¹ . Sisasiva mwasaasa timwa ni taiqa sero qaata mwia mwini tuki varisanta nraase qora airivano mwira naantiara mwira vataqi vi variara. ² . Vi variavaro vainti mwovano rumuaravano maquqama saiva uro Sisasira vuqaa tori sauru raviro variro titaro, Nrorao, re ni saaisaqa siataa sirera, re soma ni rumuara suqema mwitenarave, tiro. ³ . Mwitaa tisaro Sisasiva nrai sauqu miavi mwira mwavanaqaa vatero titaro, Ne saaisaqa siataa sisana ne ri mwitaama mwitarerave. Ne ri rumuara tavana vuarive tuko, tisaro mwira rumuaravano mwira mwavana vauruqiro viva qamwarama sero tavana visaro mwiva so varira. ⁴ . Mwiva so varisaro Sisasiva mwira timwa mwiro titaro, Sia mwosa timwa niraitira, viraro Gotira saiqa vara mwite variari vaintiva ri mwavana takuaarive. Mwiaqaantaira re Mosesira mwaara kua rietarama mura vuani tiara quratairanta nraase qoravano riara titanta, quqaama mwira mwavanavano suqema viso, tiate, tiro. ⁵ . Sisasiva mwitaa timwa sero Kapenaamini visaro Romeni vaintivano 100 naqua vaintisaqaa naqisi variva Sisasira uro qinorama se mpo tiro titaro, ⁶ . Nrorao, ni saiqa vainti mwavanavano sia qasaa sisaro nroraqama sero ita visaro variso, tiro. ⁷ . Mwitaa tisaro Sisasiva titaro, So nriraqetana mwiva sinaini vitanta ne uro mwira suqema saase, tiro. ⁸ . Mwitaa tisaro nrora vainti mwiva qao tiro, Ne suqe vainti variariravauma re ni nraavuqi so vinarave. Re mwaini varitara mwirara suqema vuane tiraro mwiva suqema vuarive. ⁹ . Ne ri voqiama sena vaintiqaa naqisi varuvave. Ne naqi vaintira mwora vuane tukaro mwiva virave. Ne mwora nriane tukaro mwiva nrirave. Ne nena saiqa vaintiara mwitaa siane tukaro mwiva mwitaa sirave, tiro. ¹⁰ . Vainti mwiva mwitaa tisaro Sisasiva qise timwa sero kuantaa viro nraase qora mwira vataqinta nriasara titaro, Ne qini timwa nianira riaate. Mwi vaintiva mwo mwatanaava varitaro nroraqama sero niara rietaro niara mwiva soma ni saaisaqama mwitaanarove tirave. Sia ne mwiva tinema sero kua ti vaintira Isareri vaintiqintaina mwo mpaama sauko. ¹¹ . Mwaa kuara riaate. Naantiara nriara mwonantai mwonantainta vaaqara nraase qoravano Gotira mwatusaqi nrima varitanta mwisa qini saivaqara Ebarahaamuravaqa, Aisaakiravaqa, Saikopuravaqa varitanta sara nrevarave. ¹² . Mwisa varivanta mwaa mwatanaasa te Gotira nraase qorama varuro ti varisa, mwisa mwi sarara uro nraare tivaro mwisa navaaqavu sero mwaaqaini mwaati pisairanta mwisa sonkiraqi varinta natetanta niari aarai tenti nretanta varivarave, tiro. ¹³ . Sisasiva mwitaa timwa sero nrora vainti mwirara titaro, Rena mwaaqaini vuane. Re niara ni saaisaqama mwiteravave tianarara tiro, ri kuavano mwivauma vasianarove, tiro. Mwitaa tisaro maqe mwiqara mwira otuavaqa mwira saiqa vainti ita viva taiqa visaro so varira. ¹⁴ . Sisasiva Pitaara nraavuqi uro nero takuaisaro Pitaara nrinraatarara mwira mwavana qiara utovaro vaite varisaro ¹⁵ . Sisasiva uro mwira sauquqaa tu varaisaro mwira ita viva taiqa visaro mwi nraaseva ntiviro mwisa sara sunta nirero uti varira. ¹⁶ . Sisasiva mwini varisaro enama visanta mwi mwatanaasa vaanavano vutaqi varisa vitaqinta Sisasiva varinaini uro saavaro Sisasiva kuaqaantairo vaana titamwa saisanta nritarenta vuavaro Sisasiva ita visavaqa suqema saisanta so variara. ¹⁷ . Sisasiva mwitaamaqiro visaro Aisaiaava poropeti vaintivano ntaaru timwa tai kuava quqaa mwivau vasira. Aisaiaava Sisasira osarara mwitaama tiro: Mwi vaintiva tiri