¹ . Mwia so qararaara toqa enaqi Gotira saiqa vara mwite variasa mwisa nrora vaintinravuvaqa,Suntaa nrora vaintinravuvaqa, kua timwa senta Sisasira Sisasira ru saanarave timwa senta ² . mwiaqaantainta mwisa Sisasira seniqaantainta rumpa se vitaqinta uro Pairaativa sinaini saara. Pairaativa Romeni kirapava varira. ³ . Suntaasiva Sisasira qovarama sai vaintiva takuaisanta mwisa ko timwa senta Sisasiraqaa kua vatentama mwira ru sareranta uti variavaro mwiva mpo sia ne mwitaa siataara vaisana mwitaa surave timwa sero 30 moni mwiara varero uro nanero Gotira saiqa vara mwite varia vaintisa mwisa nroranravuvaqa, Suntaa vainti nroranravuvaqa, mwisa varianaini uro nero titaro, ⁴ . Ne qumina vainti sia maquqa si saiqara uti vaintirama uro qini sauquqai tuta saukantama qine mwira ru sareranta uti variavo. Ne maqu inraisa utu sauko, tiro. Timwa sero moni mwia mwisa nirero tisanta mwisa qao tinta, Te nantaave sianarave? Sia tiri saiqave. Mwi inraisava rina saiqama vaiso, tinta. ⁵ . Mwisa mwitaa tiavaro Suntaasiva moni mwia varaqiro uro Gotira nraavu mwoqi sia qumina vaintivanovaqa vera ne variaraqi pisatero viva uro vanta siri vira. ⁶ . Suntaasiva moni mwia pisatero visanta Gotira nraavuqaa naqisia vaintisa mwi monira ntunuse vatenta titanta, Mwaa monira qutaru monive. Te mwaa monira Gotira nraavuqi vataana monira vaqama se nkuaaqi vataarorave. Mwitaa sitanta te mwaara kua neqa saarorave. ⁷ . Gura utitanta aatapai mwata vare varia mwatava qaqima vaiso. Nrivaqe mwaa moniraqaantai mwi mwatara soqaama saare. Te mwi mwatara soqaama senta vataararo mwo mwatanaavano mwaini qutu vivaqe te mwisa mwi mwataraqaa qunamwa taare, tinta. Mwitaa timwa senta moni mwiaqaantainta ⁸ . mwi mwatara soqaama saarara tinta, maqe mwaa enara nraase qoravano mwi mwatarara Qutaru Mwatave ti variara. ⁹ . Gotira nraavuqaa naqisi variasa mwitaama senta mwi mwatara soqaa siarara tiro, ntaaru vetanto enaqaa Seremaiaava poropeti vaintivano qara numwa tai kuava quqaa mwivau vasira. Seremaiaava mwitaama tiro: Isareri vainti mwonravuvano kua timwa senta vatenta 30 moni, mwirara qutaru moni vasianarove ti vari monira, ¹⁰ . mwi monira varaqinta uro sentama gura uti mwatara soqaa sivarave. Nroravano ni kua timwa minema sentama mwisa mwi mwatara varevarave, tira. ¹¹ . Mwisa Sisasira vitaqinta uro kirapava Pairaativa varinaini saavaro Sisasiva mwira vuqaa ntiviro varisaro Pairaativa mwira nuviraavira siro titaro, quqaave re Suntaa vuniaa vaintivano variaro? tisaro Sisasiva titaro, Re tianara ne mwaa mwivave, tiro. ¹² . Sisasiva mwitaa tisanta Gotira saiqa vara mwite varia vaintisa mwisa nrora vaintinravuvaqa, Suntaa vainti nrora vaintinravuvaqa, mwisa mwo kua mwo kua saara Sisasira irora si variavara re siave mwisa ti varia kuara riaaro? tisaro ¹⁴ . Sisasiva sia kua mwovaqa mwisara tiraitiro, tineqa sero varisaro mwiaqaantairo nrora vainti Pairaativa mwirara airiqama naumaqaira. ¹⁵ . Mwo isi mwo isi vesa sumwita sarara nraa enaraqaa kirapava vuniaa vaintivano nraase qora quasama nitarero karavusi vainti mwo suvanu sero titaisaro mwaaqaini vira. Nraase qoravano nta vaintirave suvanu saane tiara mwi vaintira suvanu se varira. ¹⁶ . Mwi enara karavusi vainti mwo