¹ . Sisasiva mwitaa timwa sero mwiva timwa niqiro viro titaro, Gotiva ninta saiqavaqa ntusa siaso tinta, qine sia maquqama vu aato titanta mwora saiqa ntusama se mwiva mwitaa mwataaqa sivave tiate. Qine mwora saiqa ntusama senta mwitaa mwataaqa vasirave tivaro Gotiva ninta saiqavaqa ntusama sero mwitaa mwataaqa vasiravema tianarove. Qine mwosa saiqa ntusa sira nkuaa mwivauma Gotiva nintavaqa ntusa sianarove. ³ . Re naraiqamave mwata kunkomwavano rena qata vasaa vuqi viqetaira takuetarama sia rena vuqi satari sanka nroravano viqetaira takuera siaro? ⁴ . Satari sanka nroravano ri vuqi viqetero vaisara naraiqamave rena qata vasaara saiqe ri vuqintaina mwata kunkomwa qaqini vena saase ti variaro? Sia mwitaa tiane. ⁵ . Re suqe saiqa varauko titara kumaariqa si variaravave. Vuniqama sera rena vuqintaira satari sanka vena sera mwiaqaantaira suqema sera takuetarama rena qata vasaa vuqintairavaqa so mwata kunkomwa vena senarave. ⁶ .(Mwo sia vaintisa quaara vairi voqiama senta variarave.) Qine Gotiraini suqema sero kyotaqama vasiani inraisara sia vairi mwiane. Qine kyukyukyakyaara sia quaara sinaini pisaate. Qine mwitaa sivaro mwi inraisara namwa ntautiqama sero mwiaqaantairo kuantaa viro ninta nkutuanarove. ⁷ . Qine Gotira sapara sivaro mwiva mwi inraisara qini niarive. Qine mpaamaqi vitama so mwi inraisara mpaama sevarave. Qine qenti nuqutivaro Gotiva qantua nitaanarove. ⁸ . Gotira mwo inraisara sapara siariva soma varaanarove. Mwo inraisara mpaamaqiro vuariva soma takuaanarove. Qenti ntukuakua siani vaintira qantuama mwitaanarove. ⁹ . Qini nraaqiara qosaqintairo ntavave mwira mwaaquvano qamaara naaru tiraro mwira qova ori mwianaro? Mwira qova siama mwitaa sianaro. ¹⁰ . Mwira mwaaquvano tavusara naaru tiraro mwira memaruve mwianaro? Mwiavaqa siama mwitaa sianaro. ¹¹ . Qine sia suqe sia nraase qorasa varitantavaqa qine nenta nraaqiara suqe inraisa qai ni variarave. Qini qova Gotiva mwo? Qini qova naavuni variva qini aatara sero mwo inraisara naaru tiani vaintira suqe inraisa qai manaquma seroma mwianarove. ¹² . Qine mwosara tiri mwitaa mwataaqa senta suqema timwitaate tinema senta qine mwisa mwitaama nitaate. Mosesivavaqa poropeti vaintinravuvaqa timwataa kuava mwia osara mwitaamama vasiro. ¹³ . Qenti taaratana vasirave. Mwo pataiqa vaisaro mwo nrora vasirave. Qine qenti pata mwina qai vuate. Nraase qora esaara taiqa vinainiara vua aarava, aara nrora qisaasa siva vaisaro mwi aararaqaanaa qentivanovaqa nrora vaisanta vaaqara nraase qoravano qenti mwina vi variarave. ¹⁴ . Nraase qora esaa ena suqema senta qaqi qai variqinta vuanainiara, vi qentiva pataiqa vaisaro mwiaqaa vua aaravavaqa pataiqa mwusaari tuse vua aarava vaisanta nkuaiqa nkuaiqavano qai mwi aarara mpaama senta vi variarave. ¹⁵ . Vainti mwonravuvano titanta, Te Gotira kua qini timwa ni varuro, titanta kumaari ti variasa mwisa aatu rauritanta variate. Mwisa sipisipi aananamwa senta nruetantavaqa mwisa mwaatira vutaqi qaasau vairima variarave. ¹⁶ . Qine mwisa nrue varira takuetama mwisa maqu osara napisi sevarave. Vaintivano uaini tamwa siqirero mwiva sia auqururoraqaatairo siqirave. Mwiva fiki tamwa siqirero sia uki auqu vataa satariqaantairo siqirave. ¹⁷ . Mwia voqiama sero suqe satarivano suqe tamwa qai rie varisaro maqu satarivano maqu tamwa qai rie varirave. ¹⁸ . Suqe satarivano siama maqu tamwa riaanarove. Maqu saatarivano siama suqe tamwa riaanarove. ¹⁹ . Satari sia suqeq tamwa riaira mwia teqa senta tiaqi tuta se variarave. ²⁰ . Ne qavaa qini timwa nuko. ( kumaariqama se titanta, Te Gotira kua timwa ni varurasave, tiasa qine mwisa nrue varira takuentama mwisa maqu osara napisi sevarave, tiro.) So qine mwi vaintisa varaqinta vi saiqara takue takuentama qine napisi senta mwisa maqu saiqa takuevarave tuko. ²¹ . Sia esaa nraase qora niara tiri nroravanove ti varisa Gotiva naqisiani mwatusaraqi vivarave. Ni nkova naavuni varira mwira kua riemwaqiro vuariva mwiva qaima mwira mwatusaqi vuanarove. ²² . Naantiara esaara enaqaa nraase qora airivano niara titanta, Mpo, nrorao, nrorao, ri utu netanta, Gotira kua ti variavanarave. Ri utu netanta te vaintiqintai vaana vaaqara titenta ri utu netanta nrora saiqa varaavanarave, tivarave. ²³ . Mwisa mwitaa tivaqena ne, Qao, sia qini takuausave. Qine maqu saiqa vare variasave. Niqaantainta nriaraini vuate, tianirave. ²⁴ . Ni riero ne tunema sero vare variani vaintira osara qini timwa nirerave. Mwi vaintiva naumaqara vataava kempusa nraavu soqa taani vaintira voqiama seroma varianarove. ²⁵ . Mwi vaintiva oriqa nrai nraavu soqa tairara tiro, aaquvanove, sukuravanove, toqa vaururuvanove, nroraqama sero netaro mwia vena saanirave tisarovaqa mwi nraavuva sia unto niraitiro, kempusaqama vasirave. ²⁶ . Ni kua riero qaqira sero sia ne tunema sero variani vaintira osara qini timwa nirerave. Mwi vaintiva sia naumaqara vasiva nrai nraavu nruqasata soqa taani vaintira voqiama sero varianaro. ²⁷ . Mwi vaintiva nrai nraavu nruqasata soqa tairara tiro, aaquvanove, sukuravanove, toqa vaururuvanove, nroraqama sero netaro mwira nraavu vena saisaro nraavuvano unto nisaro sukuravano raaqu sairarama tuko, tiro. ²⁸ . Sisasiva mwi kuara mwi kuara mwisa timwa ni taiqa saisanta nraase qora mwini ntununukaama vuasa titanta, Qise, mwiva qaima mwo qarama sero kua ti variso. ²⁹ . Mwiva sia mwaara osara ti varia vaintisa timwa timwianema sero timwa timwiso. Mwiva nrora vaintivano tianema seroma ti variso, tinta tiara.