ita vuanira taiqa saanarove. Mwiva tiri ita vuanira suqema saanarove, tira. ¹⁸ . Sisasiva takuaisanta vaaqara nraase qoravano ntununukaama vinta mwira vara ututu variavaro Sisasiva titaro, Sai nruka qarenta vutura sini tosaini uro variare, tira. ¹⁹ . Qaso mwini virera siavaro vainti mwovano mwaara osara ti vari vaintiva uro nero Sisasirara titaro, Mwaara ti variarao, ne ri nraaqiara varirerave. Re mwona mwona vinara ne rivaqama sena qai virera temanamama varuko, tiro. ²⁰ . Mwitaa tisaro Sisasiva mwira timwa mwiro titaro, (Re ni vataqira virera sitara vaava sirorave.) Qaasau vairivano niari nruaunrutaaraqi vaite variarave. Kurivano niari nraavuqi vaite variarave. Ne mwataini mwatatai nraaqiarava vaitaani nraavuva sia vaiso, tiro. ²¹ . Sisasiva mwitaa tisaro mwira vataqi nrue vari vaintiva mwovano titaro, Nrorao, sai ne nena nkora naane uro qunamwa sena nritarena ri vataqi vuase, tisaro ²² . Sisasiva qao tiro, Re ni vataqira nriane. Qutu vua vaintisa voqiama se variasa soma qutu vuani vaintira qunamwa tevarave, tiro. ²³ . Sisasiva mwitaa timwa sero botiqi mwaari naisanta mwira nraaqiaranravuvano mwiravaqama senta vuarama. ²⁴ . Mwisa nruka mwiaqaa vi variavaro maqe mwiqara toqa vaururuvano nrukaqaa nroraqama sero tiqaro nramari venaqiro nri vi varisaro nramarivano botiqi mwaari nero boti arau sarero uti varira. Mwisa arau kyaaqara si varisaro Sisasiva mwiqi vaite varisanta ²⁵ . mwira nraaqiaranravu Sisasiva vaitainaini uro mwira suruma senta titanta, Nrorao, ntivira tiri saaisaqa siane. Te nramari nrenta qutuarava pataiqa vaiso, tinta. ²⁶ . Mwisa mwitaa tiavaro Sisasiva titaro, Qine naraiqamave aatu siavo? Qine niara kempusaqama senta riaataara vaisanta sia mwitaa siavo, tiro. Mwitaa timwa sero Sisasiva ntiviro toqa vaururuvaqa, nramariaravaqa titaro, So eqaane, tisaro nramarivano untomwi viro tineqa vasirama. ²⁷ . Tineqa vasisanta mwira nraaqiaranravuvano o qaqaama tenta sauqu nrunkinkiraa sinta titanta, Qise, mwiva nantaa si vaintivave variso? Toqa vaururuvanovaqa nramarivanovaqa mwira kua rie variso, tiara. ²⁸ . Mwisa mwitaa timwa sentama botiqi vuasama vutura qarasi sini Gatarinesini uro naavanta vainti taaratanavano mwisa uro qinorama saara. Mwitana vaana sampaqa variatana vainti qunamwa taara ori ataamwuqi varitanta mwitana mwoqama senta vainti nuqutireranta uti variavanta nraase qoravano mwitana aatu aatu sitanta sia mwitana varia aarara mwini vi variara. ²⁹ . Mwitana ori ataamwuqitaita uro Sisasira qinorama senta aasara nenta titanta, Re Gotira mwaaquvanove. Tiritana nantaa sirerave nriaro? Tiritana ruani enava sia nrisara re qamwarama sera tiritana rirerarave nriaro? tinta. ³⁰ . Mwitana mwitaa tiavaro vutura mwosanta quaara airivano uhiqa nre variavanta ³¹ . vainti taaratana vutaqi varia vaanasa Sisasirara mpo tinta titanta, Re tiri titairera re tiri titairaqe te quaaraqi uro variare, tinta. ³² . Mwitaa tisaro Sisasiva so vuate tisanta mwisa nritarenta uro quaaraqi variavanta quaara mwisa sanenta okai qoraiqasiraqi untoninta nramariqi numwa vinta nramari nrenta qutu vuara. ³³ . Mwitaa siavanta quaaraqa naqisi variasa takuenta sanenta uro mwatusa nroraqi quaara qutu vuasara timwa ninta vaana vutaqi varia vaintitanaravaqa timwa niavanta ³⁴ . Mwi mwatusaraqinraasa esaa mwisa Sisasira ntita sareranta uro nenta mwirara titanta, Mpo re sia tiri mwaata mwaini variane. Ntivira mwaaqaantaira vuane, tinta.