mwira utu Barabaasiva maqu vaintivano varisantara tinta, airi nraase qoravano mwi vaintira utu napisi saara. Karavusi vainti mwo suvanu senta tite varia osarava mwitaama vaisanta ¹⁷ . mwi enaraqaa nraase qoravano mwirara rietanta ntununukaa sinta variavaro Pairaativa mwisa sapara siro titaro, Nta karavusi vaintirave suvanu saariro vuanarove? Ne Barabaasirave suvanu saanirave? Sisasira mwirara titanta Mesaiaavanove ti variara, ne mwirave suvanu saanirave? tiro. ¹⁸ . Pairaativa napisi saisanta nrora vaintinravuvano Sisasiva nroraqama vuasorave tinta mwirara raraqitaisanta mwisa mwira vitaqinta uro mwira sauquqi saara. ¹⁹ . Pairaativa ko nraavuqi mwatasaa viro varisaro mwira nraasevano kua vara sero titaro, Mpo, mwi vaintiva sia mwo inraisa utu sairaqaa qumina kua vaterorave. Mwira qaqi titairaro vuarive. Ne enaqi mwiraqaa taira takuaukaro ni maquqa sisana varuko, tiro. ²⁰ . Mwira nraasevano mwitaa tisanta mwira kua riaasorave timwa senta Gotira saiqa vare varia vaintisa mwisa nrora vaintinravuvaqa, Suntaa mwisa nrora vaintinravuvaqa, kempusaqama senta kua nraase qora timwa ninta titanta, Barabaasira suvanu sera timwira Sisasira Sisasira rusaane tiate, tinta. ²¹ . Mwitaama senta rapateqata tiavaro Pairaativa sapara siro titaro, Mwi vaintitanaqintai nta vaintirave suvanu saanirave? tiro. ²² . Mwisa mwitaa tiavaro Pairaativa qao, tiro, Sisasira mwirara Mesaiaavanove tiarave. Mwira mo ne nantaave sianirave? tiro. Mwitaa tisanta esaa mwisa titanta, Mwira sairanta satariqaa rutaate, tinta. ²³ . Mwisa mwitaa tiavaro Pairaativa mwisa sapara siro titaro, Nara saarave ne mwira saarinta satariqaa rutevarave? Nara maquqa si inraisarave utu saiso? tiro. Mwitaa tisanta mwisa nroraqama senta aasara nenta titanta, Mwira sairanta satariqaa rutaate, tinta. ²⁴ . Nraase qoravano mwitaa ti variavaro Pairaativa takuaisaro mwira kuavano sia so vaisaro mwiva titaro, Nraase qora vutaqaantairo mwo inraisavano ntivuasorave, timwa sero nramari tanaaqi qarauru sero nraase qora vuqaa varitaro nrai sauqu siqama sero titaro, So takuaate. Mwira qutaru kuavano siama niqaa vaiso. Mwi kuava nintaqaama vaiso, tiro. ²⁵ . Mwitaa tisanta esaa nraase qoravano titanta, Mwia sove, mwi kuava tintaqa vasitaro te mwatataarasaqaavaqama vasianarove, tinta. ²⁶ . Mwisa mwitaa tiavaro Pairaativa mwisara rietaro Barabaasira suvanu sero nrai naqua vaintisa Sisasira saanaqaantai nuqutuate tisanta mwira nuqutu senta vataavaro mwiaqaantairo mwira satariqaa rutaate tiro, Pairaativa mwira nrai naqua vaintisa sauquqi tuta saira. ²⁷ . Pairaativa nrai naqua vaintisa sauquqi tuta saisanta mwisa mwira vitaqinta uro kirapara nraavuqi senta mwisa niari sena naqua vaintisavaqa esaa ntununukaama senta Sisasira vara tavaaraqa vatenta mwira vara ututu varitanta ²⁸ . mwira vaaqa qaqinaini vara senta mwira vireraqa sitanta vuniaa vainti vaaqa utu mwitarera nraare vaaqa utu mwitaara. ²⁹ . Mwiaqaantainta mwisa kauvera vara senta qiata vainti tovaqa voqia sira ququrama senta senta Sisasira qiataqaa qu mwitenta. Mwisa mwitaa mwitaama senta mwira vireraarora sireranta Sisasira vuqaa tori sauru ravinta titanta, Suntaa nraase qora vuniaa vaintio, varirave? timwa senta ³⁰ . mwiraqaa