¹ . Saarare Suntaa mwaara enavano taiqaisaro mwia qararaara qataa sisanta Saanteqaa Mariaava, Makataraniaavavaqa, mwira qamwava Mariaavavaqa, Sisasira qunamwa taaraqi takuareranta vuarama. ² . Mwisa vuavaro qamwarama sero mwaturavano nroraiqama sero tisaro naavuniaava mwovano naavuntairo tuki oriqontai qenti suvaivu taara mwia vena qaqinaini pisatero ori mwiaqaa mwatasaa viro varira. ³ . Mwira virivano vasirero aaquakyaa voqiaama sero vasisaro mwira vaaqavano vasirero tonavu turomwunra voqia siva varisanta ⁴ . mwiaqaa naqisi varia vaintisa mwia takuenta nroraqama senta aatu sinta qiqu saauqu ririniri sisanta unto ninta qutu vuaasa aananamwa senta variara. ⁵ . Mwisa mwitaama variavaro naavuniaava nraase mwitanara titaro, Sia aatu siate. Ne napisuko qinetana Sisasirara satariqaa rutaa vaintira mpuaa sirera nriaavo. ⁶ . Mwiva sia mwaini variso. Mwiva nrai qini timwa ninemwa sero qaqima ntiviso. Nrinta mwira qunamwa taaraqi takuaate. ⁷ . Mwiqi takuentama saanenta uro mwira nraaqiaranravu timwa niate. Mwiva qutu viraqintai ntiviro mwiva naanema vaa Garirini viso. Qinenraavu mwini uro varitantama mwira takuevarave. So ne mwi kuaarama qini timwa nuko, tira. ⁸ . Mwiva mwitaa tisanta nraase mwitana mwira qunamwa taa mwatara mwia mwintai senta tana saanenta vuavaro sini mwavanavano aatu si varisanta si mwavanavano quase varisanta saanenta Sisasira nraaqiaranravu timwa nireranta vuarama. ⁹ . Mwitana saanenta vi variavaro Sisasiva qamwaramase mwitana vutaqaa qovara siro titaro, Varintatanave, tisanta mwitana quasentatana uro mwataqaa untoninta varitanta mwira qiqu qaa tuvarenta mwirara quasenta mwira utu nrora mwi variavaro, ¹⁰ . Sisasiva mwitanara titaro, Sia aatu siate. uro ni qata vasaa nravu timwa nivanta mwisa Garirini visa mwini uro ni takuaate, tira. ¹¹ . Sisasiva mwitaa tisanta nraase mwitana mwiva tinema senta aaraqaa qaqi qai vi variavanta naqua vaintisa Sisasira qunamwa taara qaa naqisiasa mwonravuvano Serusaremini uro nenta esaa mwi inraisava qovara sirara Gotira saiqa vara mwite variasa mwisa nrora vaintinravu timwa niara. ¹² . Timwa niaavanta mwiaqaantainta nrora vainti mwisa uro mwonravu vaqa ntitase kua timwa senta nkuaa kua vatenta naqua vaintisa nrora moni ninta titanta, ¹³ . Qinenravu mwitaama tiate, Te so enaqi vaite varuranta mwira nraaqiaranravuvano nrima mwira mwavana muaara vara saavo tiate, tiara. ¹⁴ . Pairaativa mwi kuaara riairera, te uro mwira kua timwa mwiaranta qine sia kua varevarave, tiara. ¹⁵ . Mwisa mwitaa tiavanta naqua vaintisa mwisaqintainta moni varenta mwisa tianema senta mwi kuara qai nraase qora timwa niqi vinta maqe mwaa enaravaqa Suntaavano Sisasirara mwi kuara qai viti viri timwa niqinta vi variara. ¹⁶ . Sisasira nraaqiara 11 nravuvano Garirini qaata mwiaqaa uro variate tinaini vuasa, ¹⁷ . uro nenta takuavaro Sisasiva varisanta mwira quasama mwitenta mwira utu nrora mwi variara. Mwira utu nrora mwi variavanta mwira nraaqiara sini mwonravuvano mwirara taara naumaqara tinta titanta, Quqaa so mwivave variso? ti variara. ¹⁸ . Sisaisva mwisa vaini uro nero titaro, Gotiva ni nroraqama saisana ne naavunivaqa mwatainivaqa vasi inraisara esaa mwi inraisaraqaa naqisi varuvave. ¹⁹ . Qine esaa mwatanaasa uro timwa nivanta mwisa ni nraaqiarama variate. Mwisa ni nraaqiara varivanta qine mwisa nramari nitanta ni ntora utu netanta, ni mwira mwaaqu utu nenta, Gotira mwaraqura utu netantama, mwisa nramari niate. ²⁰ . Mwitaa sitantama esaa qini timwa niu kua mwasaasara mwisavaqa timwa nintama mwi kuara riaaqinta vuate, tiate, tira. So riaate. Ne qinivaqa variqina vuariro mwaa mwatava taiqaanarove, tiro. Sisasiva mwi kuara tirama.