranravuvano mwira qaqira senta aatu nuqe sinta vuarama. 57 . Sisasira navaaqavu senta tutaasa mwira vitaqinta uro Gotira nraavuqi saiqa vare variasa mwisa vuniaa vaintivano variraqi Kaiapaasira nraavuqi saavanta nraavu mwiqi mwaara osara ti varia vaintisavaqa, Suntaa vainti nroranravuvaqa, vaa ntununukaa sinta variara. 58 . Sisasira vitaqinta uro senta variavaro Pitaava nriarasanta vitaro mwisa vataqiro viva uro Kaiapaasira nraavu vasisaro mwatusaqaa uro nero tutukyaqaa mwaati nero vutaqi viro mwi inraisava qovara sianira takuarero nraavu mwiaqaa naqisi varia vaintisa vaqama sero varira. 59 . Pitaava mwaaqaini varisanta nraavuqi Gotira nraavuqaa naqisi variasavaqa, esaa mwiqi ntununukaa sinta variasavaqa, Sisasira rusareranta Sisasiraqaa kumaari kua vatareranta mwo kuara mpaa siavaro 60 . sia vaisanta airi vaintivano Sisasirara kumaari kua numwa se tiara. Sampi kua qai timwaqinta vuavanta vainti taaratanavano ntivinta 61 . Sisasirara titanta, Mwaa vaintiva mwitaa tisanta tetana riaunarave. Mwiva titaro, Ne soma Gotira nraavu nrora nampairi sena taaramwo ena varitana qavaa soqa taiqa saanirave tirave, tinta. 62 . Mwitana mwitaa tiavaro Gotira saiqa vara mwite variasa mwisa vuniaa vaintivano ntiviro Sisasirara titaro, Mwitana mwitaa titanta riqaa kua vate variavo. Re mo niariara nara kuave tinarave? tisaro, 63 . Sisasiva sia kua tiraitiro, tineqa varisaro qavaa vuniaa vaintivano Sisasirara titaro, Ne Gotira vuqaa varitana mwira utu netanama riara quqaa kua tianema tuko. Quqaave Gotiva ri titaisara re tiri saaisaqa sirera, Mesaiaavano variaro? Quqaave re Gotira mwaaquvano variaro? Tiri timwa timwiraqe riaare, tiro. 64 . Mwiva mwitaa tisaro Sisasiva titaro, Re tianara ne mwaa mwivave. Ne tianira qine riaate. Qine naantiara takue varivaqe ne mwataini mwatatai nraaqiarava nroraqama vina Gotiva kempusavano varianira mwira sauqu saantutaini mwatasaa vina varina tonavuqi tukuanirave, tiro. 65 . Sisasiva mwiva mwitaa tisaro vuniaa vainti mwiva nrai vaaqa nrasiqu sero titaro, Qise, mwiva Gotirara maquqa si kuara tiso. Vainti mwovano mwiraqaa kua vataanira qaqi qumina aarevorave. Takuaate. Qine rie variavaroma mwiva Gotirara maquqa si kuara tiso. 66 . Mwia saara qine Sisasirara nara kuave tivarave? Tivaqe riaase, tiro. Mwitaa tisanta mwisa titanta, Mwira maquqa si saiqava nritaraiso. Mwia saara mwira ru saarava qaima vaiso, tinta. 67 . Mwisa mwitaa timwa senta uro Sisasira viriqi qukaanu vsinta sauquqaantai mwira nuqutu senta mwira vu aato numwa senta vatenta. 68 . vireraqama senta titanta, Mesaiaao, re quqaa kua qovarama sera vaintiva varirera, sia takuaraitira ri nuqutuani vaintira utu naane, tinta. 69 . Nraavuqi mwitaamaqinta vi variavaro Pitaava mwaaqaini mwatusaqa mwatasaa viro varisaro saiqa nraase mwovano Pitaara vaini uro nero mwirara titaro, Revaqa Sisasira Gaririniaa vainti mwisaniri variaravave, tiro. 70 . Mwiva mwitaa tisaro Pitaava mwisa vuqaa varitaro qao tiro, Re tiana kuara ne sia napisurave, tiro. 71 . Mwiva mwitaa timwa ser uro nraihana varisaro saiqa nraase mwovano mwira takuero mwini ntivinta variasara titaro, Vainti mwaava Sisasira Nasaretiniaara vaqama sero varivave, tiro. 72 . Mwitaa tisaro Pitaava sauqu iqiqaa vatero titaro, sia ne mwi vaintira takuaurave, tiro. 73 . Mwitaa timwa sero pataiqa varisanta mwini ntivinta varia vaintisa Pitaava sinaini uro nenta mwirara titanta, Sisasira nraaqiaranravu mwi mwatanaasa variavara quqaaqama sera revaqa nkuaa mwatanaa mwivama variaro. Mwisa mwoqarama setanta mwaa kuara ti varianema serama revaqa mwaa kuara ti variaro. So re mwaa mwivave, tinta. 74 . Mwisa mwitaa tiavaro Pitaava sauqu iqiqaa vatero titaro, Ne sia quqaa kua tiasera, Gotiva soma ni ruanarove. Ne quqaama tuko. Qine ti varia vaintira sia ne takuaurave, tiro. Pitaava mwitaa timwa saisaro qamwarama sero kokoraaravano quka raisaro 75 . Sisasiva Pitaara timwa mwi kuava Pitaara aatoqi numwa viro. Sisasiva Pitaarara titaro, kokoraaravano sia quka tirara re taaramwo naini niara sia mwira takuaurave tinarave, tira. Pitaava mwi kuara riero mwiva mwaaqaini mwaati nero visaro mwira mwuntusavano maquqa sisaro nroraqama sero nataira.