qukaanu visi se vatenta saavu mwira sauquqi tu mwitaara mwia vara senta mwiaqaantainta mwira qiataqa nuqutuara. ³¹ . Mwitaamaqinta vitanta vireraarora sinta raima mwitenta taiqa senta mwisa vaaqa utu mwitaara vara senta nrai vaaqa utu mwitenta mwira satariqaa ru tareranta vitenta vuara. ³² . Naqua vaintisa Sisasira satariqaa rusenta siritareranta mwatusaqintainta mwaaqainiara aaraqaa vitanta vainti mwovano Sairininiaara mwira utu Saimonira qinorama senta mwirara kempusaqama senta titanta, Re Sisasira rute satarira vara quqira uro mwiane, tiara. ³³ . Timwa senta Sisasira vitaqinta uro quminantata Korokotaave tianaini saara. Korokotaa mwaa kuaraqintai tirera, Qiata Mwusaarintatave tianaini Sisasira uro senta ³⁴ . uaini mwiqi sunkavi inraisaravaqama senta kuantaa taara mwiavaro Sisasiva pataiqa nretaro takuero qaqira pisatero sia nraira. ³⁵ . Sisasiva sia nraisanta mwisa mwira satariqaa niriqaantainta rutenta mwira vaaqaqa vara senta kaati ruanema senta ori tuta setanta mwira vaaqa numaara senta varenta ³⁶ . mwiaqaantainta mwisa mwatasaa vinta varitanta mwira takue variara. ³⁷ . Mwira qiataini kua mwo ko timwa mwitaa kuara qara numwa senta satariqaa rutaavaro mwi kuava mwitaama tiro: MWAA SISASIVA SUNTAA VUNIAA VAINTIVE, tiro. Mwi kuava mwitaama sero vasira. ³⁸ . Mwisa Sisasira vaqama senta vainti mwotana siri taara. Mwitana niari sena vainti ru setanta muaara vare varia vaintitana variavanta mwo Sisasira sauqu saantutaini rutenta mwo mwira sauqu saanaaqaini rutaara. ³⁹ . Mwitaama senta rutaavanta nraase qora vitare nritare sitanta nru numwa senta mwaunru miqi mwitenta Sisasirara maquqa si kuara timwa mwitenta titanta, ⁴⁰ . Qise, re titarama, Gotira nraavu nampairi senama taaramwo ena varina saiqa varaqi vitanama qavaa soqa taiqa saanirave tianarave? So, re Gotira mwaaquvano varirera, rena saaisaqa siane. Renavano satariqaantaira miavi naane, tinta. ⁴¹ . Mwisa mwitaa ti variavanta nkuaa meraqa senta Gotira saiqa vara mwite variasa mwisa nrora vaintinravuvaqa, mwaara ti varia vaintisavaqa, mwirara raimwa mwitenta titanta, ⁴² . Mwiva mwosa qai saaisaqa si variva siave so nrai saaisaqa sianarove ? Mwi vaintiva Isareri vuniaa vaintivano variso. Sai te varitanta takuaararo mwiva nrai satariqaantairo miavi nero tukiraqenta te mwirara quqaave tiare. ⁴³ . Mwiva nrariara titaro, Ne Gotirara kempusaqama sena riaaqina vuvave. Ne Gotira mwaaquve tirave. So sai varitanta takuaararo Gotira sasa siraro mwira saaisaqa sianira takuaare, tinta. ⁴⁴ . Mwisa mwitaa tiavanta muaara vaintitana mwira tataaqaini ru taasavaqa mwisa tianema se nkuaa kua mwia qai timwa mwitaara. ⁴⁵ . Mwitaa siavaro suarivano nriro virira qiataqaa vasisaro esaamwi mwata maatara enama visaro qavaa suari vitira tavaarana tukiro ena siva vivira. ⁴⁶ . Suarivano tukiro vitinto vasisaro Sisasiva nrai kuaqintairo aasara nero titaro, Eri, eri rama sampakitani-Gotio, Gotio, naraiqamave ni qaqira pisatera siaro, tiro. ⁴⁷ . Sisasiva mwitaa tisanta mwo siasa mwini ntivinta variasa mwira kua rienta titanta, Mwiva Iraisaara tiri saivaqarama aare variso , tiavaro ⁴⁸ . mwovano saanero nramari saaqa inraisara vuruqa nrihi voqia sira vara sero uaini sunka viraqi mwaati namwa sero saavu mwonaiqaqa nutaqu sero mwia nraarive tiro mwira oqi viri namwa taira. ⁴⁹ . Mwi sisanta mwo siasa titanta, Sai varitanta takuaararo Iraisaava mwira saaisaqa sirero tukuanira takuaare, tinta. ⁵⁰ . Mwisa mwitaa tiavaro Sisasiva qavaa mpaa tiro aasara namwa sero qutu vira. ⁵¹ . Sisasiva qutu visaro Serusaremini Gotira nraavuqi tauha voqiama senta vuruqa nrora siritaava virintairo vutaqaa nrahituqiro miavi tukira. Mwitaa sisaro mwatura tisaro ori nrora airivano ntuvuraavurama visaro ⁵² . vainti ntaaru qunamwa taa mwatava qantua visanta mwiqinraasa Gotira nraase qoravano qutu vuasa airivano ntivinta variasa ⁵³ . Sisasira qavaa qaqi vara ntivuma saa enaraqaantainta mwisa Serusaremini qovarama vuavanta airi nraase qoravano mwisa takuara. ⁵⁴ . Naqua vaintisa vuniaa vaintivanovaqa, mwiravaqa nrima naqua vaintisa mwonravuvaqa, variavaro Sisasiva satariqaa siritaavaro varisanta mwisa Sisasiraqaa naqisi varitanta mwatura tirave, mwo inraisa mwo inraisa qovarasira takuenta, mwiaqaantainta mwisa nroraqama senta aatu sinta titanta, Qise, quqaa mwaava Gotira mwaaquvano varivama qutu viso, tiara. ⁵⁵ . Sisasiva qutu visanta nraase mwonravuvano nriaarantatantai varitanta viti takue variara. Mwi nraasesa Garirintainta Sisasira vataqi vitanta mwira saiqa vara mwite variasa variara. ⁵⁶ . Mwisaqintai mwonravu utu vasirero, Mariaava Makataraniaava mwo, Mariaava Semisisa Sonisa nrova mwo, Sepetira mwaaqutana nrova mwo variara. ⁵⁷ . Ena sisaro Arimatianiaava airi inraisa vatai vaintiva uro naira. Mwira utu Sosepiva, mwiva Sisasira vataqiro vi vari vaintiva varira. ⁵⁸ . Mwi vaintiva Pairaativa variraqi uro nero Sisasira mwavana miraqe varaqi qunamwa taase tisaro Pairaativa nrai naqua vaintisa titero titaro, Uro Sisasira mwavana vara mwira mwiate, tisaro ⁵⁹ . Sosepiva uro Sisasira mwavana satariqaantairo itu sero qaraasa vuruqa koriqasi vuruqara vara sero mwira qapuqama sero ⁶⁰ . varaqiro unto nrai naantiara qunamwa terara rietaro ori haqa sero vatairaqi vera vatero ori nrora mwo ventaqiro mwia oqaa vumwa tero vira. ⁶¹ . Mariaava Makataraniaavavaqa, mwira qamwava mwo Mariaavavaqa, mwitana vutura sini mwatasaa vinta varitanta viti mwira qunaara takue variara. ⁶² . Mwia qararaara Saarareqaa Gotira nraavuqa naqisiasavaqa, Parisi vaintinravuvaqa, uro Pairaatira vaqama senta ntununukaa sinta varitanta ⁶³ . mwirara titanta, Nrorao, te riaurarokumaari ti vari vaintiva mwiva nrai qaqi vari enara titaro, Ne taaramwo ena vari sena qavaa qaqi ntivuanirave tirave. mwiva mwitaa tirara tira, ⁶⁴ . re naqua vaintisa titairanta mwisa mwira qunamwa taaraqaa taaramwo ena varitanta naqisiqinta vuate. Mwira nraaqiaranravuvano uro mwira mwavana mwiqintainta muara varaqinta mwona senta nraase qorara kumaari titanta, Mwiva qaqi ntiviso, tivorave. Mwisa mwi enara kumaari tiva vaa kumaari kua timwa tairavaqa aatara saasorave, tinta. ⁶⁵ . Mwisa mwitaa tiavaro Pairaativa timwa niro titaro, So qine naqua vaintisa ntitaqinta uro saivanta mwisa mwira qunamwa taaraqaa suqema senta naqisiate, tiro. ⁶⁶ . Mwiva mwitaa tisanta mwisa uro vumwa taara ori mwiaqaa mwukya rateta naqua vaintisara titanta, Mwaini varitantama suqema sentama naqisiqi vuate, tiarama.